Read Nyamwezi 2 Vakorinto 10 Bible Online

2 Vakorinto 10 - Nyamwezi bible

2 Vakorinto 10

¹Lelo nene mwenekili Paulo ndimwigongela inwe ku vudekanu na vukondu wamwa Kristo, nene, honene ndi mudekanu ulu ndiho hamohene ninwe, alisi mugagambazu ulu ndi haduhu.

²Ahene, ndimulomba inwe, ndeke, ulu ndiho, kuvi na vugagambazu, kwisi ndisigizya kuvi na vugimu ku vamo hovene valiganika atitulisimiza ku mutindo gwa muvili.

³Kwisi nulu tulisimiza mu muvili, tukavile kuvezya vulugu ku nguzu ya muvili;

⁴kwisi masikolo ga vulugu wiswe gakavile ga muvili, sumbwa ga nguzu hambele na Mulungu kugwisya maluguta;

⁵kugwisya miganiko na vuhanya howene vulivulasa vumaniche wa Mulungu, na kuvezya nsamhwa miganiko gose kigele gamudonhoke Kristo;

⁶na kuvi tayari kuducha vutazi vose, aho vudonho winwe vuli vukomezu.

⁷Kinahe, muligilolela genaya gali hambele na minso ginwe? Ulu munhu alisanizya mwenekili ati ali wa Kristo, iganike hangi muwakwe, ati

⁸kitisi uyu ali wa Kristo, sisyo savasava niswe. Kwisi ninga ulu nene nikumilizye muno kunguno ya vukovozi wiswe, howene Mulungu watupaga kumujamilizya inwe, ngʼo kumugwisya inwe, nene kupondwa ngʼo nsoni;

⁹ndeke kwigela kitisi nakova kumogohya na barua zyane.

¹⁰Kwisi valiyomba, Barua zyakwe ntimbu na zya nguzu, alisi ulu aliho na muvili ali musakazu, na vuyombi wakwe vukavile kinhu.

¹¹Munhu wa mutindo gwenugu amaniche ati, kitisi tuliyomba mu barua ulu tuli haduhu, sisyo tukuvi mu milimo ulu tukuviho.

¹²Kwisi tukavile kugima kwisolozya ninga kwilinganizya na venavo hovene valikumilizya venekili; alisi venavo valiwipima kuwavo venekili, na valiwilinganizya kuwavo venekili, vakavile na masala.

¹³Alisi iswe tukatogilwe kwikumilizya kukila kipimo, sumbwa na kipimo cheniki cha luvimbi, hochene Mulungu watupaga kitisi kipimo, tusike kuwinwe nako.

¹⁴Kwisi tukavile kwiyagalula kukila tulikovola, kitisi tukamufikilile inwe; kwisi twamufikilaga ninwe mu Mhola ya Chelu ya Kristo.

¹⁵Sisyo tukavile kwikumilizya kukila kipimo ku milimo ya vangi; alisi tulisigizya ati, ulu isanizyo linwe lilikula, tukukuziwa kuwinwe ku luvimbi lwiswe, kigele tuje hangi kumbele muno;

¹⁶kigele tutanizye Mhola ya Chelu nako ku malwande kuvita inwe, vuduhu kwikumilizya ku luvimbi lwa vangi kunguno ya genaya gasikilizivilwe.

¹⁷Alisi homwene aliwikumilizya, ikumilizye mugati na Guku.

¹⁸Kwisi kuduhu homwene aliwikumilizya mwenekili alizumiliziwa, sumbwa homwene Mulungu alimukumilizya.