Read Nyamwezi 1 Timoteo 2 Bible Online

1 Timoteo 2 - Nyamwezi bible

1 Timoteo 2

¹Hambele na mbele ndimuhana inwe: mulombe na mwigongele na mulombele na mulumbile kunguno ya

²vanhu vose, ku vatemi na vahanya vose, kigele twikale sele na vudekanu mugati na kumogoha Mulungu

³na mugati nʼikuzyo. Kwisi yeniyi yili sisoga na yilimutogezya Mulungu Mupizya wiswe,

⁴homwene alikova vanhu vose vapiziwe na vapiwe kuyimanicha hanayene.

⁵Kwisi Mulungu ali umo, na Muswanya ali umo mugati na Mulungu na vanhu,

⁶munhu Kristo Yesu, homwene wipanaga mwenekili kuvi vukomozi ku vose howene vukusangilwa mwitungo lyakwe,

⁷na ku wenuvo nene natulilwe kuvi mutanizya na Mutume (ndiyomba lole nkavile kuyomba vulamba) na muhembeki wa ku vapagani mugati nʼisanizyo na hanayene.

⁸Ndikova ati vagosya, henaho hose valilomba, vagagungumule makono masondo vuduhu kisila na lwanilo.

⁹Na sisyo sisyene vakima vazwale kizwalo hochene kilisika hʼisima mugati na wivembu, ngʼo mugati na vusuke wa nzwili na dhahabu na mavusalu na fizwalo

¹⁰filambu mupango, sumbwa kitisi yilivadima vakima hovene valizumilizya kumogoha Mulungu mugati na milimo misoga.

¹¹Yilimudima mukima kuhembekwa

¹²mugati na vudekanu na vudonhoki vose; alisi nkavile kuzumya mukima ave muhembeki ninga ngʼo kumutema mugosi,

¹³sumbwa ikale sele. Adamu watundagwa hambele,

¹⁴na haho Eva. Na Adamu akayengilwe, sumbwa mukima wayengagwa na wagwaga mu vukenaguzi,

¹⁵alisi akupiziwa mugati na vuvyazi wakwe, ulu valijama mugati nʼisanizyo na kutogwa na vusondo na wivembu.