Read Nyamwezi Vukundukule 7 Bible Online

Vukundukule 7 - Nyamwezi bible

Vukundukule 7

¹Hanuma na genayo navavonaga vamalaika vanne vimile ha filunga finne fya liwelelo, navo vayidimile miyaga inne ya liwelelo, muyaga guleke kupepela hangi ku liwelelo, ninga kwigulya na nyanza, ninga kwigulya na muti gumo.

²Na namuvonaga malaika ungi afumile ku kiya ali nalo lumanyilo lwa Mulungu muzuvuku, nawe wavahamukilaga na muzwi muhanya avo vamalaika vanne, hovene vapivagwa vukovozi wa kulikenagula liwelelo na nyanza,

³uhaya, Muleke kulikenagula liwelelo ninga nyanza ninga miti kusika twamalaga kuvatulila vakumba va Mulungu wiswe lumanyilo ku mavusyu gavo.

⁴Na nigagwa luvalo lwa venavo vatulililwe lumanyilo, vanhu fihumbi igana na makumi anne na finne vatulililwe lumanyilo, navo vavagi ku kila igongo lya vana vʼIsraeli. Kwigongo lyamwa Yuda vatulililwe lumanyilo fihumbi ikumi na fivili.

⁵Kwigongo lyamwa Ruben fihumbi ikumi na fivili. Kwigongo lyamwa Gadi fihumbi ikumi na fivili. Kwigongo lyamwa Aseri fihumbi ikumi na fivili.

⁶Kwigongo lyamwa Naftali fihumbi ikumi na fivili. Kwigongo lyamwa Manase fihumbi ikumi na fivili. Kwigongo lyamwa Simeoni fihumbi ikumi na fivili.

⁷Kwigongo lyamwa Lefi fihumbi ikumi na fivili. Kwigongo lyamwa Isakari fihumbi ikumi na fivili. Kwigongo lyamwa Sebuloni fihumbi ikumi na fivili.

⁸Kwigongo lyamwa Yosefu fihumbi ikumi na fivili. Kwigongo lyamwa Benyamini fihumbi ikumi na fivili vatulililwe lumanyilo.

⁹Hanuma na genaya nalolaga, na navonaga mbuto nhanya hoyene kuduhu umo wakovolaga kusolozya, vanhu va machalo na magongo gose na va kila vuvyalwa na kiyombele, hovene vimile hambele nʼisumbi na Kadilana, vazwalile fizwalo fya pe, na vali nago matambi ga mitende mu makono gavo.

¹⁰Na vahamukaga na muzwi muhanya, vuhaya, Vupiziwa vuli hamwa Mulungu wiswe homwene alikala kwisumbi, na hamwa Kadilana.

¹¹Na vamalaika vose hovene vavagi vimile valilipilima isumbi na avo vanamhala na ifyo fitundwa finne vagwaga ha vusyu wavo hambele nʼisumbi, vamukuvilaga Mulungu, vuhaya, Amen!

¹²Luvango na lukumo na ngelo na kalumbilo na isima na vukovozi na nguzu zili zyamwa Mulungu wiswe kusika myaka na myaka de. Amen.

¹³Na umo wa vanamhala witavukaga, wambwilaga, Ava vazwalile fizwallo fya pe vali va nani na vafumile

¹⁴kuhe? Nane namuwilaga, Guku wane, veve ulimanicha. Nawe wambwilaga, Avo vali venavo vafumile ku mamikosi mahanya na vayikanzile myenda yavo na kuyezya mu magazi ga Kadilana.

¹⁵Kunguno yeniyi valiho hambele nʼisumbi lya Mulungu, na valimutumamila halimi na havuziku mwisengelo lyakwe; na uyo alikala kwisumbi akuvalindila mwihema lyakwe.

¹⁶Navo vakuleka kuvi na nzala hangi, ninga kukolwa nota hangi, ninga limi kuvasevela ngʼo, ninga ngʼo ilungula.

¹⁷Kwisi Kadilana hokene kali hagati hambele nʼisumbi kakuvalindila na kuvatonga ku tusela twa minzi ga vuzuvuku, na Mulungu akugapyagula minsozi gose ku minso gavo.