Read Nyamwezi Vahebrayo 11 Bible Online

Vahebrayo 11 - Nyamwezi bible

Vahebrayo 11

¹Lelo isanizyo lili isigizyo lya ku genaya tuligalindila, na kugazumya hogene gakavile kuvonwa.

²Kwisi mugati nalyo va kale vavagi navo vusangilwa.

³Kwisanizyo tulimanicha ati liwelelo lyatundilwe ku Muhayo gwa Mulungu, sisyo genaya galivonwa gakavezivilwe na genayo galigela ha pe.

⁴Kwisanizyo Abele wamufumizizye Mulungu kitambo kisoga kukila chamwa Kaini, na ku chenicho wapivagwa vusangilwa ati wavagi mugololoku, kwisi Mulungu watogezivilwe na fipanwa fyakwe, na mugati nʼisanizyo lyakwe atali

⁵aliyomba, nulu wafwaga. Kwisanizyo Enok wajanagwa, ngena aluvone lufu; na akigelile kwisi Mulungu wamujanaga; kwisi hambele na kujanwa kwakwe wali wapiwa vusangilwa ati wamutogezaja Mulungu.

⁶Alisi vuduhu isanizyo kigaka kumutogezya Mulungu; kwisi homwene alimwegela Mulungu yilimudima kusanizya ati aliho, na alivasyokezya venavo hovene valimukova.

⁷Kwisanizyo Noa, aho waliwolekiwa na Mulungu kunguno ya genayo gavagi gatali kwigela, mu kumogoha Mulungu, wavezaja lyato lya kuvapizya va munumba yakwe. Mugati nalyo waliyangulaga liwelelo, na wa vile musaliki wa vugololoku kwisanizyo.

⁸Kwisanizyo Abrahamu, aho witanagwa, wadonhokaga kuja na kusamila hanhu hohene akuhanukula kitisi isalo, nawe wafumaga vuduhu kumanicha uko ajile.

⁹Kwisanizyo wavagi mugeni mu nsi yʼilagano, kitisi mu chalo kigeni, na wikala mu mahema hamohene na Isaka na Yakobo,

¹⁰vasaliki viye vʼilagano lyenili lyene. Kwisi wayilindilaga kaya ya musingi mujamu hoyene muzengi na muvezya wayo ali Mulungu.

¹¹Kwisanizyo Sara nawe wapivagwa nguzu kuvi na nda, nulu waliwavita itungo lyakwe, kwisi wamwiganikaga uyo mujamu homwene wamulaganaja.

¹²Kunguno yeniyi vavyalagwa na munhu umo, nawe wavagi kitisi wafwile, wingi wavo kitisi masonda gʼilunde, na kitisi musenga gwa ha nguka ya nyanza gukakovolilwe kusoloziwa.

¹³Vose venavo vafwaga mwisanizyo, vuduhu kugasikila malagano, sumbwa vagawine gatali kule na vagadehelaga, na vazumizye ati vavagi vageni na vakwavi mu liwelelo.

¹⁴Kwisi avo valiyomba syenisyo valifumbula ati valiyikova nsi ya muzengo.

¹⁵Na ulu mbe vayikumbulaga hoyene vayifumile, mbe vakovolaga kuyi syokela.

¹⁶Alisi lelo vayitamanilwa nsoga muno, hoyene mwilunde, kunguno yeniyi Mulungu akawine nsoni kuwavo itanwe Mulungu wavo, kwisi wavavezezaja kaya.

¹⁷Kwisanizyo Abrahamu, aho wagemagwa, wamufumaja Isaka ave kitambo; ahene, wamufumaja mwana wakwe umo inene, homwene walyanukulaga ilagano.

¹⁸Nawe wawilagwa, Mugati na Isaka mugana gwako gukwitanwa na lina lyako.

¹⁹Kwisi wamanikaja ati Mulungu wakovola kumuhembucha ku vafwile vene; kufumako wamwanukulaga hangi kitisi mukolani.

²⁰Kwisanizyo Isaka wavadosaja Yakobo na Esau ku genayo galakiza.

²¹Kwisanizyo Yakobo mwitungo lya kufwa, wamudosaja kila umo wa vana vamwa Yosefu, na walombaga egamilile ku nsoto ya mulanga gwakwe.

²²Kwisanizyo Yosefu, ha mhelo ya nsiku zyakwe, wakanaja kusama kwa vana vʼIsraeli, na walagilaga kunguno ya maguha gakwe.

²³Kwisanizyo Mose, aho wavyalagwa, wavisagwa myezi idatu na vavyazi vakwe, kwisi vavonaga ati mwana ali mulenzi, navo vakogohile mukumo gwa mutemi.

²⁴Kwisanizyo Mose, aho wakulaga, wakanaga kwitanwa mwana wamwa WaFarao;

²⁵na walahaga kuvonelwa vuvi hamohene na vanhu va Mulungu kukila kuvudehela vusoga wa vukenaguzi mwitungo ido.

²⁶Kwisi wiganikaga ati kufusanwa kwamwa Kristo vusavi vuhanya kukila nsavo zya mu Misri;

²⁷kwisi walolaga kumbele ku vusyokeziwa, Kwisanizyo wafumaga Misri, vuduhu kuchogoha kisila cha mutemi; kwisi wajamaga kitisi wamuvonaga uyo homwene akavile kwigela.

²⁸Kwisanizyo wayivezaja Pasaka na kuvilwa kwa magazi, ngena muvulagi wa vuvyalwa wa mbele avakumye.

²⁹Kwisanizyo vayivukaga Nyanza ya Sham kitisi nsi nkalamuku; alisi Vamisri vanwivizivagwamo aho vagemaga.

³⁰Kwisanizyo malugutu ga Yeriko gagwaga, galigapilimwa nsiku mpungati.

³¹Kwisanizyo Rahaba mulava akazimilile hamohene na venavo vakadonhokile, kwisi wavanukulaga vasulansi na kuhola.

³²Nayombeki hangi? kwisi nkugayiwa itungo, ulu nayombe kunguno yamwa Gideoni, na Baraka, na Samson, na Yefta, na Davidi, na Samweli, na vafumbuzi,

³³hovene kwisanizyo vagakindaga mavutemi, na vatemaga mugati na vugololoku, vasikilaga malagano, vayimumaja milomo ya masimba,

³⁴vazimaja nguzu zya moto, vipizaja ku vugi wa lupanga, hanuma na vusakale vapivagwa hangi nguzu, vavagi va nguzu mu

³⁵vulugu, vagapezaja mavuto ga vageni. Vakima vapivagwa vafwile vavo hangi mugati na kuhembuka. Vangi vadukivagwa vuduhu kuzumya kukomolwa, kigele vasikilile vuhembuke vusoga muno.

³⁶Vangi vadukaga kuyeywa na kutulagulwa milanga na kufungwa na kutulwa mu jela.

³⁷Vatulagulagwa mawe, vatandulagwa na musumeno, vagemagwa, vavulagagwa na lupanga; vazwalaga ndili zya ngʼholo na ndili zya mbuli, vagayivagwa mafundo, vadukaga mamikosi na tuvi.

³⁸Venavo liwelelo lyavagi likasikile isima kuvi navo, vayumbayumbaga mu mabalangu na malugulu na mapilinga na makandilo ga mu nsi.

³⁹Na vose venava nulu vavagi navo vusangilwa wʼisanizyo lyavo,

⁴⁰vakalisikilile ilagano; kwisi Mulungu waliwatutulila kasoga muno, valeke kukomeziwa vuduhu niswe.