Read Nyamwezi Vukundukule 22 Bible Online

Vukundukule 22 - Nyamwezi bible

Vukundukule 22

¹Na wanolekaja mongo gwa minzi ga vuzuvuku, gulikema kitisi kristalo, gufumile kwisumbi lya Mulungu

²na Kadilana, hagatigati na barabara ya kaya; ha nguka zyose ivili zya mongo gwavagiho muti gwa vuzuvuku, hogwene gwambaja fisumo fya mitindo ikumi na ivili, na kila mwezi gwambaja fisumo fyago; na madutu ga muti gavagi ga kuvalwazya va mafyalo.

³Na kinhu cha mwiko kikuleka kuviho hangi; na isumbi lya Mulungu na Kadilana likuvimo mugati nayo,

⁴na vakumba vakwe vakumutumamila, navo vakuvuvona vusyu wakwe, na lina lyakwe likuviho ha mavusyu gavo.

⁵Na vuziku vukuleka kuviho hangi, na vakagufundile mwanga gwa tala ninga mwanga gwa limi, kunguno Guku Mulungu akuvamulikila; navo vakutema myaka na myaka de.

⁶Na malaika wambwilaga, Mihayo yeniyi yili mijamu na ya lole; na Guku, Mulungu wa roho zya vafumbuzi, wamutumizaja malaika wakwe kuvolecha vakumba vakwe genaya galakwile wangu.

⁷Lolaga, ndize wangu. Welukilwa mwenuyo aliyilindila mihayo ya vufumbuzi ya kitabu cheniki. Nene Yohana ndi mwenuyu homwene nagigagwa na nagavonaga genaya.

⁸Na aho nagigagwa na nagavonaga genaya, nagwaga hasi kukuvila ha magulu ga

⁹malaika, homwene wanolekaja genaya. Nawe wambwilaga, Uleke kuvezya syenisi, nene ndi mukumba mwiyo, na mwiye wa vaduguyo na wa vafumbuzi, na wa venavo hovene vayilindilaga mihayo ya kitabu cheniki; umukuvile Mulungu.

¹⁰Na wambwilaga, Uleke kuyivisa mihayo ya vufumbuzi ya kitabu cheniki, kwisi itungo lili bihi.

¹¹Umuleke mwenuyo alita kavi, ite kavi hangi, na wa zoma, adile mu zoma hangi, na mugololoku, avezye vugololoku hangi,

¹²na musondo, isondohye hangi. Lolaga, ndize wangu, vusyokeziwa wane vuli hamohene nane, nane nkumusyokezya kila umo hanuma na milimo yakwe.

¹³Nene ndi Alfa na Omega, wa mbele na wa mhelo, mbuki na mhelo.

¹⁴Velukilwa venavo valikanza myenda yavo, kigele vapiwe luhusa kugwegela muti gwa vuzuvuku, na kwingila mu mivita ya kaya.

¹⁵Hanze ziliho mbwa na valogi na vayanzani na vavulagi na visenga fimbulimbuli, na vose hovene valivutogwa na valivuyomba vulamba.

¹⁶Nene, Yesu, namutumizaja malaika wane, kigele asangilwe kuwinwe genaya kunguno ya mavilingano; nene ndi Itina na Muvyalwa wamwa Davidi, na Ihangaye ikemu lya ndiyu.

¹⁷Na Roho na mutolwa valiyomba, Nzugu; na homwene aligwa, aliyomba, Nzugu. Homwene ali na nota, ize; homwene alikova, ize, aganukule minzi ga vuzuvuku cha kisa.

¹⁸Ndisangilwa ku kila umo homwene aliyigwa mihayo ya vufumbuzi ya kitabu cheniki: Ulu umo alongezya gamo ku genaya, haho Mulungu akumongelezya maluduko genaya gatonilwemo mu kitabu cheniki.

¹⁹Na ulu umo alinja gamo ku mihayo ya vufumbuzi ya kitabu cheniki, haho Mulungu akumwingizya ifungu lyakwe ku muti gwa vuzuvuku na ku kaya nsondo, kitisi yatonilwe mu kitabu cheniki.

²⁰Uyu homwene alisangilwa genaya, aliyomba, Ahene, ndize wangu. Amen, nzugu Guku Yesu! Kisa cha Guku Yesu Kristo kiveho hamohene na vasondo.