Read Nyamwezi Tito 1 Bible Online

Tito 1 - Nyamwezi bible

Tito 1

¹Paulo, mukumba wa Mulungu na Mutume wamwa Yesu Kristo, kigele vasogolwa va Mulungu vapiwe isanizyo na kuyimanicha hanayene kunguno ya kumogoha Mulungu,

²mugati nʼisigizyo lya vuzuvuku, howene Mulungu, homwene akayombaga vulamba, walaganaja kufuma myaka de,

³na wagufumbulaga muhayo gwakwe mwitungo lyakwe mugati na mhola hoyene napivagwa ku mukumo gwa Mulungu, Mupizya wiswe, kumwa Tito,

⁴mwana wane wa lole mugati na lusangi lwa isanizyo limo. Kisa na kuhola hokwene kulifuma kumwa Mulungu Vava na Kristo Yesu Mupizya wiswe.

⁵Kunguno yeniyi nakulekaga mu Kreta kigele ugagelanizye genayo gasigalaga, na kutula vanamhala mu

⁶makaya gose isyo nakulagilaga: ulu umo ali vuduhu kimelo, mugosya wa mukima umo, nawe ali na vana vasanizya hovene vakavulilwe vusimize vuvi na nhani.

⁷Kwisi yilimudima musimamizya, homwene ali kitisi kasika lufungulo wa Mulungu, ave vuduhu kimelo, aleke kwitogezya mwenekili, aleke kudimwa wangu na kisila, aleke kuvi mukozya na mwitwenya, na aleke

⁸kuvi mukova vusulu wa nsoni, sumbwa ave muzimani, atogwe kasoga, muvalaganu wa lole, mugololoku,

⁹mufula, mwilengu, mugosya homwene aligudima muhayo gwa lole gugelanilile na vuhembeki, kigele akovole kuvahana mugati na vuhembeki wa kapanga na savasava kuvakinda vagome.

¹⁰Kwisi valiho vagome vingi,

¹¹vayombi va mihayo ya gele na vayengani, hambele muno venavo va vutahiriwa; na yavadima kumumiwa milomo, kwisi valizilulunganya numba zimo mu kuhembeka genaya gakasikile kunguno ya kugada vusulu wa nsoni.

¹²Umo mugati navo, umo wa vafumbuzi vavo venekili, wayombaga, Vana Kreta vali valamba hanahana, ndimu mbi, vanhu vazovu; vusangilwaho wenuvu vuli wa lole.

¹³Kunguno yeniyi uvadakile

¹⁴munogwene, kigele vave vapanga mwisanizyo, na valeke kuyidima migani ya kiyahudi na mikumo ya vanhu hovene valiwisunda kufuma ku hanayene.

¹⁵Gose gali masondo ku vasondo, alisi kuduhu kinhu kisondo ku va zoma na vʼivengwe; kwisi isala lyavo na myoyo zyavo zyene zilavulaga.

¹⁶Valiyomba ati valimumanicha Mulungu, alisi valimwikana mu milimo yavo, vagayilizya na va nhani, na vakavelile ha milimo misoga.