Read Nyamwezi 1 Timoteo 1 Bible Online

1 Timoteo 1 - Nyamwezi bible

1 Timoteo 1

¹Paulo, Mutume wamwa Kristo Yesu, kunguno ya mukumo gwa Mulungu, Mupizya wiswe, na gwamwa Kristo Yesu, homwene ali isigizyo liswe, kumwa Timoteo, mwana wane wa lole mugati nʼisanizyo.

²Kisa na kigongo na kuhola hokwene kulifuma kumwa Mulungu Vava na Kristo Yesu, Guku wiswe.

³Aho najaga ku Makedonia nakulagila veve kwikala mu Efeso, kigele uvalagile vanhu vamo valeke kuhembeka vuhembeki vugeni,

⁴ninga ngʼo kudimana na migani na mwilondo gwa migani hogwene gukavile na mhelo, sumbwa gulileta malwanilo duhu muno kukila kuvujamilizya vukasika wa Mulungu mugati nʼisanizyo.

⁵Alisi mheleleko ya mukumo kuli kutogwa kwa moyo musondo na kwa moyo gwa pe na kwa isanizyo lya lole.

⁶Vamo visundaga venekili ku genaya na vayisyokelaga mihayo ya gele,

⁷na valikova kuvi vahembeki va ngʼhama vuduhu kumanicha yeniyi valiyomba ninga ngʼo genayo valiyomba na nguzu.

⁸Alisi tulimanicha ati ngʼhama yili nsoga, ulu munhu aliyitumila kitisi

⁹yiligelanila na ngʼhama, na amanikizye ati ngʼhama yikakindikilwe kunguno ya munhu mugololoku, sumbwa kunguno ya vagome, va nhani, vigomu, vakenaguzi, va nsembo mbi, vʼivengwe, ku venavo valivakenagulila vansavo na vaninavo,

¹⁰ku vavulagi na vayanzani, ku vanhu hovene valikikenagula kitundilwe chavo, ku vasampa vanhu na valamba, ku avo valilahila cha vulamba, na gose genayo gangi hogene galivugomesya vuhembeki wa kapanga,

¹¹kitisi yilihembekwa na Mhola ya Chelu ya lukumo ya Mulungu wiswe mugongolwa, hoyene yapanagwa kuwane.

¹²Ndimulumbila Kristo Yesu Guku wiswe homwene wampaga nguzu, kunguno wambonaga kuvi mujamu na

¹³wampaga vukumba, nulu navage mufusani na muduchi na mupinehezya, alisi navonelagwa kisa, kwisi nayitaga yeniyi vuduhu kumanicha mugati nʼivengwe.

¹⁴Ahene, kisa cha Guku wiswe chakwilile munogwene hamohene na isanizyo na kutogwa mugati na Kristo Yesu.

¹⁵Muhayo ugu guli gwa lole na gulidimwa kuzumiliziwa ati, Kristo Yesu wizaga henaha mu liwelelo kuvapizya vakenaguzi mugati navo ndi wa mbele.

¹⁶Alisi kunguno yeniyi navonelagwa kisa, kigele Yesu Kristo avufumbule vulembezu wakwe vose hawane nene wa mbele kuvi lumeho ku venavo vakumusanizya haho ku vuzuvuku wa hanahana.

¹⁷Alisi Mutemi wa hanahana homwene akakovolile kuzimanguka, ninga kuvonwa ngʼo, homwene ali Mulungu inene, apiwe isima na lukumo kusika myaka na myaka de.

¹⁸Mwana wane Timoteo, kunguno ya mihayo iyo yafumbulilwe kwigulya naʼho kale ndikulagila mukumo

¹⁹gwenugu: ulasane vulasani vusoga mugati nʼisanizyo na moyo gwa pe, hogene vamo vagasindikaga hawavo

²⁰na vavuvelagulaga wato wa isanizyo, mugati navo valiho Himenayo na Aleksandro, hovene namutavulilaga Shetani vahembekwe kuleka kufusana.