Read Nyamwezi 1vakorinto 2 Bible Online

1vakorinto 2 - Nyamwezi bible

1vakorinto 2

¹Nene, vadugu, aho nizaga kuwinwe, nkizile kumutanizya lwiviso lwa Mulungu mugati na mihayo ya nguzu ninga ya ngelo.

²Kwisi nkalomile kugumanicha muhayo gumo mugati ninwe, sumbwa Yesu Kristo nawe akomelilwe.

³Na nikalaga kuwinwe mu vusakazu, na mu vova, na mu kudetema kwingi.

⁴Na vuyombi wane na vutanizya wane wavagi vukavile wa mihayo ya ngelo ya kukinda,

⁵sumbwa wa lumeho lwa Roho na nguzu, kigele isanizyo linwe lileke kuyisendamalila ngelo ya vanhu, sumbwa ku nguzu ya Mulungu.

⁶Ahene, ngelo tuliyomba mugati na vakomezu; alisi nayo yikavile ngelo ya liwelelo lyenili, ninga ngʼo ya vatemi va liwelelo lyenili hovene valizimanguka;

⁷sumbwa tuliyomba ngelo ya Mulungu ya mu lwiviso, hoyene yaliyavisilwe, nayo Mulungu wayikindikaga kufuma mbuki ya liwelelo ku lukumo lwiswe;

⁸nayo kuduhu umo wa vatemi va liwelelo lyenili aliyimanicha, kwisi ulu valivayimanikaja mbe vakamukomelile Guku

⁹wa lukumo; alisi kitisi yitonilwe, Genaya linso likagawine, ninga itwi likagigilwe, Nago gakalomilwe mu moyo gwa munhu, Genaya Mulungu wavavezezaja venava hovene valimutogwa. Alisi iswe Mulungu watufumbulilaga genaya na Roho.

¹⁰Kwisi Roho aligikomya gose, nago mavusihu ga Mulungu.

¹¹Kwisi nani agamanikizye genaya gali mugati na munhu, sumbwa roho ya munhu hoyene yili muwakwe? Sisyo genaya ga Mulungu kuduhu munhu

¹²agamanikizye, sumbwa Roho ya Mulungu. Niswe tukayanukulile roho ya liwelelo, sumbwa Roho hoyene yilifuma kumwa Mulungu, kigele tugamaniche ago hogene twagapivilwe na Mulungu.

¹³Nago tuligayomba, ngʼo na mihayo hoyene twahembekilwe na ngelo ya vanhu, sumbwa hoyene twahembekilwe na Roho, tuligalondosya genaya ga Roho na mihayo ya Roho.

¹⁴Lelo munhu mu vutundwa wakwe akavile kuganukula genaya gali ga Roho ya Mulungu; kwisi gali vuhumbu kuwakwe, nawe akakovolile kugamanicha, kwisi gali gesiwa ku mutindo gwa Roho.

¹⁵Alisi munhu wa Roho aligikomya gose, nulu mwenekili akavile kwikomiwa.

¹⁶Kwisi nani waliwamanicha mutindo gwamwa Guku amuhembeke? Alisi iswe tuli va mutindo gwamwa Kristo.