Read Nyamwezi 2 Petro 2 Bible Online

2 Petro 2 - Nyamwezi bible

2 Petro 2

¹Alisi vafumbuzi va vulamba vavagiho mugati na vanhu, kitisi vakuviho mugati ninwe vahembeki va vulamba, hovene vakwingizya mu lwiviso mavuhembeki ga vuzimile, na hangi vakumukana Guku homwene wavagulaga, na vakwiletela venekili wangu vuzimile.

²Na vingi vakugalonda mawivonya gavo, na

³kunguno yavo nzila ya hanayene yikufuswa; na mugati na ihuhu lya nsavo vakukova vusulu hawinwe mugati na mihayo migulugulu; alisi kitanga chavo kufuma kale kikakendelile, na vuzimile wavo vukavile kutindila.

⁴Kwisi ulu Mulungu akavavonelile kisa vamalaika venavo, aho vakenagulaga, sumbwa wavasindikilaga hamizimu, na wavatavulaga mu makandilo ga giti valindilwe kusika ha vuyanguzi.

⁵Na liwelelo lya kale akalivonelile kisa, sumbwa wamupizaja Noa, mutanizya wa vugololoku, na vangi mpungati, aho waletaga likamilamasenga kwigulya na liwelelo lya vʼivengwe.

⁶Hangi wagatemelaga makaya Sodoma na Gomora na kugazija kuvi mavu, na syenisyo wakindikaga lumeho ku venavo hovene mu nsiku zya kumbele vakuvi

⁷vʼivengwe. Alisi wamupizaja Loto mugololoku, homwene wadukivagwa muno na milimo ya wigomu;

⁸kwisi aho mugololoku mwenuyo wikalaga mugati navo wadukaga mu moyo gwakwe lusiku ku lusiku kunguno ya milimo yavo migomu hoyene wayivonaga na wayigagwa.

⁹Sisyo Guku alimanicha kuvapizya mu magemelo venavo valimogoha, alisi kuvalindila na kuvaducha va wigomu kusika lusiku lwa vuyanguzi, alisi muno venavo valigulonda muvili mugati na mavutamanilwa na vugunu, na hovene valivuvengelezya vukovozi.

¹⁰Mugati na kwigagambazya na kwitogwa venekili vakavile kogoha kugafusa malukumo,

¹¹nulu vamalaika vavakilile mu nguzu na vukovozi vakavile kuleta mbulano kwigulya navo hambele na Guku.

¹²Alisi venava kitisi ndimu zikavile na masala, hozyene ha vutundwa wazyo zyavyalilwe kudimwa na kuvulagwa, sisyo venava, kunguno valigafusa genayo vakagamanikizye, vakuzimanguka mugati na vuzimanguke wavo

¹³wenekili, na kupiwa vusyokeziwa vugololoku. Ha limi validehela kalya na kanwa, vali kitisi mabado ga mafita na zoma, valivimbezya venekili mu mavuyengani gavo henaho valilya mayeye hamohene ninwe.

¹⁴Minso gavo gokalile vuyanzani, na vakakovolile kuzova kukenagula; valiyihumbika myoyo yikajamile; myoyo yavo yalendela mugati nʼihuhu lya nsavo, vali vana va ifwizilo.

¹⁵Vayilekile nzila ngololoku na vatagikile, vayilondaga nzila yamwa Biliam, mwana Beori, homwene wagutogagwa musyahala gwa wigomu, alisi wadakilagwa kunguno ya vusumule wakwe mpunda kameme

¹⁶yayombaga na muzwi gwa munhu, na yavuhangilizaja vusazi wa mufumbuzi.

¹⁷Venava vali kitisi tusela vuduhu minzi, na makungugu hogene galifilwa na kikungulya;

¹⁸hovene vatulililwe wilavuzu na giti. Mugati na kwigagambazya mihayo yikavile na nguno, na mugati na kutamanilwa kwa muvili na mawivonya valivasinizya venavo vendaga kuvapela venavo valisimiza mu vuzimile;

¹⁹valivalaganya vunamiko, nulu venekili vali vasese va vukenaguke; kwisi munhu ali musese wa chenicho icho chamukindile.

²⁰Kwisi ulu vamalile kuzipela zoma zya liwelelo kunguno vamumanikaja Guku na Mupizya wiswe Yesu Kristo, alisi vigovengʼhanizye hangi mwenumo na vakindilwe nazyo, haho mhelo yavo yikuvi mbi kukila mbuki.

²¹Kwisi yavavelelile, ulu mbe vavagi vakayimanikizye nzila ya vugololoku kukila, hanuma na kuyimanicha, kuguleka mukumo musondo hogwene gwalagilagwa kuwavo.

²²Yavakwililaga kitisi mugelegenzo guliyomba, Mbwa yiligasyokela malusi gayo; na nguluve hoyene yogile yiligalagala mu malolo.