Read Nyamwezi 2 Petro 1 Bible Online

2 Petro 1 - Nyamwezi bible

2 Petro 1

¹Simoni Petro, mukumba na Mtume wamwa Yesu Kristo, ku venavo vapivilwe kitisi iswe isanizyo ilambu mupango mugati na vugololoku wa Mulungu na Munizya wiswe Yesu Kristo.

²Kisa na kuhola kukwile kingi mugati na kumumanicha Mulungu na Guku wiswe Yesu.

³Nguzu zya Mulungu zyatupile iswe tose hotwene tulifunda ha vuzuvuku na ha kumogoha Mulungu mugati na kumumanicha mwenuyo watwitanaga ku lukumo lwakwe na vusoga wakwe.

⁴Na mugati nazyo watupile malagano mahanya na ga mupango muhanya, kigele mugati nago muve na lusangi lwa wikole wa Mulungu, ulu mulivupela vukenaguke howene vulimo mu liwelelo kunguno ya mawivonya.

⁵Na kunguno yeniyi mugangadike mugati nʼisanizyo linwe kolecha nsembo nsoga, na mu nsembo nsoga kolecha

⁶vumaniche, na mu vumaniche kolecha wilengu, na mu wilengu kolecha vulembezu, na mu vulembezu kolecha

⁷kumogoha Mulungu, na mu kumogoha Mulungu kolecha kuvatogwa vadugu, na mu kuvatogwa vadugu kolecha kutogwa.

⁸Kwisi ulu genaya galimo mugati ninwe na galikula, haho galimuhangilizya inwe kuvi vazovu na vuduhu fisumo mu kumumanicha Guku wiswe Yesu Kristo.

⁹Kwisi homwene ali gele genaya ali muhofu na ali na lwiti, na wavulavilile vuguswa wa mavukenaguzi gakwe ga kale.

¹⁰Kunguno yeniyi vadugu, mugangadike muno kukujamilizya kwitanwa na kusogolwa kwinwe, kwisi ulu mulita yeniyi mukuleka kwikumpa.

¹¹Kwisi syenisyo mukupiwa hakwingilila hagalihu mu vutemi wamwa Guku na Mupizya wiswe Yesu Kristo.

¹²Kunguno yeniyi nene kuleka ngʼo kumwizukizya inwe yeniyi, nulu muliyimanicha, na mwakindikilwe mu hanayene hoyene yiliho hawinwe.

¹³Alisi ndivona ati yili sisoga kumumisya na kumwizukizya inwe, aho ntali

¹⁴ndimo mwihema lyenili, kwisi ndimanicha ati kukomolelwa kwa ihema lyane kuliza wangu, isyo Guku wiswe Yesu Kristo wanfumbulilaga.

¹⁵Na nkugangadika savasava, kigele muyizukile yeniyi nsiku zyose hanuma na kugulala kwane.

¹⁶Kwisi tukayilondile migani yilingilwe na masala, aho twamupozezaja inwe nguzu na kwiza kwamwa Guku wiswe Yesu Kristo, sumbwa twavagi vasangilwaho va vuhanya wakwe.

¹⁷Kwisi uyu wapivagwa isima na lukumo na Mulungu Vava, aho muzwi gufumile ku lukumo luhanya gwafikaga ku matwi gakwe, Mwenuyu ali Mwana wane, mutoneke, homwene alintogezya.

¹⁸Na iswe twagwigilwe muzwi gwenugu kufuma kwilunde, aho twavagi hamohene nawe ku lugulu lusondo.

¹⁹Na hangi tuli nago muhayo gwa vufumbuzi gukindikilwe muno, na mwavezya sisoga, ulu muligudima kitisi lumole holwene lulela mu giti kusika hawangaluke na ihangaye liligela mu myoyo yinwe.

²⁰Na hambele muyimaniche yeniyi ati, mu vutone haduhu vufumbuzi howene vulikovolwa kulotolelwa kitisi munhu atogilwe.

²¹Kwisi kufuma kale kuduhu vufumbuzi waletagwa ku kikowa cha munhu, sumbwa vanhu vasondo va Mulungu vayombaga mugati na kusemeziwa na Roho Nsondo.