Read Nyamwezi 2 Vatesalonike 2 Bible Online

2 Vatesalonike 2 - Nyamwezi bible

2 Vatesalonike 2

¹Kunguno ya kwiza kwamwa Guku wiswe Yesu Kristo na kwivilinga kwiswe hawakwe, tulimulomba inwe,

²vadugu, muleke kuhahala wanguwangu na kukangwa, ninga ngʼo na roho, ninga ngʼo na muhayo, ninga ngʼo na barua hoyene yiliyombwa ati yafumile kuwiswe, ati lusiku lwamwa Guku lwafikileho.

³Kuduhu umo amuyenge inwe mugati na mutindo gumo, kwisi kolaga hambele wize uvo vulekane vuhanya, na akwigela uyo

⁴munhu wa vukenaguzi, mwana wa vuzimile, homwene ali mugome, na aliwigagambazya kwigulya na gose hogene galitanwa Mulungu ninga galisengwa, sisyo nawe akwiyikazya mwenekili mwisengelo lya Mulungu na kwiyolecha mwenekili kitisi Mulungu.

⁵Mukavile kwizukila ati namuwilaga inwe yeniyi, aho navagi

⁶ntali ndiho hawinwe? Alisi mulikimanicha icho kilimuhangilizya kusika akwigela mwitungo lyakwe.

⁷Kwisi ivengwe ilo lilitumama lelo, alisi mu lwiviso, kusika mwenuyo alilihangilizya wingivilwe.

⁸Haho uyo munhu wʼivengwe akufumbulwa homwene Guku Yesu akumuvulaga na myuye ya mulomo gwakwe, na mugati na lukumo lwa kwigela kwakwe akumuzimangucha,

⁹mwenuyo homwene akwiza ku nguzu ya Shetani mugati

¹⁰na nguzu na malumeho na migaka ya vulamba, na mugati na vuyengani vose wa wigomu ku venavo valizimila, kunguno vakayanukulile na kuyitogwa hanayene, kigele vapiziwe.

¹¹Kunguno yeniyi Mulungu alitumizya kuwavo vupuvya wa nguzu, kigele vavusanizye vulamba,

¹²kigele vose vayangulwe, hovene vakayisanizizye hanayene, alisi vavutogagwa wigomu.

¹³Alisi yilitudima kumulumbila Mulungu hanahana kunguno yinwe, inwe vadugu vatoneke va Guku, kunguno Mulungu wamusogolaga inwe kufuma mbuki hakupiziwa mugati na kusondohiwa na Roho na kuyisanizya hanayene.

¹⁴Ku yeniyi uyo wamwitanaga inwe ku Mhola ya Chelu yatanizivilwe niswe, kigele mugade lukumo lwamwa Guku Yesu Kristo.

¹⁵Haho, vadugu, mujame kijamu na mugadime mavuhembeki genayo mwahembekilwe, ninga ku mulomo ninga mu barua yiswe.

¹⁶Alisi Uyu mwenekili, Guku wiswe Yesu Kristo, na Mulungu Vava, homwene watutogagwa, na mugati na kisa watupaga ihulicho lya hanahana na isigizyo isoga,

¹⁷ayihuliche myoyo yinwe, na amujamilizye inwe mu kila mulimo na muhayo musoga.