Read Nyamwezi 2 Vakorinto 12 Bible Online

2 Vakorinto 12 - Nyamwezi bible

2 Vakorinto 12

¹Yandima kwikumilizya, nulu yikavelile; alisi nkuyomba kunguno ya mawigele na mavukundukule gamwa Guku.

²Ndimumanicha munhu mugati na Kristo, lelo yavitile myaka ikumi na inne, ulu wavagi mu muvili, nkamanikizye; ninga hanze na muvili, nkamanikizye; Mulungu amanikizye; mwenuyu wajanivagwa higulya kusika ilunde lya vudatu.

³Nane ndimumanicha munhu uyo, ulu mu muvili ninga hanze na muvili, nkamanikizye,

⁴Mulungu amanikizye, kitisi wajanivagwa higulya kusika mu Paradisi, nawe wigagwa mihayo yikayombagwa, hoyene munhu akavile na luhusa kuyiyomba.

⁵Kunguno ya munhu wa mutindo gwenugu nkwikumilizya; alisi kunguno yane nene kwikumilizya

⁶ngʼo, sumbwa ku vusakazu wane. Kwisi ulu nakovaga kwikumilizya, mbe nkavile muhumbu, kwisi nkuyomba ga loleyene; alisi ndiwihangilizya, kwigela ngʼo ansolozezye kukila genaya aligavona na aligigwa kuwane.

⁷Ngena nikumilizye kuvita kipimo ku vuhanya wa mavukundukule aga, napivilwe linhwa mu muvili gwane, malaika wamwa Shetani, kigele antule, ndeke kwikumilizya kuvita kipimo.

⁸Kunguno yalyo namulombaga Mulungu kadatu lininge.

⁹Nawe wambwilaga, Kisa chane kilikukwilila; kwisi nguzu zyane zilikomeziwa mu vusakazu.

¹⁰Kunguno yeniyi nditogwa kwikumilizya ku vusakazu wane, kigele nguzu zyamwa Kristo zikale muwane. Kunguno yeniyi nditogeziwa na vusakazu na mavusatu, na mavufundi, na mavudukiwa, na maluduko kunguno yamwa Kristo; kwisi ulu ndi musakazu ndi nazyo nguzu.

¹¹Navile muhumbu, inwe mwankungilizaja. Yandima nakumiliziwe ninwe; kwisi navagi nkavile kudohelwa kinhu ku vatume vahanya muno, nulu ndi kilelo.

¹²Loleyene malumeho ga mutume gatumamagwa kuwinwe mu kulembelambela kose, ku malumeho na migaka na milimo ya nguzu.

¹³Kinahe, mugati naki mwadohelilwe, kukila mavilingano gangi, sumbwa mwenumo ati nkamutimbizye inwe? Mumbonelage kisa kwipuvyo lyenilo!

¹⁴Lolagi, lwenulu luli lugendo lwa vudatu ndi tayari kwiza kuwinwe, nane kumutimbya inwe ngʼo; kwisi nkavile kukova nsavo zinwe sumbwa inwe venekili; kwisi yikavadimile vana kuvatulila vavyazi kiviko, sumbwa vavyazi ku vana.

¹⁵Alisi yantogezya kufumya, ahene, nafumiwe kunguno ya myuye yinwe. Kinahe, yili syenisi ati ulu ndimutogwa inwe munogwene, inwe

¹⁶mulintogwa hado? Ninga yive syenisyo ati nkamutimbizye, alisi navagi muhuguku, namudimaga na vuyengi!

¹⁷Kinahe, namulipaja inwe kinhu kuwavo hovene

¹⁸namutumizizizye inwe? Namuhanaga Tito, na namutumaga mudugu hamohene nawe. Kinahe Tito, wamulinaja inwe kinhu? Kinahe, tukasimizile mu Roho umo mwene na mu mapambala gamo gene? Vukumbu kale muliganika ati tuliwiyombelezya kuwinwe.

¹⁹Byololo, hambele na Mulungu tuliyomba mu Kristo. Alisi gose gali kunguno ya kumujamilizya

²⁰inwe, vatoneke. Kwisi ndogoha ati aho ndize kuwinwe, ndeke kumusanga kitisi nditogwa kumusanga, nane nigele kuwinwe kitisi mukatogilwe; ati hamo gakuviko wikenya, ivuva, kisila, nsika, kwilembekezya,

²¹vusonsomozi, makumilizyo, nkindo; ati, aho ndize hangi, Mulungu wane akundohelezya kuwinwe, nane nkuvasayila vingi hovene vakenagulaga kale, na vakanogolekile ku zoma na vuyanzani na mawivonya hogene vagitaga.