Read Buku Loyera - Chichewa Gen. 40 Bible Online

Gen. 40 - Buku Loyera - Chichewa bible

Gen. 40

¹Patapita kanthaŵi, munthu woperekera vinyo pamodzi ndi wopanga buledi ku nyumba ya mfumu ya ku Ejipito, adalakwira mbuyao mfumu.

²Farao adaŵakwiyira kwambiri antchito ake aŵiriwo.

³Motero adaŵatsekera m'ndende, nakaŵaika m'manja mwa mkulu wa asilikali olonda kunyumba kwa mfumu uja, m'ndende momwe Yosefe ankasungidwa.

⁴Mkulu wa alonda uja adasankhula Yosefe kuti asamalire anthu aŵiriwo ndi kuŵalonda. Adakhalamo nthaŵi yaitali ndithu m'ndendemo.

⁵Usiku wina m'ndendemo, anthu aŵiri onse aja, woperekera vinyo uja ndi wophika buledi, adalota maloto. Aliyense mwa aŵiriwo adalota maloto ake a tanthauzo lakelake.

⁶Yosefe atabwera m'maŵa, adaona kuti nkhope zao zasinthika.

⁷Adaŵafunsa kuti, “Mwatani mukuwoneka ngati achisoni lero?”

⁸Onsewo adayankha kuti, “Aŵirife tonse talota maloto usiku wapitawu, ndipo pano palibe ndi mmodzi yemwe wotha kutimasulira malotowo.” Apo Yosefe adaŵauza kuti, “Ndi Mulungu yekhatu amene amapatsa nzeru zomasulira maloto. Tandiwuzani maloto anuwo.”

⁹Motero uja woperekera vinyoyu adayambapo kunena maloto ake, adati, “Ine ndinalota ndikuwona mtengo wamphesa,

¹⁰unali ndi nthambi zitatu. Masamba ake atangophukira, pomwepo panaoneka maluŵa, pambuyo pake panaonekanso mphesa zakupsa.

¹¹Chikho cha Farao chinali m'manja mwanga; ine ndinatenga mphesazo nkufinyira m'chikhomo, ndipo ndinachipereka kwa Farao.”

¹²Yosefe adamuyankha kuti, “Tanthauzo lake la maloto ameneŵa nali: nthambi zitatuzo ndi masiku atatu.

¹³Pakangopita masiku atatu, Farao akutulutsa muno, akukhululukira, ndipo akubwezera pa ntchito yako. Tsono uzidzaperekera chikho kwa Farao monga momwe unkachitira kale.

¹⁴Komatu udzandikumbuke, zinthu zikadzakuyendera bwino. Chonde udzandikomere mtima ndi kutchula dzina langa kwa Farao, kuti ndidzatulule m'ndende muno.

¹⁵Inetu adachita chondiba, ndipo adabwera nane kuno kuchokera ku dziko la Ahebri. Tsono ngakhale kunoko, sindidachite kanthu kalikonse koti anditsekere nako m'ndende.”

¹⁶Wophika buledi uja nayenso adaona kuti tanthauzo la malotowo linali labwino, adauza Yosefe kuti, “Inenso ndinalota nditasenza nsengwa zitatu za buledi pamutu pangapa.

¹⁷M'nsengwa yapamwamba munali mitundu yambiri ya chakudya cha Farao, koma mbalame zinalikudya chakudyacho.”

¹⁸Yosefe adamuyankha kuti, “Kamasulidwe kake ka maloto ameneŵa ndi aka: nsengwa zitatu ndi masiku atatu.

¹⁹Pakapita masiku atatu, Farao akutulutsa muno, ndipo adzadula mutu wako. Tsono mtembo wako adzaupachika pa mtengo, ndipo mbalame zidzadya mnofu wako.”

²⁰Patangopitadi masiku atatu, padachitika phwando lokondwerera tsiku lobadwa Farao, ndipo Faraoyo adaitana nduna zake zonse. Tsono adamtulutsa uja woperekera vinyoyu pamodzi ndi wophika buledi yemwe uja. Aŵiri onse aja adaŵaimika pamaso pa nduna zake zija.

²¹Farao adamubwezera pa tchito yake woperekera vinyo uja.

²²Koma wophika buledi uja adampachika, monga momwe Yosefe adaanenera pomasulira maloto ao aja.

²³Komabe woperekera vinyo uja sadamkumbuke Yosefe, adangomuiŵaliratu.