Read Nyamwezi Tito 2 Bible Online

Tito 2 - Nyamwezi bible

Tito 2

¹Alisi veve ugayombe genayo galisika ha vuhembeki

²wa kapanga ati: vanamhala vilenge, vavalagane loleyene, vave vapanga mwisanizyo na mu kutogwa na mu vujamu.

³Na sisyo vagikulu vene kitisi yiligelanila valeke kutolana, valeke kuvi vakozya, sumbwa vavahembeke iyo yili misoga,

⁴kigele vavahembeke vakima hovene vatali vahala kuvatogwa vagosi vavo na vana vavo;

⁵vave vavalaganu va lole, vivembu, vasunge numba zyavo sisoga, vave vasoga na vitunye hansilili na vagosi vavo, kwigela ngʼo muhayo gwa Mulungu gufuswe.

⁶Uvahane sisyo savasava vasumba vavalagane loleyene.

⁷Na mugati na tose wiyoleche veve mwenekili kitisi isumbano mugati na milimo misoga, na mu vuhembeki uvoleche vose hanayene na isima,

⁸na kuyomba mihayo ya kapanga hoyene yikakovolilwe kuvulwa, kigele mukandi apiwe nsoni ulu akavile na muhayo muvi gwa kuyomba kwigulya niswe.

⁹Uvahane vasese vavadonhoke vansavo vuzya na kuvatogezya mugati na tose vuduhu kwiyanilizya na kwiva,

¹⁰sumbwa voleche vujamu vose vusoga, kigele vavukuzye vuhembeki wa Mulungu Mupizya wiswe mugati na milimo yose.

¹¹Kwisi kisa cha Mulungu kigelile ha kupiziwa kwa

¹²vanhu vose, na kilituhembeka kulikana ivengwe na mawivonya ga liwelelo, na kusimiza mugati na vuvalaganu na vugololoku na kumogona Mulungu mu liwelelo lya lelo,

¹³na kulilindila isanizyo lyelukilwana kufumbulwa kwa lukumo lwa Mulungu muhanya, na Mupizya wiswe Yesu Kristo,

¹⁴homwene wipanaga mwenekili, kigele atukomole kufuma wigomu vose, na igusile kuwakwe mwenekili va chalo chakwe hovene vali vagangadiku mu milimo misoga.

¹⁵Uyombe genaya na uvahane na kuvahilimila na vukovozi, kuduhu umo akuvengelezye.