Read Nyamwezi Tito 3 Bible Online

Tito 3 - Nyamwezi bible

Tito 3

¹Uvizukizye kwitunya hansilili na vahanya na va vukovozi na kuvadonhoka na kuvi tayari ku milimo

²yose misoga; valeke kumufusa munhu na valeke kutongana, sumbwa vave vadekanu na vavoleche vanhu vose vukondu.

³Kwisi kale iswe vene twavage vahumbu na vʼivengwe na twapuvile nzila, vasese va mawivonya, na mavusengʼhya ga mitindo mingi, twasimizage mu kayaya na ivuva, twagayagwe na twigayage hamohene.

⁴Alisi aho kisa cha Mulungu Mupizya wiswe na kutogwa kwakwe ku vanhu kwafumbukaga,

⁵watupizaja, ngʼo kunguno ya milimo migololoku hoyene iswe twitaga, sumbwa kunguno ya kigongo chakwe mugati na kogiwa kwa kuvyalwa kupya na kufufulilwa

⁶vupya mugati na Roho Nsondo, hoyene wayimwagaga na masese kwigulya niswe mugati na Yesu Kristo,

⁷Mupizya wiswe, kigele iswe twapizivilwe cha kisa tuve mugati na isigizyo vasaliki va vuzuvuku wa hanahana.

⁸Muhayo ugu guli gwa lole, na ndikova ugujamilizye muno mugati navo, kigele venavo valimusanizya Mulungu vagangadike kutumama milimo misoga. Milimo yeniyi yili misoga na yilivavelela vanhu.

⁹Alisi wisunde ku malwanilo mahumbu na migani ya mwilondo gwa migana na vutongani na mawiyanilizya kunguno ya ngʼhama, hogene gakavile na vusulu na gali ga gele.

¹⁰Umwikane munhu mululunganya, ulu wamuhanaga kamo ninga kavili,

¹¹kunguno ulimanicha ati mwenuyu ali muzimile na mukenaguzi witemile mwenekili kitanga.

¹²Ulu namutumizya kuwako Artema ninga Tikiko, haho ugangadike kufika kuwane mu Nikapoli, kwisi kwenuko ndikova kwikala mwitungo lyambeho.

¹³Zena, mumanicha ngʼhama, na Apolo, uvafililizye mu nzila sisoga, valeke kugayiwa kinhu.

¹⁴Alisi vanhu viswe vene vahembekwe kutumama milimo misoga henaho yilifundwa, valeke kwikala vuduhu fisumo.

¹⁵Vose hovene vali hawane valikugisya. Uvagisye avo vatutogilwe mugati nʼisanizyo. Kisa kive hamohene ninwe vose.