Read Nyamwezi Vukundukule 9 Bible Online

Vukundukule 9 - Nyamwezi bible

Vukundukule 9

¹Na malaika wa vutano wakafulaga kalumbete, na navonaga isonda, holyene lyagwaga ku liwelelo kufuma kwilunde, nalyo lyapivagwa lufungulo lwa vusihu wa hamizimu.

²Na lyavulugulaga vusihu wa hamizimu, na lyoki lyazukaga ku vusihu kitisi lyoki lya ngʼanzo nhanya, na limi na fulo zilavulaga na lyoki lya vusihu.

³Na kufuma ku lyoki zizaga nzige mu liwelelo, nazyo zyapivagwa nguzu kitisi nguzu zya tumina mu liwelelo.

⁴Na zyawilagwa zileke kugakenagula maswa ninga ngʼo kinhu kingi kidoto ninga ngʼo muti gumo, sumbwa duhu vanhu venavo vakavile na lumanyilo lwa Mulungu ku mavusyu gavo.

⁵Zyalagilagwa zileke kuvavulaga, sumbwa kuvaducha myezi itano; na vusungu wazyo wavagi kitisi vusungu wa kamina ulu kalimuluma munhu.

⁶Na mu nsiku zyenizyo vanhu vakulukova lufu, alisi kuluvona ngʼo, vakutamanilwa kufwa, alisi lufu lukuvapela.

⁷Na vutundwa wa nzige wavagi kitisi farasi zigovile ku vulugu; na mitwe zyazyo zyavagi kitisi ngala zikolile zya dhahabu,

⁸na mavusyu gazyo gavagi kitisi ga vanhu, na nzwili zyazyo kitisi

⁹zya vakima, na mino gazyo kitisi ga masimba, na zizwalile fikumbwa kitisi fya chuma, na kululumila kwa manana gazyo kitisi kuyuma kwa migogoteni na farasi ningi zilija myega ku vulugu.

¹⁰Na zyavagi na mikila kitisi tumina, na maluyenze savasava, na mikila zyazyo zyavagi nayo nguzu ya kuvagulazya vanhu myezi itano.

¹¹Na zyavagi na mutemi, malaika wa vusihu, lina lyakwe mu Kiebrania: Abadoni, na mu Kigriki: Apolioni.

¹²Musyolo gwa mbele gwamalaga; lolaga yitali yingi ivili kumbele.

¹³Na malaika wa mkaga wakafulaga kalumbete, na nagwigagwa muzwi gulifuma ku mpembe inne zya hakuhozezya ha dhahabu, hohene haliho hambele na Mulungu,

¹⁴gulimuwila malaika wa mkaga, homwene wavagi na kalumbete, Uvatungule vamalaika avo vanne vatungilwe ha mongo muhanya Eufrati.

¹⁵Vamalaika avo vatungulagwa, hovene vivangaga kwitungo lyenili na lusiku na mwezi na mwaka kuvavulaga ifungu lya vudatu lya vanhu.

¹⁶Na luvalo lwa mbuto ya vadamizi lwavagi fihumbi ikumi na fihumbi ka fihumbi ikumi ka tuvili;

¹⁷nene nigagwa luvalo lwavo. Na kwigela kwa farasi na kwa venavo vazidamilaga kwavagi giki: Vavagi vazwalile fikumbwa fya chuma fya za kitisi magazi, na fingi kitisi manjano, na mitwe zya farasi zyavagi kitisi zya masimba, na ku milomo yazyo gwafumaga moto na lyoki na kibiriti.

¹⁸Ku maluduko genaya adatu ifungu lya vudatu lya vanhu vavulagagwa, ku moto na lyoki na kibiriti hochene chafumaga ku milomo yazyo.

¹⁹Kwisi nguzu ya farasi yilimo mu milomo na mu mikila yazyo. Kwisi mikila yazyo yilizikola nzoka, yili na mitwe, na yiligulazya mugati nazyo.

²⁰Alisi vanhu avo vasigalile, hovene vakavulagilwe na maluduko genayo, vakapilukile moyo ku milimo ya makono gavo, na vakalekile kuyisenga migavo na fimbulimbuli fya dhahabu na fya fedha na fya mukuvo na fya mawe na fya miti, na hofyene fikakovolile kuvona

²¹ninga kwigwa ninga kusimiza; vakapilukile moyo ku vuvulagi wavo, ninga mavila gavo, ninga vulava wavo, ninga wivi wavo.