Read Nyamwezi Vukundukule 14 Bible Online

Vukundukule 14 - Nyamwezi bible

Vukundukule 14

¹Haho nalolaga, na navonaga Kadilana wimile ku lugulu Siyoni, na hamohene nawe vanhu 144,000, hovene vavagi nalyo lina lyakwe na lina lya Vava wakwe litonilwe ku macheni gavo.

²Na nagwigagwa muzwi kufuma kwilunde kitisi kululumila kwa minzi mingi na kitisi kuhilima kuhanya; na muzwi ugo nagwigagwa gwavagi kitisi muzwi gwa vatula izeze, hovene valitula mazeze gavo.

³Navo valwimbaga lwimbo lupya hambele nʼisumbi na hambele na ifyo fitundwa finne na vanamhala; na kuduhu umo wakovolaga kwihembeka lwimbo lwenulo, sumbwa avo 144,000, hovene vakomolilwe kufuma ku liwelelo.

⁴Vali venavo hovene vakiyilavuzizye na vakima, kunguno yeniyi vali kitisi vahala. Avo vali venavo valimulonda Kadilana kosekose uko alijako. Venavo vakomolilwe kufuma ku vanhu,

⁵vali kitisi vutomole kumwa Mulungu na Kadilana; na mu milomo yavo vukawinwe vulamba, kwisi vali vuduhu kimelo.

⁶Haho namuvonaga malaika ungi alilala hagatigati nʼilunde, wavagi nayo Mhola ya Chelu ya hanahana ya kuvatanizya venavo valikala mu liwelelo, na ku va mafyalo gose na magongo na fiyombele na mavuvyalwa,

⁷nawe wayombaga na muzwi muhanya, Mumogohe Mulungu na mumukuzye, kwisi itungo lya vuyanguzi wakwe lyafikaga, na mumukuvile mwenuyu homwene walitundile ilunde na liwelelo na nyanza na tusela twa minzi.

⁸Na malaika ungi walondaga, uhaya, Yagwile, yagwile Babiloni nhanya hoyene yanwesizye va mafyalo gose na mvinyo ya kisila ya vulava wayo.

⁹Haho malaika wa vudatu wavalondaga avo, uhaya na muzwi muhanya, Homwene aliyikuvila iyo ndimu na isumbano lyayo na kulwanukula lumanyilo ku cheni

¹⁰chakwe ninga ku kukono kwakwe, uyu nawe akunwa ku mvinyo ya kisila ya Mulungu, hoyene yavezivilwe vuduhu kusangiliziwa na minzi mu kineneko chakwe; nawe akudukiwa na moto na fibiriti hambele na vusyu wa vamalaika vasondo na Kadilana.

¹¹Na lyoki lya mavuduki gavo lilizuka kusika myaka na myaka de; navo vakavile kwisuhya halimi ninga havuziku, venavo hovene valiyikuvila iyo ndimu na isumbano lyayo, na hovene valilwanukula lumanyilo lwa lina lyayo.

¹²Henaho vulifundwa vujamu wa vasondo, venavo hovene valiyilindila mikumo ya Mulungu na isanizyo hamwa Yesu.

¹³Haho nigagwa muzwi kufuma kwilunde, gulihaya, Utone: Velukilwa vafwile, hovene vukumbu lelo valifwa mugati na Guku. Yalole, Roho alihaya, visuhye ku migangadiko yavo, kwisi milimo yavo yilivalonda.

¹⁴Haho nalolaga, na navonaga ilunde lya pe, na kwigulya nʼilunde lyenilo wikalaga umo ikolile Mwana wa munhu, ali na ngala ya dhahabu ku mutwe gwakwe, na imozyo lyugi mu kukono kwakwe.

¹⁵Na malaika ungi wafumaga kwisengelo alimuhamukila na muzwi muhanya uyo wikalaga ku lyenilo ilunde, Ulitumizye imozyo lyako, na wimbule, kwisi itungo lya kwimbula

¹⁶lyafikile, kunguno fisumo fya liwelelo fyapile. Na uyo homwene wikalaga kwigulya nʼilunde walitumizaja imozyo lyakwe ku liwelelo,

¹⁷na liwelelo limbulagwa. Na malaika ungi wafumaga kwisengelo lya mwilunde, nawe mwene wavagi nalyo imozyo lyugi.

¹⁸Na malaika ungi wahafumaga hakuhozezya, homwene wavagi navo vukovozi kwigulya na moto, nawe wamuhamukilaga na muzwi muhanya mwenuyo wavagi nalyo imozyo lyugi, Ulitumizye imozyo lyako lyugi na uyitine mikungo ya muzabibu gwa liwelelo, kwisi fisumo fyalyo fyapile.

¹⁹Na malaika walitumizaja imozyo lyakwe ku liwelelo na wafitinaga fisumo ku muzabibu gwa liwelelo, na wafiponezaja mwituli ihanya lya kukamulila lya kisila cha Mulungu.

²⁰Na ituli lya kukamulila lyapandagilagwa hanze na kaya, na magazi gafumaga kwituli lya kukamulila, gafikilaga kusika hatamu zya farasi, lugendo lwa stadio kihumbi kimo na magana mkaga.