Read Buku Loyera - Chichewa Gen. 35 Bible Online

Gen. 35 - Buku Loyera - Chichewa bible

Gen. 35

¹ Tsono Mulungu adauza Yakobe kuti, “Nyamuka, pita ku Betele, ukakhale komweko. Ukamangeko guwa la Mulungu amene adakuwonekera pamene unkathaŵa mbale wako Esau.”

²Motero Yakobe adauza banja lake ndi onse amene anali naye kuti, “Tayani milungu yachilendo imene muli nayo pakati panu. Mudziyeretse, ndipo muvale zovala zaudongo.

³Tichokako kuno, tipita ku Betele kumene ndikamange guwa la Mulungu amene adandithandiza pa nthaŵi ya mavuto anga. Ndiye ndithu amene wakhala nane kulikonse komwe ndinkapita.”

⁴Motero milungu yonse yachilendo imene ana ake anali nayo, adaipereka kwa Yakobe, pamodzinso ndi ndolo zakukhutu zimene ankavala. Zonsezo adazifotsera patsinde pa mtengo wa thundu pafupi ndi Sekemu.

⁵Pamene Yakobe ndi ana ake adachoka, anthu onse a mizinda yozungulira adachita mantha, motero sadaŵatsatire.

⁶Tsono Yakobe adafika ndi anthu ake ku Luzi (ndiye kuti Betele) m'dziko la Kanani.

⁷Adamanga guwa kumeneko, ndipo malowo adaŵatcha Betele, chifukwa kumeneko nkumene Mulungu adadziwulula kwa Yakobe pamene ankathaŵa mbale wake.

⁸Debora mlezi wa Rakele, adamwalira komweko, ndipo adaikidwa patsinde pa mtengo wathundu ku Beteleko. Motero malowo adatchedwa Mtengo Wamaliro.

⁹Yakobe atabwerako ku Mesopotamiya kuja, Mulungu adamuwonekeranso namudalitsa.

¹⁰ Mulungu adati, “Dzina lako ndiwe Yakobe, koma kuyambira tsopano, dzina lako lidzakhala Israele.” Motero adayamba kutchedwa Israele.

¹¹ Pambuyo pake Mulungu adamuuza kuti, “Ine ndine Mulungu, Mphambe. Ubale ana ambiri. Udzakhala ndi zidzukulu zambiri, ndipo zina mwa izo zidzakhala mafumu. Zidzukulu zako zidzachuluka kwambiri, kotero kuti zidzakhala mitundu yambiri ya anthu.

¹²Ndidzakupatsa dziko limene ndidapatsa Abrahamu ndi Isaki. Dziko limeneli ndidzapatsanso zidzukulu zako, iwe utafa.”

¹³Tsono Mulungu adamsiya Yakobe pa malo omwe ankalankhula nayepo, napita.

¹⁴ Yakobe adaimika chimwala chachikumbutso pa malo amenewo. Adapereka chopereka cha chakumwa pamwalapo, nathirapo mafuta.

¹⁵Malo amene Mulungu adalankhula naye, Yakobe adaŵatcha Betele.

¹⁶Tsono onse adachoka ku Betele, koma asanafike ku Efurata, nthaŵi yoti Rakele aone mwana idamukwanira, ndipo kubereka kwake kudamuvuta kwambiri.

¹⁷Zidafika poipa kwambiri, ndipo mzamba adamuuza kuti, “Musaope, ameneyu ndi mwana wina wamwamuna.”

¹⁸Tsono Rakele akumwalira kumene, akupuma mwaŵefuŵefu, kutsirizika, adamutcha mwanayo Benoni, koma bambo wake adamutcha Benjamini.

¹⁹Rakele atamwalira, adaikidwa pambali pa mseu wopita ku Efurata (ndiye kuti Betelehemu.)

²⁰Ndipo Yakobe adaimika chimwala chachikumbutso pa manda a Rakele. Mwalawo ulipobe pamenepo mpaka lero lino.

²¹Yakobe adapitirira nakamanga mahema ake kuseri kwa nsanja ya Edere.

²² Pamene Yakobe ankakhala m'dziko limenelo, Rubeni adaachita zoipa ndi Biliha, mmodzi wa azikazi a bambo wake, Yakobeyo nkuzimva zimenezo. Yakobe anali ndi ana aamuna khumi ndi aŵiri.

²³Ana a Leya anali aŵa: Rubeni, mwana wachisamba wa Yakobe, Simeoni, Levi, Yuda, Isakara ndi Zebuloni.

²⁴Ana a Rakele anali aŵa: Yosefe ndi Benjamini.

²⁵Ana a Biliha mdzakazi wa Rakele anali aŵa: Dani ndi Nafutali.

²⁶Ana a Zilipa mdzakazi wa Leya anali aŵa: Gadi ndi Asere. Ameneŵa ndiwo ana a Yakobe amene adabadwira ku Mesopotamiya.

²⁷ Yakobe adakafika kwa bambo wake Isaki ku Mamure (kumenenso kunkatchedwa ku Kiriyati-Ariba kapena Hebroni), kumene Abrahamu ndi Isaki ankakhala kale.

²⁸Tsono Isaki adamwalira ali wa zaka 180.

²⁹Ndipo adafa ndi kuikidwa m'manda, ali nkhalamba zedi. Ana ake, Esau ndi a Yakobe ndiwo adamuika m'manda.