Read Buku Loyera - Chichewa Gen. 33 Bible Online

Gen. 33 - Buku Loyera - Chichewa bible

Gen. 33

¹Yakobe adaona Esau akubwera ndi anthu ake 400. Motero ana ake aja adaŵagaŵira Leya, Rakele ndi adzakazi aŵiri aja.

²Adatsogoza adzakaziwo pamodzi ndi ana ao. Leya ndi ana ake ankatsata pambuyo pao, Rakele ndi Yosefe ankadza pambuyo penipeni.

³Yakobe adatsogola, ndipo adaŵerama mpaka pansi kasanu ndi kaŵiri akuyandikira mbale wake.

⁴Koma Esau adathamanga kukakumana naye, namkumbatira, ndi kumlonjera pakumumpsompsona. Onse aŵiriwo ankangolira.

⁵Esau atayang'ana, adaona akazi ndi ana omwe aja, ndipo adamufunsa kuti, “Anthu aŵa ali ndi iweŵa nga yani?” Yakobe adayankha kuti, “Aŵa, mbuyanga, ndi ana amene Mulungu adandipatsa mwa chifundo chake.”

⁶Tsono adzakazi aja adadza pamodzi ndi ana ao, nagwada pansi.

⁷Adabweranso Leya pamodzi ndi ana ake, ndipo wotsirizira anali Rakele. Onsewo adagwada pansi.

⁸Esau adati, “Nanga gulu la zoŵeta ndakumana nalo lija ndi lachiyani?” Yakobe adayankha kuti, “Mbuyanga, gulu limene lija ndi lanu, kuti inuyo mundikomere mtima.”

⁹Koma Esau adati, “Mbale wanga, zoŵeta zotere ndili nazo zambiri. Uli nazozi zikhale zako.”

¹⁰Yakobe adati, “Ai chonde, ngati mwandikomera mtima, landirani mphatso yanga. Ine ndikamaona nkhope yanu, ndiye ngati ndaona nkhope ya Mulungu, poti mwandilandira chonchi ndi manja aŵiri.

¹¹Chonde landirani mphatso ndakutengeraniyi. Mulungu adandikomera mtima, ndipo adandipatsa zosoŵa zanga zonse.” Adapitirira kumuumiriza, mpaka Esau adalandira.

¹²Ndipo Esau adati, “Tiyeni tinyamuke, tizipita. Ine nditsogolako.”

¹³Tsono Yakobe adati, “Mbuyanga, mukudziŵa kuti anaŵa atopa, ndipo ndiyenera kusamalanso nkhosa ndi ng'ombe zimene zili ndi tiana. Ndikazikusa mofulumira kwambiri, ngakhale tsiku limodzi lokha, zifa.

¹⁴Chonde mbuyanga, tsogolaniko, ine ndiziyenda pang'onopang'ono pambuyo pa zoŵeta ndi ana anga, mpaka ndikakupezani ku Seiri.”

¹⁵Apo Esau adati, “Tsono undilole kuti ndikusiyire anthu anga enaŵa.” Koma Yakobe adati, “Iyai mbuyanga, zimenezo sizifunika kwenikweni, ndingofuna kukukondwetsani.”

¹⁶Motero pa tsiku limenelo Esau adanyamuka ulendo kubwerera ku Seiri.

¹⁷Koma Yakobe adapita ku Sukoti, ndipo adamangako nyumba yake, pamodzi ndi makola a zoŵeta zake. Nchifukwa chake malowo adatchedwa Sukoti.

¹⁸Pambuyo pake Yakobe adakafika bwino ku mzinda wa Sekemu m'dziko la Kanani, atabwerera kuchokera ku Mesopotamiya. Adamanga mahema pamalo pena, poyang'anana ndi mzindawo.

¹⁹Malo amenewo adagula kwa zidzukulu za Hamori, bambo wake wa Sekemu, pa mtengo wa ndalama 100 zasiliva.

²⁰Adamanga guwa pomwepo, nalitcha El-Elohe-Israele, ndiye kuti Mulungu, Mulungu wa Israele.