Read Nyamwezi Varoma 2 Bible Online

Varoma 2 - Nyamwezi bible

Varoma 2

¹Kunguno yeniyi veve munhu homwene ulivayangula vangi, ukavile na muhayo gwa kwivula. Kwisi mwenumo ulimuyangula ungi uliwiyangula mwenekili, kunguno genayo uligayangula uligavezya veve mwenekili.

²Kwisi tulimanicha ati vuyanguzi wa Mulungu vuli wa loleyene kuwavo hovene valita genaya.

³Veve munhu homwene ulivayangula venavo valita genayo, naʼho uligita, kinahe, uliganika ati ukuvupela vuyanguzi wa Mulungu?

⁴Ninga veve ulivuvengelezya wingi wa vusoga na vudekanu na vuilembezu wakwe, na ukamanikizye ati vusoga wa Mulungu vulikutonga ku vupiluka moyo?

⁵Alisi kunguno ya vulambu wa moyo gwako, hogwene gulikana kunogoleka, uliwikumingila mwenekili kisila ha lusiku lwa kisila na ha vufumbulwa wa vuyanguzi vugololoku wa Mulungu,

⁶homwene akumusyokezya kila munhu hanuma na milimo yakwe; venavo hovene mugati na vujamu mu

⁷milimo misoga, valikova lukumo na isima na genayo gakavile kuzimanguka, kuwavo vuzuvuku wa hanahana;

⁸alisi va kikuli hovene vakavile kuyidonhoka hanayene na valivuzumya wigomu, kuwavo kisila na kugaywa.

⁹Luduko na vupineheziwa kwigulya na myuye ya kila munhu homwene alita kavi, hambele Muyahudi na sisyo savasava Mugriki.

¹⁰Alisi lukumo na isima na kuhola ku mwenuyo alita tusoga, hambele Muyahudi na sisyo savasava Mugriki.

¹¹Kwisi hamwa Mulungu haduhu pendelea ku vanhu.

¹²Vose hovene vakenagulile vuduhu ngʼhama vakuzimila vuduhu ngʼhama, alisi hovene vakenagulile vali nazyo ngʼhama,

¹³vakuyangulwa na ngʼhama. Vagololoku hambele na Mulungu vakavile avo valizigwa ngʼhama, sumbwa avo valizimazya ngʼhama vakugololwa.

¹⁴Ulu vapagani, hovene vali gele ngʼhama, valizimazya ngʼhama mu vutundwa wavo, haho venavo, hovene vali gele ngʼhama,

¹⁵vali kitisi ngʼhama kuwavo venekili, kunguno valigela ati milimo ya ngʼhama yitonilwe mu myoyo yavo, na muzwi gwa moyo gulisangilwaho hamohene navo,

¹⁶miganiko galiwivula ninga galiwigolola—ha lusiku lwenulo Mulungu akuziyangula mbisila zya vanhu mugati na Kristo Yesu hanuma na Mhola yane ya Chelu.

¹⁷Alisi veve, ulu ulitanwa Muyahudi, na uli isendamila ngʼhama, na uliwikumilizya kunguno ya Mulungu na

¹⁸ulikimanicha kikowa chakwe, na ulimanicha kugemela mupango gwa gose, kunguno wahembekilwe ngʼhama,

¹⁹na uliwisanizya mwenekili kuvi kilongozi wa vahofu na lumole ku venavo valimo mu giti, mulezi wa vahumbu

²⁰na muhembeki wa valele, kunguno ngʼhama yilikolecha vumanicha na hanayene, veve ulimuhembeka ungi,

²¹ukavile kwihembeka mwenekili? Veve ulitanizya

²²vanhu valeke kwiva, ukavile kwiva? Veve uliyomba valeke kusihya, ukavile kusihya? Veve ulifigaya

²³fimbulimbuli, ukavile kusonza mu masengelo? Veve uliwikumilizya kunguno ya ngʼhama, naho ulilivinza isima lya Mulungu mugati na kuzivinza ngʼhama?

²⁴Kwisi kitisi yatonilwe, Kunguno yinwe lina lya Mulungu lilifuswa mugati na vapagani.

²⁵Kwisi vutahiriwa vulivela ulu ulizimazya ngʼhama, alisi ulu ulizivinza ngʼhama vutahiriwa wako vuligela kitisi ukatahirivilwe.

²⁶Ulu mwenuyo akatahirivilwe aliyimazya mikumo ya ngʼhama, kinahe, mwenuyo, nulu akatahirivilwe, kwigela ngʼo kitisi watahirivilwe?

²⁷Loleyene, mwenuyo akatahirivilwe ha muvili, alisi alizimazya ngʼhama, akukuyangula veve homwene ulizivinza ngʼhama, nulu uli navo vutone na vutahiriwa.

²⁸Kwisi mwenuyo akavile Muyahudi wa lole homwene aligela ha muvili duhu kitisi Muyahudi, ninga vukavile vutahiriwa wa lole wenuvo vulikwila ha muvili duhu;

²⁹sumbwa uyo ali Muyahudi homwene ali Muyahudi mugati na moyo, na vutahiriwa wa lole vuli wa moyo mugati na roho na ngʼo mugati na vutone; na ikuzyo lyakwe likavile kufuma ku vanhu, sumbwa kumwa Mulungu.