Read Buku Loyera - Chichewa Gen. 11 Bible Online

Gen. 11 - Buku Loyera - Chichewa bible

Gen. 11

¹Poyambayamba anthu onse a pa dziko lapansi ankalankhula chilankhulo chimodzi, ndipo mau amene ankalankhulawo anali amodzi.

²Atasamukira chakuvuma, adakafika ku chigwa ku dziko la Sinara kumene adakhazikika.

³Tsono adayamba kuuzana kuti, “Tiyeni tiwumbe njerwa ndi kuzitentha.” Motero m'malo mwa miyala adatenga njerwa, namangira phula m'malo mwa matope.

⁴Ndipo adati, “Tsopano tiyeni timange mzinda wathu, ndipo nsanja yake italike mpaka kukafika kumwamba. Tikatero tidzatchuka ndithu, ndipo sitidzamwazikanso pa dziko lapansi.”

⁵Tsono Chauta adatsika kudzaona mzindawo, pamodzi ndi nsanja imene anthu ankamanga.

⁶Ndipo adati, “Tsopano anthu onseŵa ndi amodzi, ndipo akulankhula chilankhulo chimodzi. Zinthu akuchitazi ndi chiyambi chabe cha zimene adzachite. Kenaka iwoŵa adzachita chilichonse chimene afuna.

⁷Tiyeni titsikire komweko, tikasokoneze chilankhulo chao kuti asamvane.”

⁸Motero Chauta adaŵamwaza anthuwo pa dziko lonse lapansi, ndipo iwowo adaleka kumanga mzindawo.

⁹Choncho mzinda umenewo adautcha Babele,[5] chifukwa choti kumeneko Chauta adasokoneza chilankhulo cha anthu onse. Ndipo kuchokera kumeneko adaŵamwaza anthuwo pa dziko lonse lapansi.

¹⁰Nayi mibadwo yofumira mwa Semu: Patangopita zaka ziŵiri chitatha chigumula, Semu ali wa zaka 100, adabereka mwana dzina lake Aripakisadi.

¹¹Pambuyo pake adakhala ndi moyo zaka zina 500, ndipo adaberekanso ana ena aamuna ndi aakazi.

¹²Pamene Aripakisadi anali wa zaka 35, adabereka mwana dzina lake Sela.

¹³Pambuyo pake adakhala ndi moyo zaka zina 403, ndipo adaberekanso ana ena aamuna ndi aakazi.

¹⁴Pamene Sela anali wa zaka 30, adabereka mwana dzina lake Eberi.

¹⁵Pambuyo pake adakhala ndi moyo zaka zina 403, ndipo adaberekanso ana ena aamuna ndi aakazi.

¹⁶Eberi ali wa zaka 34, adabereka mwana dzina lake Pelegi.

¹⁷Pambuyo pake adakhala ndi moyo zaka zina 430, ndipo adaberekanso ana ena aamuna ndi aakazi.

¹⁸Pelegi ali wa zaka 30 adabereka mwana dzina lake Reu.

¹⁹Pambuyo pake adakhala ndi moyo zaka zina 209, ndipo adaberekanso ana ena aamuna ndi aakazi.

²⁰Reu ali wa zaka 32, adabereka mwana dzina lake Serugi.

²¹Pambuyo pake adakhala ndi moyo zaka zina 207, ndipo adaberekanso ana ena aamuna ndi aakazi.

²²Serugi ali wa zaka 30, adabereka mwana dzina lake Nahori.

²³Pambuyo pake adakhala ndi moyo zaka zina 200, ndipo adaberekanso ana ena aamuna ndi aakazi.

²⁴Nahori ali wa zaka 29, adabereka mwana dzina lake Tera.

²⁵Pambuyo pake adakhala ndi moyo zaka 119, ndipo adaberekanso ana ena aamuna ndi aakazi.

²⁶Tera ali wa zaka 70, adabereka Abramu, Nahori ndi Harani.

²⁷Nazi zidzukulu za Tera: Tera adabereka Abramu, Nahori ndi Harani. Harani adabereka Loti.

²⁸Haraniyo adafera m'mudzi wa kwao dzina lake Uri, wa ku Kaldeya. Adafa atate ake akali moyo.

²⁹Abramu ndi Nahori adakwatira. Abramu adakwatira Sarai, ndipo Nahori adakwatira Milika mwana wa Harani, amene analinso bambo wake wa Isika.

³⁰Sarai analibe ana chifukwa anali wosabala.

³¹Tsono Tera adatenga mwana wake Abramu ndi Loti mdzukulu wake, mwana wa Harani, ndiponso mpongozi wake Sarai, mkazi wa Abramu. Adanyamuka ulendo kuchoka ku mzinda uja wa Uri wa ku Kaldeya napita nawo ku dziko la Kanani. Adakafika ku Harani, nakhazikika kumeneko.

³²Ndipo Tera adafera kumeneko ali wa zaka 205.