Read Nyamwezi Vahebrayo 1 Bible Online

Vahebrayo 1 - Nyamwezi bible

Vahebrayo 1

¹Ha kale Mulungu wayombaga kingikingi na ku mitindo mingi na vansiswe mugati na vafumbuzi,

²ha mhelo ya nsiku zyenizi wayombaga niswe mugati na Mwana wakwe, homwene wamutulaga ave Musaliki wa gose, na mugati nawe walitundaga liwelelo.

³Homwenuyu ali mwanga gwa lukumo lwakwe, na isumbano lya musimo gwakwe vuliko, nawe aligalindila gose ku muhayo gwa vukovozi wakwe. Aho waliwapyagula mavukenaguzi, wikalaga ha mulila gwa Mutemi wa higulya;

⁴wavile mukumuku muno kukila vamalaika, kwisi wasa likile lina ikumuku muno kukila lina lyavo.

⁵Kwisi wamuwilaga nani mugati na vamalaika, ninga lusiku lumo, Veve Mwana wane, Nakuvyalaga walelo? na hangi, Nene nkuvi Vava wakwe, nawe akuvi Mwana wane?

⁶Aho wamuletaga hangi Muvyalwa wa mbele mu liwelelo wahaya, Yavadima vamalaika vose vamukuvile.

⁷Na kunguno ya vamalaika wahaya, Alivavezya vamalaika vakwe vave mamuyaga, Na vakumba vakwe vave ndimi zya moto;

⁸alisi kunguno ya Mwana wakwe, Isumbi lyako, Mulungu, lili lya myaka na myaka de; Na mulanga gwa vugolozi guli mulanga gwa vutemi wako,

⁹Veve watogagwa vugololoku, na wagayaga wigomu, Kunguno yeniyi Mulungu, Mulungu wako, Wakuvilaga na maguta ga kudeha kukila viyo.

¹⁰Na hangi, Veve Guku, ha mbuki wagutulaga musingi gwa nsi, Nago malunde vuli vutumami wa makono gako.

¹¹Genayo gakusila; alisi veve ukuviho; Nago gose gakusakala kitisi mwenda;

¹²Ahene kitisi kizwalo ukugazinga, nago gakugaluka kitisi mwenda; Alisi veve uli mwenuyu mwene, Na myaka yako yikavile kumala.

¹³Alisi wamuwilaga nani mugati na vamalaika, ninga lusiku lumo, Wikale ha mulila gwane, Kusika navatulaga vanisi vako hansilili na magulu gako?

¹⁴Venavo vose zikavile roho zya kutumama, valitumwa kigele vavatumamile venavo vakusalika vupizya?