Read Nyamwezi Vukundukule 16 Bible Online

Vukundukule 16 - Nyamwezi bible

Vukundukule 16

¹Haho nigagwa muzwi muhanya kufuma kwisengelo gulivawila vamalaika avo mpungati, Muje mukafimwage ku liwelelo fiseme fya kisila cha Mulungu.

²Na wa mbele wajaga na wakimwaga kiseme chakwe ku liwelelo, na mavute mavi na masatu gavakwililaga vanhu venavo hovene vavagi nalo lumanyilo lwa iyo ndimu na valikuvilaga isumbano lyayo.

³Na malaika wa vuvili wakimwagaga kiseme chakwe mu nyanza, nayo yapilukaga kuvi magazi kitisi ga mufwile, na fyose mu nyanza hofyene fyavagi nayo myuye fyafwaga.

⁴Na malaika wa vudatu wakimwagaga kiseme chakwe mu myongo na tusela twa minzi, nato twapilukaga kuvi magazi.

⁵Na namwigagwa malaika wa minzi aliyomba, Uli mugololoku, veve homwene uliho na wavagiho, veve musondo, kunguno wayangulaga syenisyo;

⁶kwisi venavo vamwagilile magazi ga vasondo na vafumbuzi, naʼho wavapile magazi vaganwe; syenisyo yagelanilaga kuwavo.

⁷Na nahigagwa hakuhozezya haliyomba, Yalole, Guku Mulungu, Muvezya fyose, vuyanguzi wako vuli wa lole na vugololoku.

⁸Na malaika wa vunne wakimwagaga kiseme chakwe kwigulya na limi, nalyo lyapivagwa nguzu zya kuvazija vanhu na moto.

⁹Na vazigivagwa na ilungula ihanya, na valifusaga lina lya Mulungu, homwene ali navo vukovozi kwigulya na maluduko genaya; alisi vakapilukile moyo na kumupa lukumo.

¹⁰Na malaika wa vutano wakimwagaga kiseme chakwe kwigulya nʼisumbi lya iyo ndimu; na vutemi wayo wilavulaga, na venekili vilumaga malulimi gavo kunguno

¹¹ya mavusatu, na vamufusaga Mulungu wa mwilunde kunguno ya mavusatu gavo na mavute gavo; alisi vakapilukile moyo ku milimo yavo.

¹²Na malaika wa mukaga wakimwagaga kiseme chakwe kwigulya na mongo muhanya Eufrate, na minzi gago gakamaga, kigele nzila yivezeleziwe ku vatemi va kukiya.

¹³Na navonaga roho idatu zya zoma zilifuma ku mulomo gwa iyo nhumbamasaka na gwa iyo ndimu na ku mulomo gwa mufumbuzi wa vulamba, zikolile machula.

¹⁴Kwisi zili roho zya migavo hozyene zilivezya migaka, nazyo zilija ku vatemi va liwelelo lyose kuvavilinga ku vulugu ha lusiku luhanya lwa Mulungu, Muvezya fyose.

¹⁵Lolaga, nkwiza kitisi mwivi. Welukilwa mwenuyu homwene alidila minso, na aliyilindila myenda yakwe, aleke kuyumba zule, na vanhu vayivone nsoni yakwe.

¹⁶Na vavavilingaga henaho halitanwa mu Kiebrania, Harmagedon.

¹⁷Na malaika wa mpungati wakimwagaga kiseme chakwe mu fulo; na kufuma mwisengelo, kufuma kwisumbi, gwafumaga muzwi muhanya, guhaya, Yamalaga kukwila.

¹⁸Na haho gizaga malukuva na filaka na makuhilima; na nyamuditimya nhanya yavagiho mutindo gwayo gukakwilile vukumbu henaho vanhu vatundilwe ku liwelelo, sisyo nyamuditimya yavagi nhanya munogwene.

¹⁹Na kaya nhanya yatandukaga mafungu adatu, na makaya ga vanhu gagwaga; na Mulungu wayizukilaga Babiloni yipiwe kineneko cha mvinyo cha vudaki wa kisila chakwe.

²⁰Na kila kisilwa chanelaga, na malugulu gakawinwe hangi.

²¹Na mbula ya mawe mahanya munogwene yavagwilaga vanhu kufuma kwilunde; na vanhu vamufusaga Mulungu kunguno ya luduko lwa mbula ya mawe, kwisi luduko lwayo lwavagi luhanya muno.