Read Nyamwezi 2 Vatesalonike 3 Bible Online

2 Vatesalonike 3 - Nyamwezi bible

2 Vatesalonike 3

¹Haho, vadugu, mutulombele, kigele Muhayo gwamwa Guku gusambale na gukumukiwe kitisi hawinwe,

²na tukomolwe ku vanhu va nhagila na vavi; kwisi isanizyo likavile lya vose.

³Alisi Guku ali mujamu, homwene akumujamilizya na kumulindila inwe hambele na kavi.

⁴Na mugati na Guku tuli na isanizyo lyenili kuwinwe ati, mulita na mukwita gose genayo tulimulagila inwe.

⁵Guku amulondole inwe ku kutogwa kwa Mulungu na ku vujamu wamwa Kristo.

⁶Alisi tulimulagila inwe vadugu mu lina lyamwa Guku wiswe Yesu Kristo, mwisunde inwe venekili ku kila mudugu, homwene alisimiza na nhagila na ngʼo kitisi yiligelanila na vuhembeki wenuvo mwapivagwa niswe. Inwe venekili mulimanicha kitisi yilimudima kutulonda iswe.

⁷Kwisi tukasimizile mugati ninwe na

⁸nhagila, na tukalile chakulya cha umo cha gele, sumbwa havuziku na halimi twatumamaga na migangadiko, kwigela ngʼo tumutimbye ninga umo mugati ninwe.

⁹Tukitile syenisyo kunguno yikatudimile kugwasiwa, alisi twakovaga mugati niswe venekili kumupa inwe

¹⁰lumeho, kigele mutulonde. Aho twavagiho hawinwe twamulagilaga ati, ulu umo alilema kutumama, mwenuyo aleke kupiwa chakulya.

¹¹Kwisi tuligwa ati vamo mugati ninwe valisimiza na nhagila na vakavile kutumama, sumbwa valiyumbayumba mu vuhuganu.

¹²Vanhu va mutindo gwenugu tulivalagila mugati na Guku ati, vatumame sele na valye chakulya chavo venekili.

¹³Alisi inwe vadugu muleke kuzova kwita tusoga.

¹⁴Alisi ulu umo akavile kugudonhoka muhayo gwiswe gwa mu barua yeniyi, mumwikomye mwenuyu, na muleke kuvi na lusangi nawe, kigele apiwe nsoni.

¹⁵Alisi muleke kumulola kitisi mwanisi, sumbwa mumuhane kitisi mudugu.

¹⁶Alisi Uyu mwenekili, Guku wa kuhola, amupe inwe kuhola hanahana mu nzila zyose. Guku ave hamohene ninwe vose.

¹⁷Lugisi na kukono kwane nene Paulo mwenekili, holwene luli lumeho mu kila barua ati wenuvu vuli vutone wane.

¹⁸Kisa chamwa Guku wiswe Yesu Kristo kiveho hamohene ninwe vose.