Read Buku Loyera - Chichewa Gen. 31 Bible Online

Gen. 31 - Buku Loyera - Chichewa bible

Gen. 31

¹Yakobe adamva kuti ana a Labani ankanena kuti, “Yakobe watenga zonse za bambo wathu. Wapeza chuma chake m'chuma cha bambo wathu.”

²Yakobe adazindikiranso kuti Labani sankamuwonetsa nkhope yabwino ngati kale.

³Tsono Chauta adamuuza kuti, “Bwerera ku dziko la atate ako ndi kwa abale ako. Ine ndidzakhala nawe.”

⁴Tsono Yakobe adatumiza mau kwa Rakele ndi kwa Leya kuti akakumane naye kubusa kumene kunali zoŵeta zake.

⁵Atafikako, iye adaŵauza kuti, “Ndaona kuti bambo wanu tsopano sakundipenya ndi maso abwino ngati kale. Koma Mulungu wa atate anga wakhala nane.

⁶Nonse aŵirinu mukudziŵa bwino kuti ndidagwira ntchito kwa bambo wanu ndi mphamvu zanga zonse.

⁷Komabe iye wandipusitsa, ndipo malipiro anga waasinthasintha kakhumi konse. Koma Mulungu sadamlole kuti andichite choipa.

⁸Nthaŵi zonse Labani akanena kuti, ‘Zoŵeta zamathothomathotho zidzakhala malipiro ako,’ zoŵeta zonse zinkakhala zamathothomathotho. Ndipo akanena kuti, ‘Zamipyololo zikhala malipiro ako,’ zoŵeta zonse zinkangokhala zamipyololo.

⁹Mulungu watenga zoŵeta zonse kwa bambo wanu, wapatsa ine.

¹⁰Pa nthaŵi yakuti zoŵeta zitenga maŵere, ine ndidalota maloto, ndipo ndidaona kuti atonde amene ankakwerawo anali amipyololomipyololo, amathothomathotho ndi amaŵangamaŵanga.

¹¹Ndipo mngelo wa Mulungu adalankhula nane m'maloto momwemo nandiitana kuti, ‘Yakobe,’ ine ndidayankha kuti, ‘Ee Ambuye!’

¹²Iye adati, ‘Tayang'ana, ndipo upenye kuti atonde onse amene akukweraŵa ndi amipyololomipyololo, amathothomathotho ndi amaŵangamaŵanga. Zimenezi ndachita ndine, popeza kuti ndaona zimene Labani akukuchita.

¹³ Ine ndine Mulungu amene ndidakuwonekera ku Betele kuja kumene udaimika mwala wachikumbutso ndi kuudzoza mafuta, ndipo kumeneko iwe udalumbira. Konzeka tsopano, uchoke kuno, ubwerere ku dziko lakwanu.’ ”

¹⁴Rakele ndi Leya adayankha kuti, “Palibe chomwe chatitsalira ife kwa bambo wathu choti chikhale choloŵa chathu.

¹⁵Ife bambo wathu akutiyesa alendo. Adatigulitsa, ndipo ndalama zomwe adazipezera pa ifezo, adamwaza zonse.

¹⁶Chuma chonse chimene Mulungu wachotsa kwa bambo wathu, ndi chathu ndi cha ana athu. Chitani zimene Mulungu wakuuzani.”

¹⁷Motero Yakobe adakonzekera kuti achoke, kubwerera kwa bambo wake ku dziko la Kanani. Tsono ana ake onse pamodzi ndi akazi ake omwe adaŵakweza pa ngamira.

¹⁸Ndipo zoŵeta zonse adazitsogoza namazikusa, pamodzi ndi zonse zimene adazipeza ku Mesopotamiya kuja.

¹⁹Labani anali atapita kokameta nkhosa. Ndipo akadali komweko, Rakele adaba timilungu ta m'nyumba mwa Labani, bambo wake.

²⁰Motero Yakobe adampusitsa Labani Mwaramu uja posamuuza kuti akuchoka.

²¹Adatenga zake zonse, nachoka chothaŵa. Adanyamuka, naoloka mtsinje wa Yufurate, nkuyamba ulendo wopita ku dziko lamapiri la Giliyadi.

²²Patapita masiku atatu, Labani adamva kuti Yakobe adathaŵa.

²³Tsono adatenga anthu ake, nkulondola Yakobeyo masiku asanu ndi aŵiri, mpaka adakampezera ku dziko lamapiri la Giliyadi.

²⁴Labani Mwaramu uja adalota maloto usiku womwewo. Mulungu adadza namuuza kuti, “Usamuwopseze Yakobe mwa njira iliyonse.”

²⁵Labani adampeza Yakobe atamanga mahema kumapiriko. Nayenso Labaniyo adamanga mahema ake komweko ku dziko lamapiri la Giliyadi.

²⁶Labani adafunsa Yakobe kuti, “Chifukwa chiyani wandinyenga ndi kutenga ana anga aakazi ngati ogwidwa pa nkhondo?

²⁷Chifukwa chiyani wandinyenga ndi kundizemba osandiwuza? Ukadandiwuza, bwenzi nditakulola mokondwa, ndipo bwenzi pali kumaimba nyimbo ndi ting'oma ndi azeze.

²⁸Sudandilole kuti nditsazikane ndi adzukulu anga ndi ana anga. Udachita zopusa.

²⁹Ndili nazo mphamvu zakukuchita choipa. Koma usiku wapitawu, Mulungu wa atate ako wandiwuza kuti, ‘Usamuwopseze Yakobe mwa njira iliyonse.’

³⁰Ndikudziŵa kuti udachoka chifukwa unkafunitsitsa kubwerera kwanu. Koma bwanji wandibera timilungu tanga?”

³¹Yakobe adayankha kuti, “Ndinkaopa, chifukwa ndinkaganiza kuti mundilanda ana anuŵa.

³²Koma mukapeza kuti wina aliyense pano ali ndi timilungu tanu, aphedwe ameneyo. Anthu tili nawoŵa akhale mboni pano pamene inu muyang'ane zinthu zanu m'katundu yenseyu. Tsono mukazipeza zanuzo mutenge.” Monsemo nkuti Yakobe ali wosadziŵa kuti Rakele adaaba timilunguto.

³³Labani adakaloŵa m'hema la Yakobe ndi m'hema la Leya ndiponso m'hema la adzakazi aŵiri aja, koma sadatipeze timilungu taketo. Kenaka adakaloŵa m'hema la Rakele.

³⁴Rakeleyo anali ataibisa milungu ya m'nyumba mwa Labaniyo, ataiika pa chishalo cha pamsana pa ngamira, iyeyo nkukhala pomwepo. Labani adafunafuna m'hema monsemo, koma osaipeza.

³⁵Rakele adauza bambo wake kuti, “Ngati ndikulephera kuimirira pamaso panu, musandikwiyire bambo, chifukwa sindili bwino malinga nza ife akazife.” Motero Labani adalephera kutipeza timilungu ta m'nyumba mwake tija.

³⁶Apo Yakobe adapsa mtima kwambiri ndipo adalankhula ndi Labani mokalipa, adati, “Kodi ndakulakwirani chiyani? Kodi ndaphwanya lamulo lotani, kuti mundilondole?

³⁷Tsono mwafunafuna m'katundu wanga yense, kodi mwapeza chiyani chanu? Chomwe mwapezacho muchiike poyera pano, kuti anthu anu ndi anthu angaŵa achiwone. Ndipo iwowo ndiwo aone wokhoza pakati pa aŵirife.

³⁸Ndakhala nanu zaka makumi aŵiri tsopano, ndipo nkhosa zanu pamodzi ndi mbuzi zomwe sizidapolozepo ai. Ine sindidadyeko nkhosa za m'khola mwanu.

³⁹Nkhosa ikajiwa ndi zilombo, ine ndinkalipira nthaŵi zonse, sindinkabwera nayo kwa inu, kuwonetsa kuti sindidalakwe. Munkafuna kuti ndilipire chilichonse chobedwa usiku kapena usana.

⁴⁰Nthaŵi zambiri ndinkavutika ndi kutentha masana ndiponso ndi kuzizira usiku. Sindinkatha kuwona tulo.

⁴¹Umu ndi m'mene zidaaliri zinthu pa zaka makumi aŵiri zomwe ndidakhala ndi inu. Ndidakugwirirani ntchito zaka khumi ndi zinai chifukwa cha ana anu aŵiriŵa, ndipo zaka zisanu ndi chimodzi ndidagwirira zoŵeta. Komabe malipiro anga mwakhala mukusintha kakhumi konse.

⁴²Mulungu wa atate anga, Mulungu wa Abrahamu, Mulungu amene Isaki ankamuwopa, akadapanda kukhala nane, bwenzi mutandichotsa kale ndili chimanjamanja. Koma Mulungu adaona mavuto anga ndi ntchito za manja anga, ndipo usiku wapitawu Iye wakutsutsani.”

⁴³Labani adayankha Yakobe kuti, “Ana aakaziŵa ndi anga, ana ao ndi anga, pamodzi ndi zoŵeta zomwezi. Zonse ukuziwonazi nzanga. Koma tsopano ndiŵachitire chiyani ana anga aakaziŵa pamodzi ndi ana aoŵa?

⁴⁴Chabwino, tiye tichite chipangano, chikhale mboni pakati pa ine ndi iwe.”

⁴⁵Yakobe adaimiritsa mwala.

⁴⁶Adauza anthu ake kuti asonkhanitse miyala, aunjike mulu. Ndipo pambali pake pa muluwo adadyerapo chakudya.

⁴⁷Tsono muluwo Labani adautcha Yagara-Sahaduta, koma mulu womwewo Yakobe adautcha Galedi.

⁴⁸Pambuyo pake Labani adati, “Mulu wamiyalawu udzakhala chikumbutso kwa ine ndi iwe.” Nchifukwa chake malowo adaŵatcha Galedi.

⁴⁹Labani adanenanso kuti, “Chauta atiyang'anire ife tonse aŵiri pamene tikulekana. Motero malowo adaŵatcha Mizipa.

⁵⁰Labani adapitirira kunena kuti, Ukamakaŵazunza ana angaŵa, kapena ukakakwatira akazi ena, ngakhale palibe wina ali nafe pano, ukumbukire kuti Mulungu ndiye mboni pakati pa ine ndi iwe.”

⁵¹Tsono Labani adauza Yakobe kuti, “Pano pali miyala imene ndaunjika pakati pathu, ndipo pompano pali mwala wachikumbutso.

⁵²Mulu umenewu pamodzi ndi mwala wachikumbutsowu, zonsezi ndi mboni. Ine sindidzapyola mulu umenewu kuti ndilimbane nawe. Iwenso usadzapyole muluwu kuti ulimbane ndi ine.

⁵³Mulungu wa Abrahamu, Mulungu wa Nahori,[12] Mulungu wa atate ao, ndiye adzatiweruze ife aŵiri.” Motero Yakobe adalumbira m'dzina la Mulungu amene Isaki bambo wake ankamuwopa.

⁵⁴Tsono Yakobe adapereka nsembe paphiripo, naitana anthu ake kuti adzadye chakudya. Atamaliza kudyako, adagona paphiri pomwepo.

⁵⁵M'maŵa mwake, m'mamaŵa, Labani adampsompsona adzukulu ake aja pamodzi ndi ana ake aakaziwo naŵatsazika, ndipo ataŵadalitsa adachoka namapita kwao.