Read Nyamwezi Varoma 8 Bible Online

Varoma 8 - Nyamwezi bible

Varoma 8

¹Sisyo haduhu kitanga kwigulya na venavo valimo mugati na Yesu Kristo; hovene vakavile kusimiza hanuma na kikowa cha muvili sumbwa cha Roho.

²Kwisi ngʼhama zya Roho, hozyene zilileta vuzuvuku mugati na Kristo Yesu, zyankomolaga nene kufuma

³ngʼhama ya vukenaguzi ya lufu. Kwisi hogene gavagi gakakovolilwe na ngʼhama kunguno ya vusakazu wa muvili, genaya Mulungu witaga, aho wamutumizaja Mwana wakwe mu wikole wa muvili gwa vukenaguzi kunguno ya vukenaguzi, na wavuyangulaga vukenaguzi

⁴mugati na muvili, kigele fikowa fya ngʼhama fimaziwe muwiswe, hovene tukavile kusimiza hanuma na kikowa

⁵cha muvili, sumbwa cha Roho. Venavo valitongwa na kikowa cha muvili valigaloma genaya ga muvili, alisi venavo valitongwa na Roho valigaloma genaya ga roho.

⁶Kwisi malome ga muvili galileta lufu, alisi malome ga Roho galileta vuzuvuku na kuhola;

⁷kunguno malome ga muvili gali wanisi hambele na Mulungu, kwisi gakazidonhokile ngʼhama zya Mulungu, hangi gakakovolile.

⁸Venavo valikilonda kikowa cha muvili vakakovolile kumutogezya Mulungu.

⁹Alisi inwe mukavile kukilonda kikowa cha muvili sumbwa cha roho, ulu Roho ya Mulungu yilikalamo mugati ninwe. Alisi homwene akavile nayo Roho ya Kristo, mwenuyu akavile munhu wakwe.

¹⁰Alisi ulu Kristo alikalamo mugati ninwe, muvili, ahene, gufwile kunguno ya vukenaguzi, alisi roho yilizuvuka kunguno ya vugololoku.

¹¹Alisi ulu Roho ya mwenuyo, wamuhembukaja Yesu ku lufu, alikalamo mugati ninwe, haho mwenuyo wamuhembukaja Kristi Yesu ku lufu akuyizuvucha mivili yinwe ya lufu, kunguno ya Roho ya mwenuyu alikalamo mugati ninwe.

¹²Kunguno yeniyi vadugu, tukavile vatondwa va muvili, kigele tukidonhoke kikowa nago.

¹³Kwisi ulu mulikidonhoka kikowa cha muvili haho mukufwa; alisi ulu mugati na Roho muliyivulaga milimo ya

¹⁴muvili, haho mukuzuvuka. Kwisi vose hovene valitongwa na Roho ya Mulungu vali vana va Mulungu.

¹⁵Inwe mukayipivilwe Roho ya vusese hoyene yilileta vova hangi, sumbwa mwayipivilwe Roho ya wana

¹⁶mugati nayo tulilila, Abba, Vava! Roho yeniyi yilisangilwa na roho yiswe ati tuli vana va Mulungu.

¹⁷Alisi ulu tuli vana, haho tuli vasaliki savasava, vasaliki va Mulungu na vasaliki viye vamwa Kristo; ulu tuliduka hamohene nawe kigele tukumukiwe hamohene nawe.

¹⁸Kwisi ndivona ati maluduko gʼitungo lyenili gakavile kinhu, ulu tuligikolanizya na lukumo lwenulo lukufumbulwa hawiswe.

¹⁹Kwisi fitundwa fyose filikulindila na nhumbu kufumbulwa kwa vana va Mulungu.

²⁰Kwisi fitundwa fyatulilwe hansilili na vuzimanguke—ngʼo ku kutogwa kwafyo, sumbwa kwa mwenuyo wafitulagaho—nafyo fili nʼisigizyo ati,

²¹fitundwa fyene fikukomolwa ku vusese wa vuzimanguke, na fipiwe vunamiko wa lukumo lwa vana va Mulungu.

²²Kwisi tulimanicha ati fitundwa fyose filisamba hamohene na fili na vusungu hamohene kusika lelo.

²³Na ngʼo fitundwa duhu, alisi iswe vene, hovene tuli nacho kipanwa cha mbele cha Roho, tulisamba muwiswe venekili na tulilindila

²⁴kuvi vana—vukomolwa wa mivili ziswe. Kwisi twapizivilwe mugati nʼisigizyo. Alisi isigizyo holyene lilivonwa na minso likavile isigizyo. Kwisi icho munhu

²⁵alikivona, lumehoki akisigizizye hangi? Alisi ulu tulikisigizizya icho tukavile kukivona, haho tulikilindila na vujamu.

²⁶Na sisyo sisyene Roho alitugwasya mugati na vusakazu wiswe, kwisi tukamanikizye kulomba kitisi yilitudima, alisi Roho alitulombela iswe na kulomba hokwene kukakovolilwe kuyombwa.

²⁷Na uyo homwene aliyikomezya myoyo, aligamanicha malome ga Roho, kwisi alivalombela vasondo kitisi Mulungu alitogwa.

²⁸Tulimanicha ati gose galiwigwasya hamohene, kigele gavavelele ha tusoga venavo valimutogwa Mulungu, avo vitanilwe hanuma na ndaka yakwe.

²⁹Kwisi avo hovene wavamanikizye vukumbu kale, venavo vene wavasogolile vukumbu kale, vamwikole Mwana wakwe mugati nʼisumbano lyakwe, kigele uyo ave mutongelezi wa vadugu vingi.

³⁰Na avo hovene wavasogolile vukumbu kale, venavo vene wavitanaga; na venavo wavitanaga, venavo vene wavagololaga; na venavo wavagololaga, venavo vene wavakumukaja.

³¹Tuyombeki lelo ha gose genaya? Ulu Mulungu aliho hamohene niswe, nani alikovola kuvi mukandi

³²wiswe? Uyo homwene akamwigugilile Mwana wa kwe, sumbwa wamupanaga ha lwande lwiswe, kinahe, akuleka kutupa iswe gose hamohene na mwenuyo?

³³Nani akuvavula vasogolwa va Mulungu? Mulungu ali mwenuyu alivagolola! Nani akuvatemela kitanga?

³⁴Kristo ali mwenuyo wafwile, na kukila yeniyi, wahembukile, nawe aliho ha mulila gwa Mulungu, nawe alitulombela iswe.

³⁵Nani akutulekanya na kutogwa kwamwa Kristo? Maluduko, ninga vupineheziwa, ninga vupiziwa, ninga nzala, ninga vuzule, ninga

³⁶misyolo, ninga lupanga? Kitisi yitonilwe, Kunguno yako tulivulagwa limi zelele, Na tulilomwa kitisi ngʼholo zya kusikwa.

³⁷Mugati na gose genaya tulikinda na vukinde vuhanya muno mugati na mwenuyo watutogilwe.

³⁸Kwisi ndimanicha ati ninga ngʼo lufu, ninga ngʼo vuzuvuku, ninga ngʼo malaika, ninga ngʼo va vukovozi, ninga ngʼo genaya ga lelo, ninga ngʼo genaya galakiza, ninga ngʼo nguzu, ninga ngʼo genaya ga mwigulya, ninga ngʼo genaya ga hasi,

³⁹ninga ngʼo kitundwa kingi kilikovola kutulekanya na kutogwa kwa Mulungu mugati na Kristo Yesu, Guku wiswe!