Read Nyamwezi 1vakorinto 4 Bible Online

1vakorinto 4 - Nyamwezi bible

1vakorinto 4

¹Vanhu vatulole iswe kitisi vakumba vamwa Kristo na vakasika va malwiviso ga Mulungu.

²Hangi yilivadima vakasika vave vajamu.

³Alisi kuwane kilelo nayangulwe ninwe, ninga na vuyanguzi wa vanhu; ninga nene mwenekili nkavile kwiyangula.

⁴Kwisi nkamanikizye muhayo gumo kuwane, alisi nkagololilwe kunguno yeniyi; alisi uyu alinyangula ali Guku.

⁵Kunguno yeniyi muleke kuyangula muhayo litali itungo lyago, kusika Guku alize, homwene akugamulika genaya gavisilwe mu giti, nawe akugafumbula malome ga mu myoyo; na haho kila munhu akupiwa lukumo lwakwe na Mulungu.

⁶Lelo genaya, vadugu, nakolanizaja kuwane na Apolo kunguno yinwe, kigele muhembekwe niswe kuvita ngʼo genaya gatonilwe, kwigela ngʼo munhu mugati ninwe ikumilizye hambele na mwiye.

⁷Kwisi nani alikukumucha veve kukila vangi? naʼho uli naki hochene ukachanukulile? alisi ulu wachanukulaga, kuki ulikumilizya, kitisi ukachanukulile?

⁸Mwamalaga kwiguta, mwamalaga kupiwa vusavi, mwatemaga vuduhu niswe; ahene sisoga ulu mwatemaga, kigele niswe tuteme hamohene ninwe.

⁹Kwisi ndivona kitisi Mulungu watutulaga iswe vatume kunuma, kitisi vanhu vatemilwe kitanga cha lufu; kwisi tuli kitisi fivembwa fya liwelelo,

¹⁰na fya malaika, na fya vanhu. Iswe tuli vahumbu kunguno yamwa Kristo, alisi inwe va masala mu Kristo; iswe vasakazu, alisi inwe va nguzu; inwe muli nʼisima, alisi iswe tulivengeleziwa.

¹¹Kusika itungo lyenili tulitama nzala, na tulikolwa nota, na tuli zule, na tulitulwa mapi, na tuli gele wikalo.

¹²Hangi tuliduka kutumama na makono giswe. Ulu tulidukanwa, tulidosya; ulu tulipineheziwa, tulilembela.

¹³Ulu tulilembekeziwa, tuligongola. Tuli kitisi mapalala ga liwelelo, kitisi mazyala kusika lelo.

¹⁴Nkavile kutona genaya kunguno ya kumuponda inwe nsoni, sumbwa kumuhana inwe kitisi vana hovene ndivatogwa.

¹⁵Kwisi ninga muli navo vahembeki fihumbi ikumi mu Kristo, mukavile na vavava vingi; kwisi mu Kristo Yesu nene namuvyalaga inwe na Mhola ya Chelu.

¹⁶Lelo ndimuhana inwe, muve valondezi vane!

¹⁷Kunguno yeniyi namutumizaja Timoteo kuwinwe, homwene ali mwana wane mutoneke na mujamu mu Guku, nawe akumwizukizya nzila zyane hozyene zilimo mu Kristo, kitisi ndihembeka hosehose mu mavilingano gose.

¹⁸Lelo vamo valigagambazya, kunguno viganikaga ati nkuleka kwiza kuwinwe.

¹⁹Alisi nkwiza wangu kuwinwe, ulu Guku watogwa, haho nkumanicha, ngʼo mihayo ya wigagambazya wavo, sumbwa nguzu zyavo.

²⁰Kwisi vutemi wa Mulungu vukavile kwimila mu muhayo, sumbwa mu nguzu.

²¹Mulikovaki? nkwiza kuwinwe na munyefu ninga na kutogwa na roho ya vudekanu?