Read Nyamwezi Vafilipi 4 Bible Online

Vafilipi 4 - Nyamwezi bible

Vafilipi 4

¹Kunguno yeniyi, vadugu vatoneke, inwe hovene ndimukumbula, na hovene muli kudeha kwane na ndezi yane, muve vajamu mugati na Guku, vatoneke.

²Ndimuhana Evodia na ndimuhana Sintike vikondele mugati na Guku.

³Naʼho mwene, Synzugus, ndikulomba, uvagwasye, kwisi valasanaga hamohene nane kunguno ya Mhola ya Chelu, hamohene na Klemento na vatumami vichane, hovene mina gavo gatonilwe mu kitabu cha vuzuvuku.

⁴Mudehe hanahana mugati na Guku! hangi ndimuwila:

⁵mudehe! Vudekanu winwe vumanikiwe na

⁶vanhu vose! Guku ali bihi. Muleke kwisusuma kunguno ya kinhu kimo, sumbwa mugati na kulomba na kwigongela hamohene na kulumbila, mugafile mafundo ginwe kumwa Mulungu, na kuhola kwa Mulungu,

⁷hokwene kulikila ngelo zyose, kukuyilindila myoyo yinwe na miganiko ginwe mugati na Kristo Yesu.

⁸Hangi vadugu, gose genayo gali ga lole na ga isima, na gali magololoku na masondo, na genayo galisika isima na nsembo nsoga na ikuzyo, mugadime genayo.

⁹Gose genayo mwagahembekilwe na mwaganukulile na mwagigilwe na mwagawine hawane, mugite genayo, na Mulungu wa kuhola akuvi hamohene ninwe.

¹⁰Alisi nene nadehaga muno mugati na Guku kunguno mu nsiku zyenizi mwapivagwa nguzu, syenisyo mulikovola kukizukila kikalile chane; ahene, ninga kale mwakizukilile, alisi mwavage mukavile na itungo lya kuntumamila.

¹¹Yeniyi nkavile kuyomba kunguno ndikifunda kinhu, kwisi nahembekilwe kwiguta na genayo ndi nago.

¹²Ndimanicha kwikala mugati na vupina, na ndimanicha kuvi na wingi wa masese; nahembekilwe tose twa mitindo yose; kwiguta na savasava kuvi na nzala, kuvi na wingi wa masese na savasava vudohelwa.

¹³Ndikovola tose mugati na mwenuyo alimpa nguzu.

¹⁴Alisi inwe mwavezya kuvi na lusangi nane mu mamikosi gane.

¹⁵Alisi inwe Vafilipi vene mulimanicha ati hambuki ya Mhola ya Chelu, mwitungo lyenilo nafumaga ku Makedonia, kuduhu ivilingano lyavagi na lusangi na nene mu kufisolozya fipanwa na

¹⁶fyanukulwa, sumbwa inwe mwinene duhu. Kwisi ninga mu Tesalonike mwatumizaja kamo ninga kavili genayo nafundaga.

¹⁷Ngʼo kunguno ndikitamanilwa kipanwa, sumbwa nditamanilwa kukivona kisumo hochene mukusyokeziwa.

¹⁸Ndi nago gose ku mafundo gane na masese; hangi galikwila muno hawane kunguno napivagwa na Epafrodito fipanwa finwe, hofyene fili kitisi mugazu gulimota, kitisi kitambo kivelile na kilimutogezya Mulungu.

¹⁹Alisi Mulungu wane kunguno ya vusavi wakwe akumupa inwe mafundo ginwe gose ha lukumo mugati na Yesu Kristo.

²⁰Lelo Mulungu, Yava wiswe, apiwe lukumo kusika myaka na myaka de. Amen. Muvagisye vasondo vose mugati na Kristo Yesu.

²¹Vadugu hovene vali hamohene nane valimugisya; vasondo vose valimugisya,

²²alisi muno venavo va mu numba yamwa Kesari.

²³Kisa cha Guku Yesu Kristo kiveho hamohene na roho yinwe.