Read Nyamwezi 2 Vatesalonike 1 Bible Online

2 Vatesalonike 1 - Nyamwezi bible

2 Vatesalonike 1

¹Paulo, na Silasi, na Timoteo kwivilingano lya mu Tesalonike mugati na Mulungu Vava, na Guku Yesu Kristo.

²Kisa kiveho hamohene ninwe na kuhola hokwene kulifuma kumwa Mulungu Vava na Guku Yesu Kristo.

³Yilitudima kumulumbila Mulungu hanahana kunguno yinwe vadugu, kitisi yiligelanila, kunguno isanizyo linwe lilikula munogwene, na kwitogwa kwinwe mugati ninwe yose kulikwila.

⁴Sisyo tuliwikumilizya iswe venekili mu mavilingano ga Mulungu kunguno ya vujamu winwe na isanizyo linwe mugati na maluduko

⁵ginwe gose na mamikosi, hogene muliduka. Kwisi genaya gali lumeho lwa vuyanguzi vugololoku wa Mulungu, kigele musike isima ku vutemi wa Mulungu

⁶kunguno yavo inwe muliduka; ulu kili kigololoku kumwa Mulungu kuvasyokezya venavo mamikosi hovene valimupinehezya inwe,

⁷na kumupa inwe hovene mulipineheziwa ihulicho hamohene niswe hʼitungo lya kufumbulwa kwamwa Guku Yesu kufuma kwilunde, hamohene na vamalaika va nguzu zyakwe mugati na malambi ga moto.

⁸Haho akuvihola venavo hovene vakavile kumumanicha Mulungu, navo vakavile kuyidonhoka Mhola ya Chelu yamwa Guku wiswe Yesu Kristo.

⁹Na venavo vakupiwa luduko lwa vuzimile wa hanahana na kusundwa ku vusyu wamwa Guku na

¹⁰lukumo lwa nguzu zyakwe, ulu aliza ha lusiku lwenulo kukumukiwa mugati na vasondo vakwe, na kukumukiwa mugati na vose venavo vamusanizizye; kwisi vusangilwaho wiswe wasanizivilwe ninwe.

¹¹Kunguno yeniyi tulimulombela inwe hanahana, kigele Mulungu wiswe amusolozye inwe kitisi vʼisima mu kwitanwa kwinwe, mugati na nguzu zyakwe akimalizye kikowa cha kuvezya tusoga na milimo yʼisanizyo;

¹²kigele lina lyamwa Guku wiswe likumukiwe mugati ninwe, ninwe mugati nawe, kunguno ya kisa cha Mulungu wiswe na Guku Yesu Kristo.