Read Nyamwezi Vukundukule 3 Bible Online

Vukundukule 3 - Nyamwezi bible

Vukundukule 3

¹Umutonele malaika wʼivilingano lya mu Sardi: Genaya aliyomba mwenuyo ali nazyo roho mpungati zya Mulungu nago masonda mpungati. Ndiyimanicha milimo yako, na kitisi ulitanwa muzuvuku, nulu wafwile.

²Umisye na ugajamilizye genayo gangi galikova kufwa; kwisi nkawine milimo yako yili mikomezu hambele na Mulungu.

³Kunguno yeniyi wizukile isyo waganuku laga na wagigagwa; ugadime na upiluke moyo. Alisi ulu ukavile kumisya, nkwiza kuwako kitisi mwivi, naʼho ukuleka kumanicha itungo lya kwiza kwane kuwako.

⁴Alisi uli navo vamo mu Sardi hovene vakayilavuzizye mu zoma myenda yavo; venava vakusimiza hamohene nane vazwalile myenda ya pe, kwisi vasikile isima.

⁵Homwene alikinda, mwenuyu akuzwikwa myenda ya pe, nane nkuleka kulifuta lina lyakwe mu kitabu cha vuzuvuku, sumbwa nkulizumilizya lina lyakwe hambele na Vava na vamalaika vakwe.

⁶Homwene ali nago matwi, adegeleke kitisi Roho alivawila va mavilingano.

⁷Umutonele malaika wʼivilingano lya mu Filidelfia: Genaya aliyomba mwenuyo ali musondo na wa lole, homwene ali nalo lufungulo lwamwa Davidi, homwene alilugula na kuduhu wa kukovola kulugala, na alilugala na kuduhu wa kukovola kulugula.

⁸Ndiyimanicha milimo yako. Lolaga, nakupaga mwango gulugulilwe hambele naʼho, hogwene kuduhu umo alikovola kulugala; kwisi nulu uli na nguzu ndo duhu wagulindilaga

⁹muhayo gwane, na ukalikanile lina lyane. Lolaga, nkukuletela vamo va sinagogo yamwa Shetani, hovene valiwiyitana Vayahudi, alisi vakavile venavo, sumbwa valilambaha. Lolaga, nkuvavezya venava vize kukakuvila ha magulu gako, vamaniche ati nakutogilwe.

¹⁰Kunguno wagulindilaga muhayo gwa vujamu wane, nene mwene nkukulindila veve mwitungo lya magemelo, holyene likwiza kwigulya na liwelelo lyose kuvagema vose venava valikala mu liwelelo.

¹¹Lolaga, nkwiza wangu. Ugadime genayo uli nago, kwigela ngʼo umo akupuzye ngala yako.

¹²Homwene alikinda, mwenuyu nkumuvezya kuvi nhingi mwisengelo lya Mulungu wane, nawe akuleka kufumamo hangi, nane nkumutona uyu lina lya Mulungu wane, na lina lya kaya ya Mulungu wane, Yerusalema mpya, hoyene yilisoka kufuma kwilunde kufuma kumwa Mulungu wane, na lina lyane ipya nene mwenekili.

¹³Homwene ali nago matwi, adegeleke kitisi Roho alivawila va mavilingano.

¹⁴Umutonele malaika wʼivilingano lya mu Laodikea: Genaya aliyomba mwenuyo ali Amen, homwene ali musangilwaho mujamu na wa lole, wa mbele wa fitundwa fya Mulungu.

¹⁵Ndiyimanicha milimo yako ati, ukavile munedeku ninga musevu, sisoga ulu mbe wavagi munedeku ninga musevu.

¹⁶Alisi lelo kunguno uli kakomanzala na ukavile musevu ninga ngʼo munedeku, nkukutuga ku mulomo gwane.

¹⁷Kunguno uliyomba, Nene ndi musavi, na ndi nazyo nsavo, na nkavile kugayiwa kinhu; naʼho ukamanikizye ati uli musakazu na kusatiwa lusungu na mupina na muhofu na muzule.

¹⁸Ndikupa ndaka, ugule hawane dhahabu yigusilwe mu moto, kigele upiwe nsavo, na myenda ya pe, kigele uzwale, nsoni ya vuzule wako yileke kwigela; na vuganga wa minso wa kugavila minso gako, kigele uvone.

¹⁹Vose hovene ndivatogwa, venavo ndivahilimila na kuvahana na luduko; kunguno yeniyi ugangadike na upiluke moyo.

²⁰Lolaga, ndiwima ha muzigo ndiluguzya; ulu umo aligwigwa muzwi gwane na alilugula muzigo, nene nkwingila hawakwe na kulya hamohene

²¹nawe, nawe hamohene nane. Homwene alikinda, mwenuyu nkumupa kwikala hamohene nane kwisumbi lyakwe.

²²Homwene ali nago matwi, adegeleke kitisi Roho alivawila va mavilingano.