Read Nyamwezi 1 Petro 4 Bible Online

1 Petro 4 - Nyamwezi bible

1 Petro 4

¹Kunguno Kristo wadukaga ha muvili, inwe vene musagalile na isala lyenili, kwisi homwene wadukaga

²ha muvili walekanaga na vukenaguzi; kwigela ngʼo mu nsiku zyenizi zyasigalaga kwikala mu liwelelo mulende mu mavutamanilwa ga vanhu, sumbwa mu kikowa cha Mulungu.

³Kwisi yakwilaga mu matungo ago gavitile kugavezya genaya vapagani valikova, aho mwasimizage mugati na vusengʼhya, mavutamanilwa, kanwa na kalya, vukozya, vunwi na kufisenga fimbulimbuli hokwene kukagelanilile.

⁴Na kunguno mukavile kuyumba navo hangi mu vukenaguzi vuhanya valikumya na valimudukana inwe.

⁵Alisi vakuvuziwa na mwenuyu homwene ali tayari kuvayangula vazuvuku na vafwile.

⁶Kwisi kunguno yeniyi Mhola ya Chelu yatanizivilwe ku vafwile, kigele vayangulwe mu muvili ha mutindo gwa vanhu, alisi vazuvuke ha mutindo gwa Mulungu mu roho.

⁷Isilo lya finhu fyose lyegelile; kunguno yeniyi muvalagane na muve minso na mulombe.

⁸Na kukila gangi mwitogwe hamohene munogwene, kwisi kwitogwa kuligakumba mavukenaguzi mingi.

⁹Mwizimane hamohene vuduhu kwingʼungʼula.

¹⁰Mwitumamile hamohene, kila umo akitumile kipanwa chakwe kitisi vakasika lufungulo vasoga va fipanwa fya mitindo mingi fya Mulungu.

¹¹Ulu umo aliyomba, ayombe kitisi muhayo gwa Mulungu; ulu umo alitumama atumame na nguzu izyo wapivagwa na Mulungu, kigele Mulungu akumukiwe mugati na tose kunguno ya Yesu Kristo, homwene ali na lukumo na vukovozi kusika myaka na myaka de. Amen.

¹²Vatoneke, muleke kukumya kunguno ya mamikosi ago mwapile nago kunguno ya kugemwa, kitisi yamukwililaga inwe muhayo mugeni;

¹³alisi muli na lusangi na mavuduki gamwa Kristo, sisyo sisyene mudehe, kigele ha vufumbulwa wa lukumo lwakwe mudehe na mwihalale.

¹⁴Mwelukilwa inwe ulu mulifuswa kunguno ya lina lyamwa Kristo, kwisi Roho ya lukumo na ya Mulungu yilikala kwigulya ninwe.

¹⁵Kwisi kuduhu umo mugati ninwe adukiwe kitisi muvulagi, ninga mwivi, ninga mukenaguzi, ninga kitisi umo aliwiyingizya mu mihayo ya vangi.

¹⁶Alisi ulu aliduka kunguno ali Mukristo, haho aleke kusoniha, sumbwa amukumuche Mulungu kunguno ya lina lyenili.

¹⁷Kwisi itungo lyafikile vuyanguzi vuvukizizye ha numba ya Mulungu, na ulu vulivukizizya hawiswe, mhelo ya venavo hovene

¹⁸vakayidonhokile Mhola ya Chelu yikuvi kinahe? Na ulu kili kitimbu munogwene mugololoku apiziwe, haho yikuvi kinahe ku munhu wʼivengwe na mukenaguzi?

¹⁹Kunguno yeniyi venavo validukiwa hanuma na kikowa cha Mulungu, vamutavulilile Mutundi mujamu myuye zyavo, na vajame kuvezya tusoga.