Read Nyamwezi 1vakorinto 12 Bible Online

1vakorinto 12 - Nyamwezi bible

1vakorinto 12

¹Lelo kunguno ya fipanwa fya roho, vadugu, nkatogilwe muleke kumanicha.

²Mulimanicha ati aho mwavagi vapagani mwadutagwa ku fimbulimbuli fimumu, kitisi mwatongagwa.

³Kunguno yeniyi ndimolecha ati kuduhu umo homwene aliyomba na Roho ya Mulungu alihaya, Yesu afwizilwe; na kuduhu umo alikovola kuhaya, Yesu ali Guku, sumbwa na Roho Nsondo.

⁴Vuliho vulekane mugati na fipanwa, alisi Roho ali umo duhu.

⁵Vuliho vulekane mugati na mitindo zya

⁶vukumba, na Guku ali umo duhu. Hangi vuliho vulekane mugati na milimo, alisi Mulungu ali umo duhu, homwene alivezya gose mugati na vose.

⁷Alisi kila umo wapivilwe vukundukule wa Roho ku vusulu wa vose.

⁸Kunguno ungi alipiwa na Roho muhayo gwa wenge, na ungi muhayo gwa masala kunguno ya Roho

⁹mwenuyu umo; ungi isanizyo mu mwenuyu umo, ungi kipanwa cha kupizya valwile mu Roho mwenuyu umo,

¹⁰ungi kuvezya migaka, ungi vufumbuzi kukomanya roho, ungi mitindo ya fiyombele, ungi kupilula fiyombele.

¹¹Alisi gose genaya alitumama Roho mwenuyu umo, homwene alimugavulila kila umo kitisi atogilwe.

¹²Kwisi kitisi muvili guli gumo, nago guli na fivalango fingi, alisi fivalango fyose fya muvili, nulu fili fingi, fili

¹³muvili gumo, sisyo savasava Kristo. Kwisi mu Roho umo iswe vose togivilwe kuvi muvili gumo, ninga Vayahudi ninga Vagriki, vasese ninga vanamiko, niswe vose twanwesivagwa na Roho umo.

¹⁴Ninga muvili gukavile kivalango kimo sumbwa fingi.

¹⁵Ulu kugulu kukuyomba, Kunguno nkavile kukono, nkavile kwa muvili, kukavile koya kuvi kwa muvili.

¹⁶Ulu itwi likuyomba, Kunguno nkavile linso, nkavile lya muvili, likavile koya kuvi lya muvili.

¹⁷Ulu muvili gose gwavagi linso, mbe kuhe kwigwa. Ulu gose gavagi itwi, mbe kuhe

¹⁸kunungʼhilizya. Alisi lelo Mulungu wafitulaga fivalango ku muvili,

¹⁹kimo na kimo, kitisi watogagwa. Ulu fyose fyavagi kivalango kimo, mbe kuhe muvili?

²⁰Alisi lelo filiho fivalango fingi, nago muvili guli gumo.

²¹Linso likakovolile kukuwila kukono, Nkakufundile;

²²ninga hangi mutwe ku magulu, Nkamufundile. Byololo, sumbwa fivalango fyenifi fya muvili hofyene fililolwa fisakazu filifundwa muno;

²³nafyo hofyene fililolwa vuduhu isima ku muvili, tulifipa isima ihanya; nafyo hofyene fili fya nsoni filikumbwa sisoga muno.

²⁴Sumbwa fyenifi fili fisoga fikavile na vufundwa; alisi Mulungu wagulungaja muvili sisyo ati cheniki kilidohelwa isima

²⁵kilipiwa isima ihanya, ngena vulekane vuve mu muvili, sumbwa kigele fivalango fisunge fyenekili.

²⁶Ninga kivalango kimo kilisatiwa, fivalango fyose filisatiwa hamohene nacho; ninga kivalango kimo kilikuziwa, fivalango fyose filideha hamohene nacho.

²⁷Lelo inwe muli muvili gwamwa Kristo na kila umo ali kivalango chago hekeheke.

²⁸Na Mulungu wavakindikaga vamo mwivilingano, va mbele vatume, va vuvili vafumbuzi, va vudatu vahembeki, haho migaka, haho fipanwa fya kupizya valwile, na kugwasya, na kutema, na mitindo ya fiyombele.

²⁹Kinahe, vose vali vatume? vose vali vafumbuzi? vose vali vahembeki? vose valita migaka?

³⁰vose vali nafyo fipanwa fya kupizya valwile? vose valiyomba mu fiyombele?

³¹vose valipilula? Alisi mutamanilwe fipanwa fihanya. Na hangi ndimulagila nzila nsoga muno.