Read Nyamwezi Vahebrayo 4 Bible Online

Vahebrayo 4 - Nyamwezi bible

Vahebrayo 4

¹Lelo litali liliho ilagano lya kwingila mu wisuhizyo wakwe, kunguno yeniyi togohe, ngena umo kuwinwe igele kitisi walipuvile.

²Kwisi niswe twatanizivilwe, mhola nsoga kitisi avo; alisi muhayo gwadegelekagwa, gwaligukavapile vusulu, kunguno gwaligukasalinhanile

³nʼisanizyo lya venavo hovene vagwigagwe. Kwisi iswe hovene twasanizizye tulingila mu wisuhizyo, kitisi waliwayomba, Nalahilaga mu kisila chane, vakuleka kwingila mu wisuhizyo wane, nulu mavutumami gamalilile kufuma kutundwa kwa liwelelo.

⁴Kwisi wayombile hambati kunguno ya lusiku lwa mpungati giki, Mulungu wisuhaja ha lusiku lwa mpungati ku mavutumami gakwe gose; na hangi,

⁵Vakuleka kwingila mu wisuhizyo wane.

⁶Lelo kunguno vatali valiho hovene vakwingila mugati navo, navo hovene vatanizivagwa hambele mhola

⁷nsoga valekaga kwingila kunguno vakadonhokile, wakindikaga hangi lusiku lumbati, wayombile mugati na Davidi hanuma na myaka mingi, Walelo, kitisi yayombilwe hambele, Walelo, ulu muligwigwa muzwi gwakwe, Muleke kuzilendelezya myoyo zinwe.

⁸Kwisi ulu Yoswa waliwavapile wisuhizyo, mbe akayo mbile kunguno ya lusiku lungi haho.

⁹Kunguno yeniyi vutali vuliho wisuhizyo ku vanhu va Mulungu.

¹⁰Kwisi homwene wingilile mu wisuhizyo wakwe, nawe wisuhaja ku mavutumami gakwe kitisi Mulungu ku mavutumami gakwe.

¹¹Kunguno yeniyi tugangadike kwingila mu wisuhizyo wenuvo, ngena ninga umo agwe mu vutazi wa mutindo gwa venavo.

¹²Kwisi muhayo gwa Mulungu guli muzuvuku, guli na nguzu, na guli mugi kukila lupanga lwa mavugi kuvili, nago gulidula kusika gulilekanya moyo na roho, filungizye na musamba, na guliyangula miga niko na malome ga moyo.

¹³Kuduhu kitundwa hochene kikavile welekela hawakwe, sumbwa finhu fyose fili zule na fyakumbulilwe ha minso gakwe, homwene tulitondwa nawe.

¹⁴Lelo, kunguno tuli nawe Muhozya Muhanya homwene wagadulaga malunde, Yesu, Mwana wa Mulungu, tulidime izumilizyo liswe.

¹⁵Kwisi tukavile nawe Muhozya Muhanya homwene akavile na lusungu ku mavusakale giswe; sumbwa umo homwene wagemagwa mu

¹⁶gose kitisi iswe, vuduhu vukenaguzi. Kunguno yeniyi tulyegele isumbi lya kisa mugati na vugimu, kigele tuvonelwe kigongo na kisa cha kutugwasya mwitungo lya mafundo.