Read Nyamwezi Varoma 15 Bible Online

Varoma 15 - Nyamwezi bible

Varoma 15

¹Yilitudima iswe va nguzu kuvuvukilizya vusakazu wa venavo vakavile na nguzu, na ngʼo kwitogezya iswe venekili duhu.

²Kila umo mugati niswe amutogezye muzenganwa wakwe mugati na tusoga kigele twijamilizye hamohene.

³Kwisi Kristo mwene wavagi akitogezizye mwenekili, sumbwa kitisi yitonilwe, Mafusano ga venavo vakufusage veve gangwile nene.

⁴Kwisi gose genayo gatonilwe kale gatonilwe kutuhembeka, kigele mugati na vujamu na mugati nʼihulicho lya mavutone tulidime isigizyo.

⁵Na Mulungu wa vujamu na wʼihulicho amupe inwe vose kuvi va moyo

⁶gumo mugati na Yesu Kristo, kigele mumugongole na moyo gumo na mulomo gumo Mulungu, Vava wa Guku wiswe Yesu Kristo.

⁷Kunguno yeniyi mwiyanukule hamohene kitisi Kristo wamwanukulaga inwe ha lukumo lwa Mulungu.

⁸Kwisi ndiyomba ati, Kristo, kunguno ya hanayene ya Mulungu, wavile mukumba wa venavo vatahirivilwe, kigele agajamilizye malagano hogene vahenga vagapivilwe;

⁹na hangi kigele vapagani vamugongole Mulungu kunguno ya kisa chakwe, kitisi yitonilwe, Nkukukumilizya veve mugati na vapagani, Na nkuligongola lina lyako.

¹⁰Hangi yiyombilwe, Mwihalale, inwe vapagani, hamohene na va chalo chakwe.

¹¹Na hangi, Mumugongole Guku, inwe vapagani vose, Na va mafyalo gose vamukuzye.

¹²Na hangi Yesaya alihaya, Likwiza Itina lyamwa Isai, mwenuyo homwene akuvuka kuvatema vapagani, Na vapagani vakumwisigizya mwenuyo.

¹³Alisi Mulungu wʼisigizyo amokazye inwe na kudeha kose na kuhola mugati na kusanizya, inwe mukule mwisigizyo mugati na nguzu ya Roho Nsondo.

¹⁴Ndimanicha nene mwenekili, vadugu vane, na ndigudima muhayo gwenugu kunguno yinwe ati, inwe mokalile vusoga na mokazivilwe na ngelo ya kumanicha

¹⁵tose, na mulikovola kwihana inwe venekili. Nagimaga kumutonela inwe mihayo zimo mu barua yeniyi, kigele namwizukizye inwe kunguno ya kisa chenicho

¹⁶napivilwe na Mulungu ati, nave mutumami wa Kristo Yesu mugati na vapagani, kigele natumame kitisi muhozya wa Mhola ya Chelu ya Mulungu, kigele vapagani vave kitambo hochene kilimutogezya Mulungu na chasondohivilwe na Roho Nsondo.

¹⁷Sisyo vukumuku wane kunguno ya milimo ya Mulungu vulimo mugati na Kristo Yesu.

¹⁸Kwisi nene kugima ngʼo kuyomba gangi, sumbwa genaya duhu hogene Kristo wagavezaja mugati na nene, kigele vapagani vadonhoke—mugati na mihayo ninga milimo, mugati na nguzu zya malumeho na migaka, mugati na nguzu ya Roho Nsondo.

¹⁹Sisyo namalaga kuyitanizya Mhola ya Chelu ya Kristo hosehose kufuma Yerusalema na ku malwande gose kusika Iliriko.

²⁰Alisi nakovaga duhu kuyitanizya Mhola ya Chelu henaho duhu lina lyamwa Kristo litali kutaniziwa, kwigela ngʼo nazenge kwigulya na musingi

²¹gwa munhu ungi; sumbwa kitisi yitonilwe, Avo hovene vakawililwe mhola yakwe, vakuvona, Na avo vatali kwigwa, vakumanicha.

²²Kunguno yeniyi nahangilizivilwe kingi kwiza kuwinwe.

²³Alisi lelo nkavile na hakutumama hangi ha malwande genaya, na nikumbagwa myaka mingi kwiza kuwinwe mwitungo lya kuja ku Spania.

²⁴Kwisi ndisigizya kumuvona inwe mu lugendo lwane na kufililiziwa ninwe kumbele, ulu namalaga kwigutiwa na lusangi lwinwe.

²⁵Alisi lelo ndija ku Yerusalema kuvatumamila vasondo.

²⁶Kwisi yavatogezaja vana Makedonia na Akaya kusoga mapesa ga kuvagwasya vasondo vapina hovene valimo mu Yerusalema.

²⁷Hangi vatogagwa kwita syenisyo, kwisi vali vatondwa va venavo. Ulu vapagani vali na lusangi hamohene navo mugati na tusoga twa roho, haho yilivadima savasava kuvatumamila na tusoga twa liwelelo.

²⁸Ulu namalaga milimo yeniyi na navapaga lusogo lwenulo hambele na vasangilwaho, nkuvuka, nkuvitila hawinwe kuja ku Spania

²⁹Alisi ndinianicha ati ulu niza kuwinwe, nkwiza na vokale wa luvango lwa Kristo.

³⁰Alisi ndimuhana inwe, vadugu, kunguno yamwa Guku wiswe Yesu Kristo, na mugati na kutogwa kwa Roho, mugangadike hamohene

³¹nane mugati na kundombela hamwa Mulungu, kigele napiziwe ku venavo vʼivengwe mu Uyahudi, na vutumwa wane ku Yerusalema vuvatogezye vasondo;

³²kigele, ulu Mulungu watogwa, nafike kuwinwe na kudeha, nisuhye hamohene ninwe.

³³Mulungu wa kuhola aveho hamohene ninwe. Amen.