Read Nyamwezi Vagalatia 1 Bible Online

Vagalatia 1 - Nyamwezi bible

Vagalatia 1

¹Paulo, mutume—alisi akafumile ku vanhu, ninga akatumizivilwe ngʼo na munhu, sumbwa na Yesu Kristo na Mulungu Vava, homwene wamuhembukizye

²uyo ku lufu—na vadugu vose hovene valiho hamohene

³na nene, ku mavilingano ga mu Galatia. Kisa kive hamohene ninwe na kuhola hokwene kulifuma kumwa

⁴Mulungu Vava na Guku wiswe Yesu Kristo, homwene wipanaga mwenekili kunguno ya mavukenaguzi giswe, kigele atukomole iswe ku liwelelo lyenili ivi lya hagisi

⁵hanuma na kikowa cha Mulungu Vava wiswe, homwenuyu apiwe lukumo kusika myaka na myaka de. Amen.

⁶Ndikumya ati inwe mulilekana wangu na mwenuyo homwene wamwitanaga inwe na kisa chamwa Kristo na mulipiluka ku mhola ya chelu ya mutindo gungi,

⁷kwisi mhola yingi ya chelu haduhu; sumbwa valiho vamo hovene valimutavanya inwe na valikova kuyipilula Mhola ya Chelu ya Kristo.

⁸Alisi ulu iswe, ninga malaika wa mwilunde akumutanizya inwe mhola ya chelu hoyene yililekana na iyo twamutanizaja inwe,

⁹mwenuyu afwizilwe! Navombaga hambele, na ndisyokelezya hangi: ulu umo alimutanizya inwe mhola ya chelu hoyene yililekana na iyo hoyene mwayanukulile,

¹⁰mwenuyu afwizilwe! Kinahe, ndikova lelo kuvityamilizya vanhu, ninga Mulungu? Ninga ndikova kuvatogezya vanhu? Ulu ntali ndikova kuvatogezya vanhu, sanga nene nkavile hangi mukumba wamwa Kristo.

¹¹Ndimuwila inwe vadugu ati, Mhola ya Chelu hoyene yatanizivilwe na nene yikafumile ku vanhu.

¹²Kwisi nene mwene nkayipivilwe na vanhu, ninga nkahembekilwe yeniyi, sumbwa nafumbulilagwa na Kristo Yesu.

¹³Kwisi inwe mwigilwe kunguno ya kisimizile chane cha kale mugati na dini ya kiyahudi, kitisi najamaga muno kuliducha ivilingano lya Mulungu na kulikenagula.

¹⁴Hangi mu dini ya kiyahudi navakilaga vichane va musimo gwane mwigongo lyane, kunguno nagangadikaga munogwene mugati na fitilwe fya vahenga vane.

¹⁵Alisi Mulungu homwene wambagulaga kufuma munda yamwa mayu na wanitanaga mugati na kisa chakwe,

¹⁶aho watogagwa kumufumbula Mwana wakwe mugati na nene, kigele navatanizye vapagani Mhola yakwe ya Chelu, itungo lyenilo nkitozizye ninga na munhu umo ngʼo,

¹⁷ninga nkajile ku Yerusalema ku venavo hovene vavagi vatume hambele na nene, sumbwa najaga ku Arabia, na haho nasyokaga ku Damasko.

¹⁸Haho hanuma na myaka idatu najaga ku Yerusalema kwimanicha na Kefa, na nadilaga hawakwe nsiku ikumi nʼitano;

¹⁹alisi nkamuwine mutume ungi sumbwa Yakobo, muduguye wamwa Guku.

²⁰Kunguno ya genaya ndimutonela inwe, lolagi, Mulungu alimanicha, nkavile kuyomba vulamba.

²¹Haho najaga ku lwande lwa Siria na Kilikia.

²²Alisi navagi nkamanikizivilwe ku vusyu na mavilingano gamwa Kristo mu Uyahudi,

²³sumbwa vigagwa duhu kitisi yayombagwa: Mwenuyo watudukaje kale alitanizya lelo isanizyo lyenilo walikanage kale.

²⁴Na venavo vamukuzaja Mulungu kunguno ya nene.