Read Nyamwezi Varoma 6 Bible Online

Varoma 6 - Nyamwezi bible

Varoma 6

¹Lelo tuyombe kinahe? Tujame mugati na vukenaguzi, kigele kisa kingihe muno?

²Byololo, yikavile sisyo! Iswe hovene tuli vafwile ku vukenaguzi, lumenoki tuzuvuke mugati navo hangi?

³Ninga mukamanikizye ati, iswe hovene togivilwe mugati na Kristo Yesu togivilwe mugati na kufwa kwakwe?

⁴Sisyo twazikilwe nawe mugati na kogiwa, kigele, kitisi Kristo wahembukivilwe mugati na lukumo lwamwa Vava, sisyo sisyene iswe vene tusimize mu vuzuvuku vupya.

⁵Alisi ulu twasangivilwe nawe mugati na kufwa kitisi kwakwe, sisyo sisyene mugati na vuhembuke wakwe;

⁶na tulimanicha ati munhu wiswe wa kale wakomelilwe hamohene nawe ku musigiti, kigele muvili gwa vukenaguzi guzimanguke, tuleke kuvi hangi vasese va vukenaguzi.

⁷Kwisi homwene wafwile wagololilwe na wasundilwe ku vukenaguzi.

⁸Alisi ulu twafwile hamohene na Kristo, haho tulisanizya ati tukuzuvuka hamohene nawe.

⁹Kwisi tulimanicha kunguno Kristo wamalaga kuhembuka ku lufu, mwenuyu kufwa ngʼo hangi, lufu lukavile kutema hangi kwigulya nawe.

¹⁰Kwisi mugati na kufwa kwakwe wafwaga ku vukenaguzi vuliko kamo duhu, alisi mu kuzuvuka alizuvuka kumwa Mulungu.

¹¹Mwikomye inwe venekili kitisi muli vafwile ku vukenaguzi, alisi muzuvuke kumwa Mulungu mugati na Kristo Yesu.

¹²Haho vukenaguzi vuleke kutema mu mivili yinwe ya lufu kumukungilizya inwe kugadonhoka mawivonya gayo.

¹³Na muleke kuvufumizya vukenaguzi fivalango finwe kuvi mafikolo ga wigomu, alisi mwifumye inwe venekili kumwa Mulungu kitisi venavo vavage vafwile, alisi lelo valizuvuka, na fivalango finwe five mafikolo ga vugololoku.

¹⁴Kwisi vukenaguzi vuleke kutema kwigulya ninwe, kunguno mukavile hansilili na ngʼhama, sumbwa hansilili na kisa.

¹⁵Haho kinahe? Tukenagule, kunguno tukavile hansilili na ngʼhama sumbwa hansilili na kisa? Byololo, yikavile sisyo!

¹⁶Mukamanikizye ati ulu muliwifumya inwe venekili ku munhu umo kitisi vakumba na kumudonhoka, haho muli vakumba va mwenuyo, homwene mulimudonhoka, ninga vakumba va vukenaguzi howene vulileta lufu, ninga vakumba va vudonho howene vulileta vugololoku?

¹⁷Alisi tumulumbile Mulungu, kunguno inwe mwavage vakumba va vukenaguzi, alisi mwagudonhokile na moyo gose mutindo gwa vuhembeki wenuvo mwahembekilwe.

¹⁸Mwakomolilwe kufuma ku vukenaguzi na mwavile vakumba va vugololoku.

¹⁹Alisi ndiyomba kitisi vanhu vakuyombaga kunguno ya vusakazu wa mivili yinwe. Kitisi inwe mwafifumaja fivalango finwe kuvi vakumba va zoma na wigomu, kigele muvumazye wigomu, sisyo sisyene lelo mufifumye fivalango finwe kuvi vakumba va vugololoku howene vulifika ku vusondohiwa.

²⁰Kwisi aho mwavage vakumba va vukenaguzi, mwavage vanamiko hambele na vugololoku.

²¹Alisi mwitungo lyenilo mwavage na vusulu ki ku genayo hambele nago muli nayo nsoni

²²lelo? Mhelo ya genayo yili lufu. Alisi lelo mwakomolilwe kufuma ku vukenaguzi, na mwavile vakumba va Mulungu, na muli navo vusulu wa kusondohiwa, na mhelo yavo vuzuvuku wa hanahana.

²³Kwisi musyahala gwa vukenaguzi guli lufu, alisi kipanwa cha Mulungu kili vuzuvuku wa hanahana mugati na Kristo Yesu, Guku wiswe.