Read Nyamwezi Vukundukule 6 Bible Online

Vukundukule 6 - Nyamwezi bible

Vukundukule 6

¹Na navonaga aho Kadilana kalutungulaga lumo lwa ago malumanyilo mpungati, na nigagwa kimo cha ifyo fitundwa finne kiliyomba na muzwi gwa kuhilima,

²Nzugu! Nalolaga, na navonaga farasi ya pe, na uyo wayidamilaga wavagi navo vuta, na wapivagwa ngala, na wafumaga alikinda na kukinda.

³Na aho Kadilana kalutungulaga lumanyilo lwa vuvili, nigagwa kitundwa cha vuvili kiliyomba, Nzugu!

⁴Haho farasi yingi yafumaga, ya za, na uyo wayidamilaga wapivagwa vukovozi kukwinja kuhola mu liwelelo, kigele vanhu vivulage, nawe wapivagwa lupanga luhanya.

⁵Na aho Kadilana kalutungulaga lumanyilo lwa vudatu, nigagwa kitundwa cha vudatu kiliyomba, Nzugu! Nalolaga, na navonaga farasi ya pi, na uyo wayidamilaga wavagi nacho kipimo mu kukono kwakwe.

⁶Na nigagwa kitisi muzwi hagati na ifyo fitundwa finne guliyomba, Kakopo ka ngano ku denari yimo, na tukopo tudatu twa vusiga ku denari yimo, na uleke kugakenagula maguta na mvinyo.

⁷Na aho Kadilana kalutungulaga lumanyilo lwa vunne nagwigagwa muzwi gwa kitundwa cha vunne guliyomba,

⁸Nzugu! Nalolaga, na navonaga farasi ya kijivu, na uyo wayidamilaga lina lyakwe lufu, na guku wa hamizimu wamulondaga bihi, navo vapivagwa vukovozi kwigulya na ifungu lya vunne lya liwelelo kuvavulaga na lupanga na nzala na masilanda na manwele ga liwelelo.

⁹Na aho Kadilana kalutungulaga lumanyilo lwa vutano nazivonaga hansilili na hakuhozezya myuye zya venavo vavulagilwe kunguno ya muhayo gwa Mulungu, na kunguno ya vusangilwaho uvo vasangilagwa.

¹⁰Navo vahamukaga na muzwi muhanya, vuhaya, Kusika nanali, veve Guku musondo na wa lole, ukuleka kuvayangula na kwihola magazi giswe ku venavo valikala mu

¹¹liwelelo? Haho vapivagwa kila umo kizwalo cha pe, na vawilagwa visuhye hangi itungo ido kusika luvalo lwagelanilaga lwa vakumba vichavo na vadugu vavo, hovene vakuvulagwa kitisi avo venekili.

¹²Na navonaga, aho Kadilana kalutungulaga lumanyilo lwa mkaga, nyamuditimya nhanya yakwilaga, na limi lyavile lya pi kitisi igunila, na mwezi gwavile kitisi

¹³magazi, na masonda gʼilunde gagwaga hasi ku liwelelo kitisi mukuyu guligalagazya maholozya gago ulu gulitinginiwa na muyaga muhanya.

¹⁴Na ilunde lingikaga kitisi lubapulo luligondwa, na kila lugulu na kisilwa chasamivagwa kufuma wikalo wacho.

¹⁵Na vatemi va liwelelo na vahanya na vatwale na vasavi na va vukovozi na kila musese na munamiko vivisaga mu

¹⁶mapilinga na hansilili na matale ga malugulu, na vagawilaga malugulu na matale, Mutugwile na mutuvise ku mwenuyo alikala kwisumbi na ku kisila cha Kadilana.

¹⁷Kwisi lusiku luhanya lwa kisila chavo lwasikileho, na nani alikovola kwimila?