Read Nyamwezi 1 Petro 1 Bible Online

1 Petro 1 - Nyamwezi bible

1 Petro 1

¹Petro, Mutume wamwa Yesu Kristo, ku valovezi hovene valiko mu vusambale mu Ponto, Galatia, Kapadokia,

²Asia, Bitunia, mwasogolilwe na Mulungu Vava kunguno ya kumanicha kwakwe kufuma kale kusondohiwa mugati na Roho, kigele mudonhoke na muminzilwe na magazi gamwa Yesu Kristo. Kisa na kuhola kwingihe kuwinwe mugati na masese.

³Agongolwe Mulungu, Vava wamwa Guku wiswe Yesu Kristo, homwene ku kigongo chakwe kihanya watuvyalaga hangi tupiwe isigizyo lya vuzuvuku mugati na

⁴vuhembuke wamwa Yesu Kristo ku vafwile, tupiwe isalo holyene likakovolile kuzimanguka na kuvi na mako na kunyala, holyene mwatulililwe mwilunde;

⁵hovene ku nguzu zya Mulungu mulilindilwa mugati nʼisanizyo ku vupiziwa howene vuli tayari kufumbulwa mwitungo lya mhelo.

⁶Na mugati na wenuvu mulihalala, nulu inwe katungo kado, ulu yilifundwa, mulipiwa

⁷misayo mugati na magemelo ga mitindo mingi, kigele vujamu wa isanizyo linwe, holyene lili na mupango kukila dhahabu hoyene yilizimanguka, nulu yiligemwa mu moto, vuvonwe mugati nʼisanizyo na lukumo na isima ha kufumbulwa kwamwa Yesu Kristo, homwene

⁸mulimutogwa nulu mukamuwine, homwene mulimusanizya nulu mukavile kumuvona lelo, na mulimwihalala na kudeha hokwene kukakovolilwe kuyombwa, na kwa

⁹lukumo, henaho ulu mwayifikilaga mheleleko ya isanizyo linwe, vupiziwa wa myuye yinwe.

¹⁰Kunguno ya vupiziwa wenuvu vafumbuzi vikomekezaja na vagesaja, avo hovene vafumbulaga kunguno ya kisa cheniki hochene kikumufikila inwe,

¹¹vikomekezaja nanali, na itungo lya mutindo ki, Roho yamwa Kristo, hoyene yavagimo muwavo, yasonhelaga, aho yatongelaga kusangilwaho kunguno ya maluduko gamwa Kristo na lukumo ulo lukwiza hanuma.

¹²Na vafumbulililwe ati vakitumamilile venekili sumbwa vamutumamilaga inwe nago, hogene lelo gatanizivilwe kuwinwe na venavo hovene valimutanizya inwe Mhola ya Chelu mugati na Roho Nsondo hoyene yafumile kwilunde. Mihayo yeniyi vamalaika valitamanilwa kuyikomekezya.

¹³Kunguno yeniyi mwinyepe mikimbili ya isala linwe, muvalagane na mukisigizye vuliko kisa cheniki mukukipiwa ha kufumbulwa kwamwa Yesu Kristo.

¹⁴Kitisi vana va ludonho muleke kwilinganizya na mavutamanilwa ginwe ga mbele ga vulele winwe,

¹⁵alisi kitisi uyo Musondo homwene wamwitanaga, inwe vene muve vasondo mu kisimizile kinwe chose,

¹⁶kwisi yitonilwe, Inwe muve vasondo, kwisi nene ndi musondo.

¹⁷Na ulu mulimwitana mwenuyu Vava, homwene alimuyangula kila munhu vuduhu pendelea ku milimo yakwe, haho musimize mu kogoha nsiku zya kwikala kwinwe henaha mu vulovezi.

¹⁸Kwisi mumanikizye ati mukakomolilwe na finhu fizimanguku, kitisi fedha na dhahabu, ku kisimizile kinwe cha vuyagavuyaga hochene mwachanukulile ku vansinwe,

¹⁹sumbwa na magazi malambu mupango gamwa Kristo kitisi ga kadilana vuduhu kimelo na mafita.

²⁰Homwene wasogolilwe ku yeniyi aho liwelelo litali kutundwa, alisi wafumbulilwe ha mhelo ya nsiku zyenizi kunguno yinwe,

²¹hovene mugati nawe mulimusanizya Mulungu homwene wamuhembukaja ku vafwile na wamupaga lukumo, na syenisyo lelo isanizyo na isigizyo linwe lilimo mugati na Mulungu.

²²Kunguno mwayisondohaja myuye yinwe mugati na kuyidonhoka hanayene na kwitogwa hamohene, mwi togwe hamohene na moyo gose.

²³Kwisi mwavyalilwe hangi, ngʼo ku mbiyu yilizimanguka, sumbwa iyo yikavile kuzimanguka, ku muhayo gwa Mulungu, hogwene gulizuvuka na gulidilaho.

²⁴Kwisi, Kila muvili guli kitisi maswa, Na lukumo lwago kitisi mavulavu ga maswa; Maswa galinyala, na mavulavu galilagala, Alisi Muhayo gwa Guku gulidilaho kusika hanahana.

²⁵Nago guli muhayo hogwene gwatanizivilwe kuwinwe mugati na Mhola ya Chelu.