Read Nyamwezi Vukundukule 11 Bible Online

Vukundukule 11 - Nyamwezi bible

Vukundukule 11

¹Haho napivagwa kipimo kitisi isununu, na nawilagwa, Uvuke, ukalipime isengelo lya Mulungu na hakuhozezya, na venavo valisenga mwenumo.

²Alisi ngomwa hanze nʼisengelo uyileke hibala, na uleke kuyipima, kwisi yapanilwe ku va mafyalo, navo vakuyitovagula kaya nsondo myezi makumi anne na ivili.

³Nane nkuvatuma vasangilwaho vane vavili kufumbula nsiku kihumbi kimo na magana avili na makumi mkaga, vazwalile magunila.

⁴Avo vali iyo Miti ya Maguta ivili na izyo tala ivili hozyene zimile hambele na Guku wa liwelelo.

⁵Na ulu umo alikova kuvakenagula, moto gulifuma ku milomo yavo na gulivalya vanisi vavo; homwene alikova kuvakenagula, mwenuyo avulagwe savasava. Venavo vali na vukovozi wa kulilugala ilunde mbula yileke kutwina mu nsiku zya vufumbuzi wavo;

⁶navo vali na vukovozi kwigulya na minzi wa kugagalula kuvi magazi, na kulitula liwelelo na maluduko ga kila mutindo na kila itungo, kitisi valikova.

⁷Na ulu vamalaga vufumbuzi wavo, inwele, holyene lilifuma hamizimu, likulasana vulugu navo na kuvakinda na kuvavulaga.

⁸Na milambo yavo yikulala mu barabara zya mukaya iyo nhanya yitanilwe hanuma na roho yayo Sodoma na Misri, henaho Guku wavo wakomelagwa.

⁹Na vanhu va kila chalo na igongo na kiyombele na vuvyalwa vakuyilolela milambo yavo nsiku idatu na nusu, na vakuleka kuzumya milambo yavo yitulwe mu kivimbi.

¹⁰Na venavo valikala mu liwelelo vakuvadehela na kwihalala, na vakwipana fipanwa hamohene, kunguno vafumbuzi avo vavili vavapinehezaja venavo valikala mu liwelelo.

¹¹Na hanuma na nsiku idatu na nusu roho ya vuzuvuku yifumile kumwa Mulungu yavingilaga, navo vimaga ku magulu gavo, na venavo vavavonaga vingilagwa na kogoha kuhanya.

¹²Na nagwigagwa muzwi muhanya kufuma kwilunde, guvawila, Muline henaho. Navo valinaga kwilunde mugati nʼilunde, na vanisi vavo vavagi valivilolela.

¹³Na itungo lili nyamuditimya nhanya yaditimaga, na ifungu lya ikumi lya kaya lyagwaga, na vanhu fihumbi mpungati vavulagagwa na nyamuditimya; na venavo vasigalaga vakangagwa na vamukuzaja Mulungu wa mwilunde.

¹⁴Musyolo gwa vuvili gwamalaga, lolagi, musyolo gwa vudatu gukwiza wangu.

¹⁵Na malaika wa mpungati wafulaga kalumbete, na mizwi mihanya yadegelekwa mwilunde, yuhaya, Vutemi wa liwelelo wavile wamwa Guku wiswe na wamwa

¹⁶Kristo wakwe, nawe akutema kusika myaka de. Na avo vanamhala makumi avili na vanne, hovene vavagi vikalile ku masumbi gavo hambele na Mulungu, vagwaga hasi ha mavusyu gavo na vamukuvilaga Mulungu,

¹⁷vuhaya, Tulikulumbila veve Guku Mulungu, Muvezya fyose, veve homwene uliho na wavagiho, kunguno wayidimaga nguzu yako nhanya na watemaga.

¹⁸Va mafyalo vakilagwa, na kisila chako kizaga, na itungo lyafikaga lya kuvayangula vafwile na kuvapa vakumba vako vusyokeziwa, vafumbuzi, na vasondo, na venavo hovene valilyogoha lina lyako, vado na vahanya, na kuvakenagula venavo valilikenagula liwelelo.

¹⁹Na isengelo lya Mulungu mwilunde lyalugulagwa, na isanduku lyakwe lya kuswana ligelaga mwisengelo lyakwe; haho gizaga malukuva na filaka na makuhilima na nyamuditimya na mbula nhanya ya mawe.