Read Nyamwezi Filemoni 1 Bible Online

Filemoni 1 - Nyamwezi bible

Filemoni 1

¹Paulo, mutungwa wamwa Kristo Yesu, na Timoteo mudugu, kumwa Filemoni, mutoneke na mutumami

²mwigisu, na kumwa Apia, ilumbu liswe, na Arkipo, mulasani mwigisu, na ku ivilingano lya munumba yako.

³Kisa kiveho hamohene ninwe na kuhola hokwene kulifuma kumwa Mulungu Vava na Guku Yesu Kristo.

⁴Ndimulumbila Mulungu wane hanahana ulu ndikwizukila veve mu kulomba kwane,

⁵kunguno ndigwa mhola ya kutogwa kwako na isanizyo lyako kumwa

⁶Guku Yesu na ku vasondo vose, kigele lusangi lwako mwisanizyo luvezye inwe mumaniche gose genaya masoga muwinwe kumwa Kristo.

⁷Kwisi nene napivagwa kudeha kuhanya na ihulicho kunguno ya kutogwa kwako, kwisi myoyo ya vasondo yahulikivagwa naʼho mudugu.

⁸Kunguno yeniyi, nulu ndi navo vugimu mugati na Kristo kukulagila veve genaya galikudima, ndikulomba

⁹duhu kunguno ya kutogwa, isyo ndiho Paulo munamhala na savasava mutungwa wamwa Kristo Yesu.

¹⁰Ndikulomba kunguno ya mwana wane homwene namuvyalaga mugati na minyololo,

¹¹Onesimo, homwene kale akakuvelelile, alisi lelo akuvelele veve, nane mwene.

¹²Ndimusyocha kuwako, homwene ali kitisi moyo gwane.

¹³Natogwa kudimana nawe, kigele uyu ha lwande lwako antumamile mu vutungwa wane kunguno ya Mhola ya Chelu.

¹⁴Alisi vuduhu kuzumya kwako nkatogilwe kuvezya kinhu, kwigela ngʼo kisa chako

¹⁵kive cha kukungiliziwa, sumbwa cha kutogwa. Kwisi hamo wasundagwa kuwako katungo kado, kigele umupiwe hangi ave wako wa hanahana,

¹⁶alisi ngʼo hangi kitisi musese, sumbwa kukila musese, kitisi mudugu mutoneke, muno kuwane, alisi kingi munogwene kuwako ha muvili na mugati na Kristo.

¹⁷Haho, ulu ulindola nene kitisi mwiyo, umwanukule kitisi nene

¹⁸Ulu wakukenagulilaga kinhu, ninga alitondwa musango kuwako, cheniki untonde nene.

¹⁹Nene, Paulo, nditona na kukono kwane mwenekili, nene nkulipa. Nene nkahayile kuyomba ati veve mwenekili uli na musango kuwane.

²⁰Ahene, mudugu, nditogwa kupiwa vusulu naʼho mugati na Guku, uguhuliche moyo gwane mugati na Kristo.

²¹Mugati na kuwisigizya vusondo wako ndikutonela veve, na ndimanicha ati ukuvezya kukila icho ndiyomba.

²²Hangi umbezezye hakwikala, kwisi ndisigizya ati kunguno ya kulombela kwinwe nkusyokeziwa kuwinwe.

²³Epafra, mutungwa mwichane mugati na Kristo

²⁴Yesu, na Marko na Aristarko na Demasi na Lukasi,

²⁵vatumami vichane, valikugisya. Kisa cha Guku wiswe Yesu Kristo kiveho hamohene na roho yinwe.