Read Buku Loyera - Chichewa Gen. 7 Bible Online

Gen. 7 - Buku Loyera - Chichewa bible

Gen. 7

¹Chauta adauza Nowa kuti, “Loŵa m'chombo iwe pamodzi ndi banja lako. Iwe wekha ndakupeza kuti ndiwe wochita zondikondweretsa mu mbadwo uno.

²Tsono tenga magulu asanu ndi aŵiri a nyama, ziŵiriziŵiri, yaimuna ndi yaikazi, zimene amaperekera nsembe, ndipo utengenso nyama ziŵiriziŵiri, yaimuna ndi yaikazi, zosaperekera nsembe.

³Utengekonso mbalame ziŵiriziŵiri za mtundu uliwonse, magulu asanu ndi aŵiri. Uchite zimenezi pofuna kuti nyama ndi mbalame za mitundu yonse zisungidwe ndi moyo, ndipo kuti zidzaswanenso pa dziko lapansi.

⁴Pakangopita masiku asanu ndi aŵiri, ndidzagwetsa mvula pa dziko lapansi masiku makumi anai, usana ndi usiku, kuti zife zamoyo zonse zimene ndidazipanga.”

⁵Ndipo Nowa adachita zonse zimene Mulungu adamlamula.

⁶Nowa anali wa zaka 600 pamene chigumulacho chidafika pa dziko lapansi.

⁷ Iyeyo ndi mkazi wake ndi ana ake aamuna ndi akazi ao adaloŵa m'chombo, kuthaŵa chigumulacho.

⁸Nyama zazimuna ndi zazikazi zimene anthu amaperekera nsembe, mbalame pamodzi ndi nyama zokwaŵa zomwe,

⁹Nowa adaloŵa nazo m'chombo, monga Mulungu adaalamulira.

¹⁰Patangopita masiku asanu ndi aŵiri, chigumula chidafika pa dziko lonse lapansi.

¹¹ Pa 17, mwezi wachiŵiri, Nowa ali wa zaka 600, akasupe onse a madzi ambiri okhala pansi pa dziko adatumphuka, ndipo kuthambo kudatsekukanso, kuti madzi akhuthuke.

¹²Choncho mvula idagwa pa dziko lapansi masiku makumi anai, usana ndi usiku.

¹³Pa tsiku lomwelo, Nowa ndi mkazi wake, pamodzi ndi ana ake aamuna, Semu, Hamu ndi Yafeti, ndi akazi ao, adaloŵa m'chombomo.

¹⁴Iwowo adaloŵa m'chombo pamodzi ndi mtundu uliwonse wa nyama zakuthengo, zoŵeta, nyama zokwaŵa ndi mbalame za mtundu uliwonse.

¹⁵Nowa adaloŵa m'chombomo pamodzi ndi zamoyo zonse zazimuna ndi zazikazi,

¹⁶monga Mulungu adaalamulira. Pomwepo Chauta adatseka pa khomo.

¹⁷Chigumula chidagundika masiku makumi anai pa dziko lapansi. Madzi adayamba kukwera pa dziko lapansi, ndipo chombo chidayamba kuyandama.

¹⁸Madziwo adanka nakwererakwerera, ndipo chombocho chidayandama pa madzi.

¹⁹Kukwera kwa madzi kudapitirira ndithu mpaka kumiza ndi mapiri aatali omwe.

²⁰Tsono adakwererakwerera ndithu mpaka kubzola nsonga za mapiriwo mamita asanu ndi aŵiri.

²¹Zamoyo zonse zokhala pa dziko lapansi zidafa, monga mbalame, zoŵeta, nyama zakuthengo, mtindiri wa tizilombo tosiyanasiyana, ndi anthu onse.

²²Zamoyo zonse za pa dziko lapansi zidafa.

²³Chauta adaononga zamoyo zonse za pa dziko: anthu, nyama, zokwaŵa ndi mbalame. Nowa yekha adapulumuka pamodzi ndi onse amene anali naye m'chombomo.

²⁴Madziwo adakhala osaphwa konse pa dziko lapansi masiku 150.