Read Nyamwezi 1 Vatesalonike 4 Bible Online

1 Vatesalonike 4 - Nyamwezi bible

1 Vatesalonike 4

¹Hangi, vadugu, tulimulomba na tulimuhana inwe mugati na Guku Yesu, isyo mwahembekilwe niswe kusimiza kitisi yilimudima inwe na yilimutogezya Mulungu, kitisi mulivezya savasava, kigele inwe mutongele mwenumo hambele.

²Kwisi muliyimanicha mikumo yeniyo twamupaga ku vukovozi wamwa Guku Yesu.

³Kwisi cheniki kili kikowa cha Mulungu, inwe musondohiwe,

⁴na mwisunde inwe venekili kufuma ku vuyanzani, na kila umo mugati ninwe amaniche kumugada mukima ave mukima wakwe mugati na vusondo na isima,

⁵ngʼo mu vutamanilwa wa muvili kitisi vapagani, hovene vakamumanikizye Mulungu.

⁶Kuduhu umo amukongole na kumuyenga muduguye mugati na muhayo gwenugu, kwisi Mulungu alihola ku gose genaya, kitisi twamalaga kumuwila na kusangilwa kuwinwe.

⁷Kwisi Mulungu akatwitanile ku zoma, sumbwa ku vusondohiwa.

⁸Kunguno yeniyi mwenuyo homwene aliyivengelezya yeniyi, akavile kumuvengelezya munhu, sumbwa Mulungu, homwene alimupa inwe Roho yakwe nsondo.

⁹Alisi mukafundile namutonele kunguno ya kuvatogwa vadugu, kwisi inwe venekili mwahembekilwe na Mulungu kwitogwa hamohene.

¹⁰Na yeniyi mulivavezezya vadugu vose mu Makedonia yose; alisi tulimuhana mutongele mwenumo kumbele.

¹¹Na mulukove lukumo lwinwe mugati na kwikala sele na kuyilonda milimo yinwe venekili na kutumama na makono ginwe,

¹²kitisi twamulagilaga inwe, kigele musimize kitisi yilisika hambele na venavo va hanze, na kwigela ngʼo muvufunde vugwasya wa umo.

¹³Alisi vadugu tukatogilwe inwe muleke kumanicha kunguno ya venavo vagulalile, kwigela ngʼo muve na misayo kitisi avo vangi hovene vakavile na isigizyo.

¹⁴Kwisi ulu tulisanizya ati Yesu wafwaga na wahembukaga, sisyo sisyene Mulungu mugati na Yesu akuvasicha venavo vagulalile hamohene nawe.

¹⁵Na yeniyi tulimuwila inwe na muhayo gwamwa Guku mwenekili: iswe hovene tulizuvuka na tulisigala kusika itungo lya kwiza kwamwa Guku, iswe kuvatongela ngʼo venavo vagulalile.

¹⁶Kwisi Guku mwenekili akusoka kufuma kwilunde na kilaka kihanya na muzwi gwa malaika muhanya na kalumbete ka Mulungu, na venavo vafwile

¹⁷mugati na Kristo vakuhembuka hambele; haho iswe, hovene tulizuvuka na tulisigalaho, tukujanwa hamohene navo mu malunde kumusanga Guku mwilunde; na syenisyo tukuvi hamohene na Guku nsiku zyose.

¹⁸Kunguno yeniyi mwihuliche hamohene na mihayo yeniyi.