Read Nyamwezi Vukundukule 13 Bible Online

Vukundukule 13 - Nyamwezi bible

Vukundukule 13

¹Na nimaga ha musengasenga gwa nyanza. Haho nayivonaga ndimu yilifuma ku nyanza, nayo yavagi na mapembe ikumi na mitwe mpungati, na ku mapembe gayo zyavagi ngala ikumi, na ku mitwe yayo mina ga mafusano.

²Na iyo ndimu nayivonaga yikolaga nsuvi, na magulu gayo gavagi kitisi ga itanda, na mulomo gwayo kitisi mulomo gwa isimba. Nhumbamasaka yayipaga nguzu yayo na isumbi lyayo na vukovozi vuhanya.

³Na mugati na mitwe yayo naguvonaga gumo gugulazivilwe ha kufwa, alisi kilonda chayo cha lufu chapilaga, na liwelelo lyose mugati na kukumya lyayilondaga iyo ndimu.

⁴Na vayikuvilaga nhumbamasaka kunguno yayipaga iyo ndimu vukovozi; na vayikuvilaga iyo ndimu, vuhaya, Nani aliyikola ndimu yeniyi?

⁵Nani alikovola kulasana nayo? Na yapivagwa mulomo gwa kuyomba mihayo mihanya na mafusano, na yapivagwa vukovozi kutumama myezi makumi anne na ivili.

⁶Yasamaga mulomo gwayo, yimufuse Mulungu na kulifusa lina lyakwe na wikalo wakwe na venavo valikala mwilunde.

⁷Hangi yapivagwa luhusa kulasana vulugu na vasondo na kuvakinda; na yapivagwa vukovozi kwigulya na kila igongo na va chalo na kiyombele na vuvyalwa.

⁸Na vose valikala mu liwelelo vakuyikuvila, vose hovene vukumbu na kutundwa kwa liwelelo vakatonilwe mina gavo mu kitabu cha vuzuvuku cha Kadilana kasinzilwe.

⁹Homwene ali na matwi, adegeleke.

¹⁰Homwene alidima nsamhwa afilwe mu vutungwa; ulu umo alivulaga na lupanga, nawe mwene avulagwe na lupanga. Henaha vulifundwa vujamu na isanizyo lya vasondo.

¹¹Haho nayivonaga ndimu yingi yilifuma ku liwelelo, nayo yavagi na mapembe avili kitisi ga kadilana, na yayombaga kitisi nhumbamasaka.

¹²Na yavutumilaga vukovozi vose wa iyo ndimu ya mbele hambele na vusyu wayo, na yililigada liwelelo na venavo valikala kwigulya kulyo mu kuyikuvila ndimu ya mbele, iyo kilonda chayo cha lufu chapilile.

¹³Nayo yilivezya migaka mihanya, kusika kugwisya moto kufuma kwilunde kugwila ku liwelelo hambele na minso ga vanhu.

¹⁴Na yilivapuvya venavo valikala mu liwelelo kunguno ya migaka iyo yapivagwa kuvezya hambele na iyo ndimu na yilivawila venavo valikala mu liwelelo ati, valivezye isumbano lya ndimu iyo yavagi nalo luguma lwa lupanga, na yapilile.

¹⁵Na yapivagwa nguzu kwingizya myuye mwisumbano lya ndimu, na syenisyo isumbano lya ndimu lyakovolaga kuyomba na kuvezya ati vose, hovene vakanaga kulikuvila isumbano lya ndimu, vavulagwe.

¹⁶Na yilivagada vose, vado na vahanya, vasavi na vapina, vanamiko na vasese, vitulile lumanyilo

¹⁷ku mulila gwavo ninga ku vusyu wavo, syenisyo kuduhu umo akovole kugula ninga kuguzya, ulu akavile nalo lumanyilo lwa lina lya ndimu, ninga luvalo lwa lina lyayo.

¹⁸Henaho yilifundwa ngelo. Homwene ali na masala, alusolozye luvalo lwa ndimu, kwisi luli luvalo lwa munhu, nalo luli magana mkaga na makumi mkaga na mkaga.