Read Nyamwezi Vukundukule 18 Bible Online

Vukundukule 18 - Nyamwezi bible

Vukundukule 18

¹Hanuma na genaya namuvonaga malaika ungi alisoka kufuma kwilunde, nawe wavagi na vukovozi vuhanya, na liwelelo lyezivagwa na lukumo lwakwe.

²Wahamukaga na kilaka kihanya, Yagwile, yagwile Babiloni nhanya, na yavile wikalo wa migavo, na ngomwa ya roho zyose zya zoma, na ngomwa ya manoni gose ga zoma na magaywa.

³Kwisi va mafyalo gose vanwile ku mvinyo ya kisila ya vulava wakwe, na vatemi va liwelelo valavahaga nawe, na vasuluzya va liwelelo vasavaga nsavo ku wokale wa vugunu wakwe.

⁴Haho nigagwa muzwi gungi kufuma kwilunde, gulihaya, Mufume kuwakwe, inwe va chalo chane, kwigela ngʼo muve na lusangi nawe mu mavukenaguzi gakwe,

⁵na kwigela ngʼo muduke maluduko gakwʼe. Kwisi mavukenaguzi gakwe gitumbikile kusika hʼilunde, na Mulungu wagizukilaga mawigomu gakwe.

⁶Mumusyokezye isyo wamusyokezizye inwe, na mumusyokezye kavili hanuma na milimo yakwe; kineneko icho wakisangilizizye kuwinwe, mukisangilizye kavili kuwakwe.

⁷Kitisi mwenekili wikumukaja na wikalaga mu vugunu, sisyo sisyene mumusyokezye vusatu na misayo. Kwisi aliyomba mu moyo gwakwe, Ndikala kitisi mutemi, na

⁸nkavile musimbe, na misayo nkuleka kuvona. Kunguno yeniyi maluduko gakwe gakwiza lusiku lumo: lufu na misayo na nzala, na akuzigiwa na moto; kwisi ali wa nguzu Guku Mulungu homwene alimuyangula.

⁹Na vatemi va liwelelo hovene valavahaga na vigunaja nawe vakumulilila na kililo, ulu valilivona lyoki

¹⁰lya kuzigiwa kwakwe, na mugati na vova vimile kule kunguno ya vusatu wakwe, vuhaya, Musyolo, musyolo kwigulya naʼho, veve kaya nhanya Babiloni, veve kaya ya nguzu, kwisi mu saa yimo kitanga chako chafikaga.

¹¹Na vasuluzya va liwelelo vakumulilila makungwi, kunguno kuduhu wa kuzigula nsavo zyavo:

¹²miligo ya dhahabu, na fedha, na mawe malambu mupango, na lulu, na myenda ya bafta, na milaluku, na ya hariri, na ya za, na miti yose ya vumoti, na fiseme fyavezivilwe

¹³ku mino ga mhuli, na fya chuma, na fya marimari, na mdalasini, na karafuu, na mugazu, na uvumba, na ubani, na mvinyo, na maguta, na vufuma vunyelezu, na ngano, na ngʼombe, na ngʼholo, na farasi, na migali,

¹⁴na vasese, na myuye zya vanhu. Na fisumo, hofyene myuye zyako zyafitamanilagwa, fingikile hawako, na fyose finonu, na hofyene filikema, fyamalile hawako

¹⁵na kuvonwa ngʼo hangi. Na vasuluzya va genaya, hovene vasavaga nsavo mugati nawe, vakwima kule mugati na vova kunguno ya vusatu wakwe valilila

¹⁶makungwi, vuhaya, Musyolo, musyolo, kwigulya na kaya yeniyi nhanya, hoyene yazwalile bafta, na myenda milaluku, na ya za, na yakemaga na dhahabu na mawe malambu mupango na lulu; kwisi mu saa yimo duhu nsavo zyose zyenizi zyazimilaga.

¹⁷Na vadima sukani vose, na vasava mawato, na vavugi, na vose

¹⁸valitumama mu nyanza vimile kule, na aho valivonaga lyoki lya kuzigiwa kwakwe, vuhaya, Kuhe kaya yiliyikola kaya yeniyi nhanya?

¹⁹Na vifulilaga luvuvu ku mitwe yavo, na mugati na kulila makungwi vahamukaga, Musyolo, musyolo kwigulya na kaya yeniyi nhanya, mugati nayo vose hovene vavagi na mawato mu nyanza vasavile nsavo kunguno ya lukumo lwayo, kwisi mu saa yimo yazimilile.

²⁰Uyihalalile veve ilunde, na inwe vasondo, na vatume, na vafumbuzi, kunguno Mulungu wayitemelaga kitanga kunguno yinwe.

²¹Na malaika wa nguzu walivukaja iwe kitisi iwe lya kusyela, walitagilaga mu nyanza, uhaya, Syenisyo Babiloni, kaya iyo nhanya, yikutagilwa na nguzu, na

²²kuvonwa ngʼo hangi. Na muzwi gwa vafula mazeze, na vimbizi, na vafula minyonge, na vafula matulumbete, kudegelekwa ngʼo hangi muwako; ninga fundi wa milimo misoga kuvonwa ngʼo muwako, ninga muzwi gwʼiwe lya kusyela kudegelekwa ngʼo hangi muwako;

²³ninga mwanga gwa tala kwela ngʼo hangi muwako; ninga muzwi gwa mutozi na mutolwa kudegelekwa ngʼo muwako; kunguno vasuluzya vako vavagi vahanya va liwelelo, kunguno va chalo vose vapuvivagwa na mavila gako.

²⁴Na mugati nayo magazi ga vafumbuzi na vasondo gavonagwa, na ga vose hovene vavulagilwe mu liwelelo.