Read Buku Loyera - Chichewa 2 Sam. 22 Bible Online

2 Sam. 22 - Buku Loyera - Chichewa bible

2 Sam. 22

¹Tsiku limene Chauta adaapulumutsa Davide kwa adani ake onse ndiponso kwa Saulo,

²Davideyo adaimbira Chauta nyimbo iyi yakuti, “Chauta ndiye thanthwe langa, linga langa ndi mpulumutsi wanga.

³Ndiye Mulungu wanga ndi thanthwe langa limene ndimathaŵirako. Ndiye chishango changa, ndiye mtetezi wanga ndi mpulumutsi wanga. Ndiye linga langa ndi mpulumutsi wanga. Ndinu amene mumandiwombola pa nkhondo.

⁴Ndimaitana Chauta, amene ayenera kumtamanda, ndipo amandipulumutsa kwa adani anga.

⁵“Zoŵaŵa za imfa zidandizinga, mitsinje ya ku malo a anthu akufa idandisefukira.

⁶Nthambo zakumanda zidandizeŵeza, misampha ya imfa idandikola.

⁷“Ndidaitana Chauta m'zovuta zanga, ndidafuulira Mulungu wanga kuti andithandize. Iye ali m'Nyumba mwake adamva liwu langa, kulira kwanga kofuna chithandizo kudamveka kwa iye.

⁸“Pamenepo dziko lapansi lidanjenjemera ndi kuchita chivomezi. Maziko akumwamba adagwedezeka ndi kulilima chifukwa Chauta adaakalipa.

⁹M'mphuno mwake munkafuka utsi, m'kamwa mwake munkatuluka moto woononga, makala amoto anali laŵilaŵi kuchokera m'kamwa momwemo.

¹⁰Adang'amba thambo natsika pansi, mdima wabii unali ku mapazi ake.

¹¹Adakwera pa mkerubi nauluka, adayenda mwaliŵiro ndi mphepo.

¹²Mdima adausandutsa chofunda chake, mitambo yakuda yamvula adaisandutsa mwafuli wake.

¹³M'kuŵala kumene kunali pamaso pake munkafumira makala amoto alaŵilaŵi.

¹⁴Kumwamba Chauta adagunda ngati bingu, Wopambanazonse liwu lake lidamveka.

¹⁵Adaponya mivi yake, nabalalitsa adani ake. Adachititsa zing'aning'ani, naŵapirikitsa.

¹⁶Ngalande zozama zam'nyanja zidaonekera, maziko a dziko lapansi adakhala poyera, pamene Chauta adakhuluma mokalipa, pamene adatulutsa mpweya wamphamvu m'mphuno mwake.

¹⁷“Ali kumwamba Chauta adatambalitsa dzanja nandigwira, ndi kundivuula m'madzi ozama.

¹⁸Adandipulumutsa kwa adani anga amphamvu, kwa onse amene ankadana nane; pakuti iwo anali amphamvu kwambiri kupambana ine.

¹⁹Adaniwo adandithira nkhondo pamene ndinali m'mavuto, koma Chauta adandichirikiza.

²⁰Adakandifikitsa ku malo amtendere, adandipulumutsa chifukwa adakondwera nane.

²¹“Chauta adandipatsa mphotho molingana ndi kulungama kwanga, adandifupa molingana ndi ungwiro wanga.

²²Ine ndidatsata njira za Chauta sindidachite zoipa ndi kumsiya Mulungu wanga.

²³Ndidamvera malangizo ake onse, ndipo malamulo ake sindidaŵataye.

²⁴Ndinalibe mlandu pamaso pake, ndinkalewa zoipa m'moyo wanga.

²⁵Nchifukwa chake Chauta wandipatsa mphotho molingana ndi kulungama kwanga, monga momwe akuwonera kuti ndilibe mlandu.

²⁶“Kwa anthu okhulupirika, Inu Mulungu mumadziwonetsa okhulupirika, kwa anthu aungwiro mumadziwonetsa abwino kotheratu.

²⁷Kwa anthu oyera mtima mumadziwonetsa okoma mtima, koma kwa anthu oipa mtima mumadziwonetsa ochenjera koposa.

²⁸Paja anthu odzichepetsa Inu mumaŵapulumutsa, koma anthu odzikuza mumaŵatsitsa.

²⁹Ndithu Inu Chauta, ndinu nyale yanga, Inu Mulungu, mumandiwunikira mu mdima.

³⁰Ndi chithandizo chanu ndingathe kugonjetsa gulu la ankhondo. Ndi chithangato chanu, Inu Mulungu, ndingathe kupambana.

³¹Mulungu wathuyo zochita zake nzangwiro, mau a Chauta ndi oona. Iye ndiye chishango choteteza onse othaŵira kwa Iye.

³²“Palibe Mulungu wina koma Chauta yekha. Palibe thanthwe lina lothaŵirapo koma Mulungu wathu yekha?

³³Mulungu wathu ndiye linga langa lolimba, wandichotsera zoopsa m'njira zanga.

³⁴ Amalimbitsa mapazi anga ngati a mbaŵala, ndipo amandisunga bwino ku mapiri.

³⁵Amaphunzitsa manja anga kamenyedwe ka nkhondo, kotero kuti ndingathe kupinda uta wachitsulo.

³⁶Inu mwanditeteza ndi chishango chanu chachipulumutso. Mwandikweza ndi chithandizo chanu.

³⁷Mwalimbitsa miyendo yanga kuti ndiyende bwino, choncho mapazi anga sadaterereke.

³⁸Ndidalondola adani anga ndi kuŵapeza, sindidabwerere mpaka nditaŵagonjetsa.

³⁹Ndidaŵakantha, ndidaŵagwetsa pansi, kotero kuti sadadzukenso, ndidaŵapondereza ndi mapazi anga.

⁴⁰Paja ndinu mudandipatsa mphamvu zomenyera nkhondo, ndinu mudandigonjetsera anthu ondiwukira.

⁴¹Inu mudapirikitsa adani anga kuti andithaŵe, amene ankadana nane ndidaŵaononga.

⁴²Adakuwa, koma panalibe ndi mmodzi yemwe woŵapulumutsa. Adalirira Chauta, koma sadaŵayankhe.

⁴³Ndidaŵaperapera ngati fumbi, ndidaŵaphwanya ndi kuŵapondereza ngati matope amumseu.

⁴⁴“Mudandipulumutsa kwa anthu anga ondiwukira. Mudandisunga kuti ndikhale wolamulira mitundu yonse. Choncho anthu osaŵadziŵa adayamba kunditumikira.

⁴⁵Anthu a maiko ena adabwera kwa ine kudzapemba; atangomva mau anga oyamba adandimvera.

⁴⁶Anthu a mitundu ina adataya mtima, adatuluka m'malinga mwao ali njenjenje.

⁴⁷“Chauta ndiwamoyo. Litamandike thanthwe langa, alemekezeke Mulungu wanga, thanthwe londipulumutsa.

⁴⁸Mulungu ndiye adandithandiza kuti ndilipsire, ndi kugonjetsa anthu a mitundu ina kuti akhale mu ulamuliro wanga.

⁴⁹Ndinu amene mudandipulumutsa kwa adani anga. Mudandikweza pamwamba pa ondiwukira, mudandilanditsa kwa anthu ankhanza.

⁵⁰ “Chifukwa cha zimenezi ndidzakuyamikani Inu Chauta, pakati pa mitundu ya anthu, ndidzaimba nyimbo zotamanda dzina lanu.

⁵¹Mulungu amathandiza mfumu yake kuti izipambana nthaŵi ndi nthaŵi. Amaonetsa chikondi chake chosasinthika kwa wodzozedwa wake, ndiye kuti kwa Davide ndi kwa zidzukulu zake mpaka muyaya.”