Read Nyamwezi Yakobo 4 Bible Online

Yakobo 4 - Nyamwezi bible

Yakobo 4

¹Mavulugu na matongano hogene galimo mugati ninwe galifuma kuhe? Nguno yago yikavile yeniyi ati, mavutamanilwa ginwe galitongana mu fivalango finwe?

²Mulitamanilwa na mukavile nacho; mulivulaga na mulivuvila na mukavile kupiwa; mulitongana na mulilasana na mukavile na kinhu, kunguno mukavile kulomba.

³Mulilomba na mukavile kupiwa, kunguno mulilomba sivi, kigele mugasesagule mugati na mavutamanilwa ginwe.

⁴Inwe vʼivengwe, mukamanikizye ati vunwani wa liwelelo vuli wanisi hamwa Mulungu? Kunguno yeniyi homwene alikova kuvi munwani wa liwelelo, akuvi mwanisi wa Mulungu.

⁵Ninga muliganika ati muhayo gwa vutone guli gwa gele, Mugati nʼivuva aliyikumbula Roho yeniyo yilikala muwiswe; alisi hangi alitupa kisa kihanya munogwene.

⁶Kunguno yeniyi vutone vulihaya, Mulungu alivapinga va myete, alisi vadekanu alivapa kisa.

⁷Kunguno yeniyi mwitunye hansilili na Mulungu, alisi mumwisigite Shetani, haho akumupela inwe.

⁸Mumwegele Mulungu, nawe akumwegela inwe. Mwikalave makono ginwe inwe vakenaguzi, na muyisondohye myoyo yinwe inwe va myoyo ivili.

⁹Musaye na musambe na mulile! Nseko zinwe zipiluke kuvi kililo, na kudeha kwinwe kuvi misayo.

¹⁰Mwidekanye hambele na Guku, haho akumukulilizya inwe.

¹¹Muleke kwilembekezya, vadugu; homwene alimulembekezya mwiye, ninga alimuyangula mwiye, aliyilembekezya ngʼhama, na aliyiyangula ngʼhama; alisi ulu uliyiyangula ngʼhama ukavile kuyimazya ngʼhama, sumbwa uli muyanguzi wayo.

¹²Mufumya ngʼhama na muyanguzi ali umo duhu, mwenuyu homwene alikovola kupizya na kuzimangucha; alisi veve uli nani homwene ulimuyangula mwiyo.

¹³Degelekagi inwe hovene muliyomba, Walelo ninga igolo tulaje ku kaya mbati ninga mbati na kwikalako

¹⁴mwaka gumo na kusuluzya na kusava, inwe hovene mukamanikizye icho kilakwile igolo; kwisi vupanga winwe vuli kuhe? Kwisi muli kitisi lyoki holyene liligela itungo ido duhu,

¹⁵na haho lilizimanguka. Sumbwa yilimudima kuyomba, Ulu Guku alikova na tuli na vupanga tukwita yeniyi ninga yiniyo.

¹⁶Alisi lelo muliwikumilizya inwe mugati na myete yinwe; kwikumilizya kose kwa mutindo gwenugu kuli kuvi.

¹⁷Kunguno yeniyi mwenuyu alimanicha kuvezya kasoga, alisi akavile kukavezya, mwenuyu alikenagula.