Read Nyamwezi Vakolose 2 Bible Online

Vakolose 2 - Nyamwezi bible

Vakolose 2

¹Nene ndikova mumaniche vuhanya wa vulasani, howene ndi navo kunguno yinwe na kunguno ya venavo vali mu Laodikia, na kunguno ya vose hovene vatali

²kuvuvona vusyu wane wa muvili, kigele myoyo yavo yihulikiwe, navo valimbiwe mugati na kutogwa, na vavufikile vusavi vose wa vumanicha vose, na vayimaniche mbisila ya Mulungu,

³hoyene ali Kristo, mugati nawe mbiko zyose zya ngelo na zya vumanicha, zivisile.

⁴Ndiyomba yeniyi kwigela ngʼo umo amuyenge inwe na mihayo misemu.

⁵Kwisi nulu nkavileko na muvili, ndiko hamohene ninwe mu roho, na ndideha kuvona ludonho na vujamu wa isanizyo linwe hamwa Kristo.

⁶Kunguno yeniyi, isyo mwamwanukulaga Kristo Yesu, Guku, sisyo sisyene musimize mugati nawe,

⁷muyisihilizye mizi yinwe na muzengwe mugati nawe, na mujamiliziwe mwisanizyo, isyo mwahembekilwe, kigele mukule mugati na kalumbilo.

⁸Mwikomye, kuduhu umo amusampe inwe mugati na ngelo zya liwelelo na vugulumi wa gele, ku mihayo ya kale ya vanhu na vuhembeki wa welele wa liwelelo,

⁹na ngʼo wenuvo wamwa Kristo. Kwisi mugati nawe

¹⁰ha muvili vulimo vokale vose wa Mulungu, na inwe mokazivilwe nawe, homwene ali mutwe gwa nguzu na vukovozi vose.

¹¹Na mugati nawe inwe vene mwatahirivilwe na vutahiriwa howene vukavezivilwe na makono, aho mwaguzulaga muvili gwa vukenaguzi na mwawanukulaga vutahiriwa wamwa Kristo.

¹²Kwisi mugati na kogiwa mwazikilwe hamohene nawe, na mugati nako mwahembukivilwe hamohene nawe, kunguno ya isanizyo ha nguzu zya Mulungu, hozyene zyamuhembukaja ku vafwile.

¹³Na inwe hovene mwavage mwafwile kunguno ya mavukenaguzi ginwe na kunguno mukatahirivilwe, inwe vene Mulungu wamuzuvukaja hamohene nawe, na watutondolaga mavukenaguzi giswe gose.

¹⁴Na wakifutaga cheti cha musango hamohene na malagilizyo gacho, hochene chavagi mugambi wiswe, na wakingaja mugati na kukikomela ku musigiti.

¹⁵Na wavingaja va nguzu na va vukovozi hawakwe, na wavapondaga nsoni hambele na vose, aho wavagiyilaga ku musigiti.

¹⁶Kunguno yeniyi kuduhu umo amuyangule inwe kunguno ya kiliwa na kinwiwa, ninga kunguno ya sikukulu ninga vuvala wa mwezi ninga sabato.

¹⁷Gose genaya gali kitisi kinziminzimi cha genayo galakiza, alisi kinhu cheniki kili Kristo.

¹⁸Kuduhu umo amupuzye vugade winwe mugati na vukondu wa vugulumi na kuvakuvila vamalaika, homwene aligadima genayo aliganika wagavonaga, na aliwifunangizya cha gele mu

¹⁹masala ga muvili gwakwe, na akavile kudimana na mutwe, kufuma kugo muvili gulipiwa nguzu na gulilimbiwa na tufyufyu na matimba gago, na gulikula ku nguzu zya Mulungu.

²⁰Ulu inwe mwafwile hamohene na Kristo na mwafumile ku vuhembeki wa welele wa liwelelo, kuki, kitisi mutali mulizuvuka mu liwelelo, muliwitunya hansilili

²¹na mikumo kitisi yeniyi: Uleke kukidima, uleke kukilavuzya,

²²uleke kukikumya? Gose genaya galizimanguka mugati na kutumilwa, alisi yeniyo mikumo na mavuhembeki ga vanhu duhu.

²³Gose genayo galigela kuvi ga ngelo ku venavo valiwisenga ku miganiko gavo, na valiwitunya mugati na vukondu, na valigwima muvili mafundo gago, nago gakavile na mupango, sumbwa galikimazya kikowa cha muvili duhu.