Read Nyamwezi 1 Timoteo 6 Bible Online

1 Timoteo 6 - Nyamwezi bible

1 Timoteo 6

¹Vose hovene valimo mu vutungwa wa vusese vavakuzye vansavo vuzya na isima lyose, kwigela ngʼo lina lya Mulungu na vuhembeki vufuswe.

²Alisi avo vali navo vansavo vuzya vasanizya valeke kuvavengelezya kunguno vali vadugu, sumbwa vavatumamile munogwene, kunguno venavo valipiwa vusulu navo vali vasanizya na vatoneke. Uvahembeke na kuvahana mihayo iyi.

³Ulu umo alihembeka vuhembeki vungi na akadimanile na mihayo ya kapanga yamwa Guku wiswe Yesu Kristo na vuhembeki wenuvo vuligelanila na kumogoha Mulungu,

⁴aliwigagambazya mwenekili nulu akamanikizye kinhu, na alitamanilwa kuvi na mamihayo na malwanilo hogene galileta ivuva, matongano, mafusano,

⁵malome mavi, na malwanilo hanahana mugati na vanhu hovene vavipizye masala na vayipuvile hanayene, kwisi valiganika ati kumogoha Mulungu yili nzila ya kugada vusulu.

⁶Kumogoha Mulungu kuli na

⁷vusulu, ulu tulikidehela icho tuli nacho. Kwisi tukizanile kinhu henaha mu liwelelo, na yiligela ha pe ati tukakovolile kukijana kinhu kufuma ku liwelelo,

⁸Alisi ulu tuli na filiwa na fizwalo, haho tufidehele na kwiguta na fyenifi.

⁹Alisi venavo valikova kuvi vasavi, valingila mu mahumbiko na mitego na mawivonya mingi mahumbu na mavi hogene galivanwivizya vanhu mugati na vuzimanguke na vuzimile.

¹⁰Kwisi ihuhu lya nsavo lili muzi gwa tuvi tose, na mugati na kuzitamanilwa nsavo vamo vatagikile kufuma kwisanizyo, na vichimagulaga venekili na mavusungu mingi.

¹¹Alisi veve, munhu wa Mulungu, ugapele genaya, sumbwa uvulonde vugololoku na kumogoha Mulungu na isanizyo na kutogwa na vujamu na vudekanu, ulasanage vulasani vusoga wʼisanizyo,

¹²uvudime vuzuvuku wa hanahana ku wenuvo witanilweho, na walizumilizaja izumilizyo isoga hambele na vasangilwaho vingi.

¹³Ndikulagila veve hambele na vusyu wa Mulungu, homwene alifipa finhu fyose vuzuvuku, na hambele na Kristo Yesu, homwene wamuzumilizaja izumilizyo

¹⁴isoga hambele na Pontio Pilato, ugulindile mukumo vuduhu mabado na kimelo kusika vufumbuke wamwa

¹⁵Guku wiswe Yesu Kristo, howene akuvufumbula mwitungo lyakwe uyo Mwelukilwa na wa nguzu inene,

¹⁶Mutemi wa vatemi, Guku wa vaguku, uyo homwene inene akafwaga, na homwene alikala mu lumole holwene lukakovolilwe kwegelwa, homwene kuduhu munhu wamuwine, hangi akakovolile kumuvona, homwene apiwe isima na vukovozi wa hanahana. Amen.

¹⁷Uvalagile avo vali vasavi mu liwelelo lya lelo valeke kwikulilizya venekili ninga kuwisigizya vusavi wenuvo vukavile kujama, sumbwa Mulungu homwene alitupa tose twa kwiguta na masese;

¹⁸vavezye tusoga, na vave vasavi mugati na milimo misoga, na vave tayari kupana na kuvi va kisa;

¹⁹na syenisyo visumbizye kiviko kive musingi musoga mu nsiku zya kumbele, kigele vavugade vuzuvuku wa loleyene.

²⁰Timoteo, ugalindile genayo wapivagwa; wisunde ku mihayo iyo ya vufwafwa na ya gele na malwanilo, hogene galifuma ku vumaniche wenuvo howene vuli wa vulamba,

²¹howene vamo vavuzumilizaja na vingikaga mwisanizyo Kisa kiveho hamohene ninwe.