Read Nyamwezi Vukundukule 8 Bible Online

Vukundukule 8 - Nyamwezi bible

Vukundukule 8

¹Na aho Kadilana kalutungulaga lumanyilo lwa mpungati havagi sele mwilunde katungo kitisi nusu saa.

²Na navavonaga avo vamalaika mpungati hovene vimile hambele na Mulungu, na vapivagwa tulumbete mpugati.

³Na malaika ungi wizaga na wimaga hambele na hakuhozezya ali na lyeso lya dhahabu, na mwenuyu wapivagwa migazu mingi, kigele ayisanje hamohene na makulomba ga vasondo kwigulya na hakuhozezya ha dhahabu, hohene haliho hambele nʼisumbi.

⁴Na lyoki lya mugazu lyazukaga ku kukono kwa malaika hambele na Mulungu hamohene na makulomba gavasondo.

⁵Na malaika walisolaga lyeso na walyokazaja na moto gwa hakuhozezya na waliponezaja ku liwelelo, na kwigelaga kuhilima na kulila na lukuva na nyamuditimya.

⁶Na avo vamalaika mpungati, hovene vavagi nato

⁷tulumbete, vivezelezaja tayari kutufula. Na malaika wa mbele wakafulaga kalumbete, na yigelaga mbula ya mawe na ya moto yisangilizivilwe na magazi, yiliponeziwa ku liwelelo, na ifungu lya vudatu lya liwelelo lyazigivagwa, na ifungu lya vudatu lya miti na maswa gose madoto gapyaga.

⁸Na malaika wa vuvili wakafulaga kalumbete, na yigelaga kitisi lugulu luhanya lulivaka moto, luliponeziwa mu nyanza, na ifungu lya vudatu lya nyanza

⁹lyavile magazi; na ifungu lya vudatu lya fitundwa fizuvuku fya munyanza lyafwaga; na ifungu lya vudatu lya mawato lyakenagukaga.

¹⁰Na malaika wa vudatu wakafulaga kalumbete, na kufuma kwilunde isonda ihanya lyagwaga lilivaka kitisi chenge, lyaligwilaga ifungu lya vudatu lya mamyongo na tusela twa minzi.

¹¹Na lina lʼisonda lilitanwa Absinto; na ifungu lya vudatu lya minzi gagalukaga kuvi malulu, na vanhu vingi vafwaga kunguno ya minzi genayo, kwisi galulile.

¹²Na malaika wa vunne wakafulaga kalumbete, na ifungu lya vudatu lya limi lyatulagwa, na ifungu lya vudatu lya mwezi, na ifungu lya vudatu lya masonda, na syenisyo ifungu lya vudatu lya genayo gilavulaga, na ifungu lya vudatu lya limi lyavagi gele mwanga, na vuziku sisyo savasava.

¹³Na nalolaga, na nigagwa inanda lililala hagatigati nʼilunde liliyomba na kilaka kihanya, Musyolo, musyolo, musyolo ku venavo valikala ku liwelelo kunguno ya vufulwe wa tulumbete twa avo vamalaika vadatu hovene vakufula lelo.