Read Nyamwezi Vukundukule 20 Bible Online

Vukundukule 20 - Nyamwezi bible

Vukundukule 20

¹Haho navonaga malaika alisoka kufuma kwilunde ali nalo lufungulo lwa hamizimu, na munyololo muhanya mu kukono kwakwe.

²Wayidimaga nhumbamasaka, iyo nzoka ya kale, hoyene ali Katavi na Shetani, na

³wamutungaga myaka kihumbi, wamutagilaga hamizimu, na walugalaga, na watulagaho lumanyilo, aleke kuvapuvya va mafyalo kusika myaka kihumbi yamalaga. Hanuma na genaya alatungulwe itungo ido. Haho navonaga masumbi na venavo vikalaga kwigulya nago vapivagwa vukovozi wa kutema kitanga.

⁴Na navonaga myuye zya venavo vatinagwa mutwe kunguno ya vusangilwaho wamwa Yesu na kunguno ya muhayo gwa Mulungu, na venavo hovene vakayikuvilile iyo ndimu, ninga isumbano lyayo, na vakasolile

⁵lumanyilo ku mavusyu gavo na makono gavo; navo vahembukaga na vatemaga na Kristo myaka kihumbi. Na venavo vangi va vafwile vakahembukile kusika myaka iyo kihumbi yamalile. Wenuvu vuli vuhembuke wa mbele.

⁶Velukilwa na vasondo vali venavo vali na lusangi mu vuhembuke wa mbele; kwigulya na venava lufu lwa vuvili lukavile na nguzu, alisi vakuvi vahozya va Mulungu na vamwa Kristo, na vakutema hamohene nawe myaka kihumbi.

⁷Na ulu myaka kihumbi yamalile, haho Shetani akutungulwa ku kifungo chakwe,

⁸na akufuma kuvapuvya va mafyalo ku filunga fyose finne fya liwelelo, Gog na Magog, kuvavilinga ku vulugu; luvalo lwavo kitisi lwa musenga gwa nyanza.

⁹Na vasambalaga mu vugalihu wa liwelelo, vayipilimaga nkambi ya vasondo na kaya ntoneke. Haho moto gwagwaga kufuma kwilunde na gwavalyaga.

¹⁰Na Shetani, homwene wavapuvaja, watagilagwa mu nyanza ya moto na fibiriti, umo yavagimo iyo ndimu na mufumbuzi wa vulamba, navo vadukivagwa halimi na havuziku kusika myaka na myaka de.

¹¹Haho nalivonaga isumbi ihanya lya pe, na uyo wikalagamo. Liwelelo na ilunde gapelaga hambele na

¹²vusyu wakwe, na hago hakawinweho hangi. Na navavonaga vafwile, vahanya na vado, vimile hambele nʼisumbi, na fitabu fyakundukulagwa. Na kitabu kingi chakundukulagwa, kitabu cha vuzuvuku; na vafwile vayangulagwa hanuma na genayo gatonilwe mu fitabu, hanuma na milimo yavo.

¹³Na nyanza yafumaja vafwile hovene vavagimo mugati nayo, na lufu na hamizimu havafumaja vafwile hovene vavagiho henaho na kila umo wayangulagwa hanuma na milimo yakwe.

¹⁴Na lufu na hamizimu hatagilagwa mu nyanza ya moto.

¹⁵Lwenulu luli lufu lwa vuvili, nyanza ya moto. Na ulu umo akatonilwe mu kitabu cha vuzuvuku watagilagwa mu nyanza ya moto.